A-NGALASHIA 6
6
1Mandumbu, kachi mutu makwachika ni kapalia, yenu nuli akwa Spiritu, nukahilwise umwe ngwe yono ni mbunge ya kushimbika; nikukanyama yena mwene, kuchina ni yena nawa makuzeza. 2Limbachilenu yilemu umwe hali mukwo, ni chocho munumanununa shimbi ya Kristu. 3Mumu kachi mutu malishinginyeka kupwa chimwe, muze iye hi chimwe ko, mahonga iye mwene. 4Alioze mutu ni mutu akeseke chitanga chenyi mwene, chocho makapwa ni kulisamba chenyi ha kutwala kuli iye mwene wika, hi ha kutwala ku yuma ya mbala ko. 5Mumu mweswe kumambata chiteli chenyi mwene.
6Alioze yoze anamufumbu ni liji, akalianyine ni chifumbe ni yuma yeswe yipema.
7Kanda nulionga; Zambi keshi kulenvewa: mumu cheswacho mutu makuwa, chenacho kumakacha nawa. 8Yoze makuwa ku musunya wenyi mwene, ku musunya kumakacha kupola; alioze yoze makuwa kuli Spiritu, kuli Spiritu makacha mwono wa mutolo. 9Mba kanda tulezumuka ha kulinga kanawa; mumu ha mwaka wacho kumutukacha nyi kutuchi kakokoloka. 10Chocho kevwe, shimbu tuchili ni mwaka, tulingenu yipema kuli atu eswe, ni kuli akwa zuwo lia Ufulielo kuhiana chikolo.
11Talenu sona jipwapwa haha ngunasoneka kuli yenu ni kwoko lia yami mwene. 12Waze eswe akuzanga kulenga ni musunya, kakunushinjika akanupwise ngalami; chino wika, hanga kechi kamona yihungumiona mumu ha kulusu ya Kristu. 13Mumu chipwe waze matambula ungalami ayo ene keshi kufunga shimbi; alioze kanazange akanupwise ngalami, hanga akalisambe mu musunya wenu. 14Alioze kanda chikapwa kama kuli yami kulisamba shina mu kulusu ya Mwene Yesu Kristu, ku yenayo hanashihi yuma ya hashi kuli yami, ni yami hanangushihi ku yuma ya hashi. 15Mumu muli Kristu, chipwe ungalami kuushi ulemu chipwe ulima, ka, alioze chitanga chaha. 16Ni waze eswe akwenda nikulita ni cheseko chino, sambukila yikapwe hali ayo, ni keke, ni hali akwa Izalele ja Zambi.
17Chize ku haliapwila niumwe kanda akangupinjisa, mumu ngunambata ha mujimba wami yimbambili ya Mwene Yesu.
18Vumbi lia Mwene wetu Yesu Kristu likapwe hamwe ni maspiritu jenu, mandumbu. Amene.
Currently Selected:
A-NGALASHIA 6: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
