ULEVI 18
18
1Yehova yamba kuli Mose ngwenyi, 2Amba kuli A-Izalele ngwe, Yami Yehova Zambi yenu. 3Kanda nulinga yize akulinga mu chifuchi cha Engitu kuze nwatwamine. Kanda nulinga yize akulinga mu chifuchi cha Kanana kuze ngunanutwala. Kanda nwenda mu yiyulo yo. 4Munulinga yize natuma yami. Munufunga yiyulo yami nikwendelamo. Yami Yehova Zambi yenu. 5Kashika munufunga yiyulo yami ni shimbi jami. Ha kulinga chocho mutu matwama ni mwono. Yami Yehova.
6Niumwe hakachi kenu makundama kuli umwe usoko wenyi wa ha muchima akamufukule. Yami Yehova. 7Kanda ufukula tatenu mumu wapwa uselesele wa noko. Se iye noko kanda umufukula. 8Kanda ufukula pwo lia tatenu mumu wapwa uselesele, wa tatenu. 9Kanda ufukula ndumbwe, mwana wa tatenu, hanji mwana wa noko, apwe wa kusemuka mu zuwo, apwe wa kusemuka kweka. 10Kanda ufukula mujikulu we wa pwo, apwe mwana wa mwané wa lunga, apwe mwana wa mwané wa pwo, mumu uselesele wo wapwa uselesele wa yena mwene. 11Kanda ufukula mwana wa pwo wa pwo lia tatenu yoze hamusema kuli tatenu, se hapwa ndumbwe. 12Kanda ufukula ndumbu wa tatenu se iye usoko wa ha muchima wa tatenu. 13Kanda ufukula yayo, hanji mwanakwo wa noko, se iye usoko wa ha muchima wa noko. 14Kanda ufukula yayo hanji mwanakwo wa tatenu. Acho chinalumbunuka ngwe kanda ukundama kuli pwo lienyi mumu iye noko. 15Kanda ufukula tembwa-mwané se iye pwo lia mwané. Kanda umufukula. 16Kanda ufukula pwo ha yayenu hanji mwanakwenu, acho uselesele wa yayenu hanji mwanakwenu. 17Kanda ufukula pwo ni mwanenyi wa pwo. Kanda utambula mwana wa mwanenyi wa lunga hanji mwana wa mwanenyi wa pwo ukaafukule. Acho ungulungulu, se hapwa usoko we wa ha muchima. 18Kanda uhalika pwo ni yayo, hanji mwanakwo, nikumufukula shimbu mukwo kali ni mwono.
19Kanda ukundama kuli pwo kumufukula shimbu achili ku mazuwo. 20Kanda upomba ni pwo lia mukwenu nikulichisa nenyi. 21Kanda uhana niumwe wa ana je akaatambule mu kahia kuli Moleke, ukajilule chocho jina lia Zambi ye. Yami Yehova. 22Kanda upomba ni lunga ukamutenge pwo. Acho chuma cha kuvwisa lwaji. 23Kanda upomba ni kashitu ukalichise nenyi. Niumwe pwo kanda alihana kuli kashitu kupomba nenyi. Acho uhenge.
24Kanda nulichisa ni yuma yino niyimwe mumu akwa mavungu aze ngunaahumu kumeso jenu o halichisa nayo yeswe. 25Chocho chifuchi hachichisa mba hinaalambila uhenge wacho. Chifuchi hichasaza waze atwamamo. 26Alioze yenu fungenu yiyulo yami ni shimbi jami. Kanda nulinga yuma yo ya kuvwisa lwaji, chipwe mwenyembo, chipwe njize yoze watwama hakachi kenu. 27(Mumu yuma yino yeswe ya kuvwisa lwaji malunga akwa chifuchi alingile, waze nwawanyine, kashika chifuchi achichishile.) 28Kuchina chifuchi muchinusaza ha kuchichisa, ngwe chaasajile ayo akwa vungu lize nwawanyine. 29Mumu mweswawo malinga yino yuma ya kuvwisa lwaji, atu eswe akwa kuyilinga makaateta hakachi ka atu jo. 30Chocho fungenu shimbi yami ngwami, Nilimwe tangwa kanda nulinga ndako ja kuvwisa lwaji alingile waze atetekelele. Nilimwe tangwa kanda nulichisa najo. Yami Yehova Zambi yenu.
Currently Selected:
ULEVI 18: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
