HOZEA 14
14
1Enu A-Izalele, hilukenu kuli Yehova Zambi yenu,
mumu hinwalimbuka ha mukunda wa uhenge wenu.
2Twalenu maliji
nukahiluke kuli Yehova nukambe kuli iye ngwenu,
Chiza kama uhenge weswe;
tambula kama chize chinapeme
mba mutukwaha mihuko ya mivumbo yetu.
3A-Asuria kechi kutulamwina;
kutuchi kwenda hali tuvwalu;
mba kutuchi kamba nawa ngwetu, Zambi yetu
ku yuma ya kulinga ni moko jetu.
Muli yena ana-ashiwa kakuwana keke.
4Mungukawuka kukokoloka cho;
mungukaazanga liakulu,
mumu utenu wami hiwatewuluka kuli ayo.
5Mungukapwa kuli A-Izalele ngwe mume
mba makatanda miji ngwe Lebano
nikutemuna yitemo ngwe lirio.
6Mitango yenyi muyikatanda;
upeme wenyi muupwa ngwe wa olevwe,
ni lupembo wenyi ngwe wa Lebano.
7Kumakahiluka, Kumakatwama mu chihuhumuke chenyi.
Kumakawaha ngwe chala;
kumakatemuna yitemo ngwe mutondo wa uva;
lupembo wenyi makapwa ngwe wa Lebano.
8Eframe makamba ngwenyi, Chika chinguliko ni mahamba nawa?
Ngunatá, ngunakuhulikila meso.
Nguli ngwe mutondo wa kupresu wa wisu,
mihuko ye yinakatuka kuli yami.
9Mweswe uli ni mana akase chinyingi yino yuma.
Mweswe kali ni meso yikamulumbunuke;
mumu majila ja Yehova kanapeme
kashika akwa ululi kakwendelamo;
alioze yitanguke malimbukilamo.
Currently Selected:
HOZEA 14: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
