HOZEA 11
11
1Muze Izalele wapwile mwana namuzangile.
Ku Engitu nasanyikine mwanami wa lunga.
2Cheswe nalikolezele kwasanyika
o yalikoleza kukatuka kuli yami.
Yawezela kushihila yitapo Ambale nikwochela insensu mahamba.
3Chipwe chocho yami mwene nalongesele Eframe kwenda.
Naakangayikine mu moko jami
hindu kanyingikine yami naawukile.
4Naasongwelele ni mihipu ya keke,
ni malenge a zango.
Nalumukine kuli ayo ngwe yoze
makokolola kanga ha mbangachi jo.
Nahetaminyine kuli ayo nikwalisa.
5Kumakahiluka nawa ku chifuchi cha Engitu,
alioze Ka-Asuria makapwa mwanangana wo,
mumu katayile kuhiluka kuli yami.
6Katana makatenukina yihunda yo,
nikumanununa njalo ja mapito jo ja yihunda,
nikwaonwona mu mbonge jo.
7Atu jami hasa mbunge jo akangwehuke,
kashika hinaafunjikila kanga
mba niumwe maachizayo.
8Ena Eframe, kuchi munguhasa kukwecha?
Ena Izalele, kuchi munguhasa kukukunjika?
Kuchi munguhasa kukupwisa ngwe Andama?
Kuchi mungukulinga ngwe Zepoime?
Mbunge yami kuyatayile muchima;
keke yami yinaliwezela chivukuminya ni vumbi.
9Chichi kulinga utenu wami usasu;
chichi kwonwona nawa Eframe.
Mumu nguli Zambi, hi nguli mutu ko,
yami mwe Musandu mukachi kenu,
kashika chichi keza mukwonwona.
10O kumakakaula Yehova,
mba iye makateta ngwe ndumba.
Ewa makateta
mba anenyi-a-malunga meza nikuchikima ni kukatuka ku Chitokelo.
11Makakatuka nikulipupwisa ngwe tujila ku Engitu,
ngwe tutele ku chifuchi cha Asuria mba mungwahilwisa ku mahio.
Chocho kanambe Yehova.
12Eframe hanangujingilika ni mahuza,
munyachi wa Izalele hanangujingilika ni kwonga.
Hindu Yunda kakwenda ni Zambi,
kakulalaminya kuli mwe Musandu.
Currently Selected:
HOZEA 11: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
