EZEKIEL 46
46
1Mwene Yehova kanambe ngwenyi, Chikolo cha yize ya muchima chize chatalikisa ku Chivumbuko muchipwa cha kwajila ha matangwa asambano a milimo, alioze ha tangwa lia Sambata machazulula ni ha tangwa lia kakweji mwaha machazulula. 2Mwe mulemu makanjilila ku senge lia chikolo cha haze, makamana kwe ku nguji lia chikolo. Asasendote makalambula mulambu wenyi wa kulumba, ni milambu yenyi ya sambukila, mba iye makawayila ku chikuli cha chikolo. Mba makatuhuka alioze kechi kajila chajilo ndo ngoloshi. 3Akwa chifuchi makawayila ku unjililo wa chikolo chize kumeso ja Yehova ha masambata ni ha kakweji mwaha. 4Mulambu wa kulumba uze mwe mulemu makalambula kuli Yehova ha tangwa lia Sambata muukapwa wa anamapanga asambano keshi chipa, ni kuji ya panga umuwika keshi chipa. 5Mulambu wa wunga wa mwe kuji ya panga muukapwa wa *efa yimuwika, ni mulambu wa wunga wa ana-mapanga muukapwa weswe makahasa hamwe ni *hine yimuwika ya maji ha efa ni efa. 6Ha tangwa lia kakweji mwaha makalambula chimbembe wa kuji keshi chipa, ni ana-mapanga asambano hamwe ni kuji ya panga, eswe keshi chipa. 7Ha mulambu wa wunga makahana *efa yimuwika ni mwe kuji ya ngombe, ni efa yimuwika ni mwe kuji ya panga, hamwe ni ana-mapanga weswe makahasa, hamwe ni *hine ya maji ha efa ni efa. 8Muze mwe mulemu makanjila, makanjilila ku senge lia chikolo, mba makatuhukila jila yize yene.
9Muze akwa chifuchi meza kumeso ja Yehova ha yiwanyino ya kufunjika, yoze manjilila ku chikolo cha ku Norte kuwayila, makatuhukila ku chikolo cha ku Sule; ni yoze makanjilila ku chikolo cha ku Sule makatuhukila ku chikolo cha ku Norte. Niumwe makahilukila ku chikolo chize anjilila, alioze mweswe makatuhukila ndusu kumeso jenyi. 10Muze makanjila mwe mulemu makanjila no, ni muze makatuhuka iye makatuhuka.
11Ku Yiwanyino ni miaka ya kufunjika mulambu wa wunga hamwe ni chimbembe wa kuji muukapwa wa *efa yimuwika, ni hamwe ni kuji ya panga *efa yimuwika. Hamwe ni ana-mapanga makahana wunga weswe mahasa, hamwe ni *hine ya maji ha efa ni efa. 12Muze mwe mulemu makahana mulambu wa mbunge upwe wa kulumba, hanji milambu ya sambukila ngwe mulambu wa mbunge kuli Yehova, chikolo chatalikisa ku Chivumbuko, makamwazulwilacho; mba makalambula mulambu wenyi wa kulumba hanji milambu yenyi ya sambukila chizechene ngwe kakuchihnga ha tangwa lia Sambata; mba makatuhuka, ni muze iye hatuhuka makajila chajilo.
13Makahana mwana-panga wa mwaka umuwika keshi chipa akapwe mulambu wa kulumba kuli Yehova tangwa ha tangwa. Tangwa ha tangwa ha chimene mamuhana. 14Makahana mulambu wa wunga hamwe nenyi tangwa ha tangwa; chihanda cha sambano cha *efa, ni chihanda cha yitatu cha *hine ya maji kuwulisa wunga ukapwe mulambu wa wunga kuli Yehova. Ye shimbi ya mulambu wa kulumba wa matangwa eswe yenayo. 15Chocho makahana mwana-panga, ni wunga, ni maji tangwa ha tangwa ha chimene ha mulambu wa kulumba wa matangwa eswe.
16Mwene Yehova kanambe ngwenyi, Nyi mwe mulemu makahana kuli umwe mwanenyi chawana cha ku chihinga chenyi, hichapwa nicho, upite wo wa kuhinga. 17Alioze nyi makahana chawana cha ku chihinga chenyi kuli umwe ngamba yenyi, muchikapwa nichenyi ndo ku mwaka wa kutusuka, mba muchikahiluka kuli mwe mulemu. Ana jenyi wika mahasa kuzuka chawana cha ku chihinga chenyi. 18Mulemu kechi katambula chihinga cha umwe mutu ni kumuchiza ku upite wenyi. Makahingisa ana jenyi a malunga ku upite wenyi mwene, chocho niumwe wa atu jami mamutambula upite wenyi.
19Mba yanguneha ku unjililo uze uli ku lumbu lia chikolo ku mukala wa yipatulo yisandu ya ku Norte ya asasendote, kwenako namwene kuma kumwe kwe ku songo liayo lia ku Chitokelo. 20Aye yamba kuli yami ngwenyi, Kuno kwene asasendote makateleka mulambu wa uhie ni mulambu ha shili, ni kuno nawa makocha mulambu wa wunga, mumu kechi kayineha mu yize ya haze akajilike e atu.
21Mba yanguneha ku yize ya haze, yangutwala ku mbango jiwana ja yize. Mu mbango yeswe ya yize mwapwile kayize nawa— 22mu mbango jiwana ja yize mwapwile tuyize nawa twa makumi awana a mbandu ha usuhe ni makumi atatu a mbandu ha utohe. Tweswe tuwana twa cheseko chimuwika. 23Muchima, mwa kujingilika tuyize tuwana, kamwe ha kamwe, mwapwile mukala wa mawe ni majiko a kutunga kushi lia mikala ya kujingilika. 24Henaho yamba kuli yami ngwenyi, E mazuwo a kutetekela wano; kuno akwa kuvumbika mu tembele makateleka yitapo ya atu.
Currently Selected:
EZEKIEL 46: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
