HOZEA 13
13
1Ha kuhanjika Eframe, malunga achikimine;
wanangamine mu Izalele;
alioze wahile ha mulonga wa Mbale,
wafwile.
2Ni haliapwila kanaliwezela uvulumunyi weka ni weka
nikulilingila tuponya twa kuzuzulula,
ni mahamba a kulinga ni utotombo ni prata yo.
Yeswe, milimo ya yilangaji.
Shihilenu yitapo kuli wano ngwo,
Atu kakumbejala ana a ngombe!
3Kashika mapwa ngwe mbundu ya chimene;
hanji ngwe mume uze wakuma washi;
ngwe yizungu yize yakuhehuka ku chizungwilo
hanji ngwe mwishi unakatuka ku njanela.
4Yami nguli Yehova Zambi yenu chize ku chifuchi cha Engitu.
Kunwanyingikine Zambi niumwe shina yami,
kukushi niumwe chilamwina shina yami wika.
5Yami nanunyingikine mu puya,
mu chifuchi cha pwila.
6Alioze muze halia hakuta,
Mayuka, mba mbunge jo jalifujile;
kashika anguvulamine.
7Kashika ni yami mungupwa kuli ayo ngwe ndumba;
ngwe changwi mungujikinyina ku sesa lia jila.
8Mungwalundumukina ngwe ursu yoze hamwiya ana jenyi.
Mungwapula pambo;
kwenako mungwaha ngwe ndumba;
ngwe ngongo kakwapapulula.
9Enu A-Izalele mungunwonwona
mba iya manukwasa?
10Mwanangana wenu yoze manulamwina kulihi ali?
Alemu jenu akwa kunufunga—
waze nwambile ngwenu,
Twehe mwanangana ni alemu?
11Hinanwaha mianangana ni utenu wami,
mba hinaachiza ni ufwatulo wami.
12Uhenge wa Eframe haukasa;
shili yenyi hamutulikilayo.
13Misongo ya kumusema hiyamuheta,
alioze aye mwana keshi mana,
mumu haliapwila kasolo kupalika
ku utuhukilo wa chimbi.
14Mungwakula ku tachi ja Shiole?
Mungwahula ku kufwa?
Ena kufwa, yilungo ye yilihiyo?
Ena Shiole, kwonwona che Chilihicho?
Keke hiyanguswamina ku meso jami.
15Chipwe matatuka hakachi ka ayayo
hindu fuji ya ku Chivumbuko muyiza,
fuji ya kuli Yehova
ni kukatuka ku puya.
Mba shima lienyi muliuma;
fuji lienyi lia meya mulipwa lia chau.
Kumuyikahupa yuma yeswe yilemu
ku zuwo lienyi lia kutulikila upite.
16Samaria mambata uhie wenyi,
mumu hakatukila Zambi yenyi.
Makafwa ni katana,
ana jo akepe makaahwotola ku mitwe
ni tufumba two makaahangula.
Currently Selected:
HOZEA 13: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
