EZEKIEL 45
45
1Ha kulitetela chifuchi ha yihinga, munukasela kuli Yehova chihanda cha chifuchi chikapwe mulambu usandu. Usuhe wacho muukapwa wa makumi aali a tununu ni tununu atano a mbungu, ni utohe wacho wa makumi aali a tununu. Muchikapwa chisandu ndusu mu njiza yacho yeswe. 2Ku chihanda chino mukupwa chihela cha mbango jiwana; usuhe kulakaji atano ni utohe kulakaji atano, chihela cha tembele, ni njiza ya makumi atano a mbandu kweswe kwa kujingilika. 3Ha chihela chisandu munukeseka chihanda cha makumi aali a tununu ni tununu atano ha usuhe, ni kumi lia tununu ha utohe. Mwenamo mumukatwama lie zuwo lisandu, Hapwa lisandu kuhiana. 4Chino muchikapwa chihela chisandu cha chifuchi. Muchikapwa cha asasendote waze akuvumbika mu zuwo lisandu ni kukundama kuli Yehova amuvumbike. Muchikapwa nawa chihela cha mazuwo jo ni chihela chisandu cha zuwo lisandu. 5Chihanda chikwo cha makumi aali a tununu ni tununu atano ha usuhe ni kumi lia tununu ha utohe muchikapwa cha A-Levi, tuvumbi twa mu zuwo, chikapwe nicho cha mazuwo a kutwamamo.
6Ha kulihata ni chihela cha mulambu usandu munukasela ha chihinga cha chihunda chimwe chihela cha tununu atano ha utohe ni makumi aali a tununu ni tununu atano ha usuhe, chikapwe hali akwa munyachi wa Izalele eswe.
7Cha mwe mulemu muchikapwa sali ni sali lia mulambu usandu ni chihinga cha chihunda, cha kusulangana ni chihela chisandu ni chihinga cha chihunda ha sali lia ku Chitokelo ni sali lia ku Chivumbuko, nikulita ni usuhe wa chihinga cha munyachi umuwika chize ku Chitokelo ndo ku Chivumbuko ku njiza ya chifuchi. 8Chino muchikapwa nichenyi mu Izalele. Mba alemu jami kechi kapinjisa nawa atu jami, alioze makecha akwa munyachi wa Izalele kuzuka chifuchi nikulita ni minyachi yo.
9Mwene Yehova kanambe ngwenyi, Kunahu, enu alemu ja Izalele! Mbilenu upupilo ni upinjiso, nukapatule nikulita ni ululi. Mwene Yehova kanambe ngwenyi, Litwaminenu kufwetesa atu jami chocho.
10Munukapwa ni mbalansa ja ululi, ni njongo ya *efa ya ululi, ni njongo ya *mbate ya ululi. 11*Efa ni *mbate muyikapwa ya cheseko chimuwika. Mbate muyikapwa chihanda cha kumi cha *homere, ni efa nawa chihanda cha kumi cha homere. Ye homere muyikapwa chinyingi cha kuzonga nacho. 12Shekele muyikapwa ya makumi aali a ngera; shekele jitano mujikapwa shekele jitano, ni shekele kumi mujikapwa shekele kumi, ni mina yenu muyikapwa ya makumi atano a shekele.
13Mulambu munutambula uno: chihanda cha sambano cha *efa ha *homere yeswe ya tiliku; ni chihanda cha sambano cha efa ha homere yeswe ya sevada. 14Chihanda cha kufunjika cha maji muchikapwa chihanda cha kumi cha mbate ku *kore ni kore. Kore, ngwami, kumi lia *mbate, chinalumbunuka homere, mumu kumi lia mbate chapwa homere. 15Ni panga umuwika ha chendo cha kulakaji aali, a ku kelo jipema ja Izalele. Uno wapwa mulambu wa wunga, ni milambu ya kulumba, ni milambu ya sambukila yikaakukile. Chocho kanambe Mwene Yehova. 16Atu eswe a mu chifuchi makahana mulambu uno kuli mwe mulemu wa mu Izalele. 17Mba mulemu aye makamona milambu ya kulumba, ni milambu ya wunga, ni milambu ya kunwa, ha yiwanyino, ni kakweji mwaha ni masambata, yiwanyino yeswe ya kufunjika kuli akwa munyachi wa Izalele. Aye makahana milambu ha shili, ni milambu ya wunga, ni milambu ya kulumba, ni milambu ya sambukila akakukile akwa munyachi wa Izalele.
18Mwene Yehova kanambe ngwenyi, Ha kakweji mutangu, ni tangwa litangu lia kakweji, munukanda chimbembe wa kuji keshi chipa nukapemese zuwo lisandu. 19Sasendote makatambula amwe manyinga a mulambu ha shili akaakomone ha yikuli ya tembele, ni ha mbango jiwana ja mukomo wa chilumbilo, ni ha yikuli ya chikolo cha yize ya muchima. 20Munukalinga chimuwika ha tangwa liamuchishimbiali lia kakweji hali mweswawo yoze havulumuna ha kulweza hanji ha kwalajala. Chocho munukakukila tembele.
21Ha kakweji mutangu, ha tangwa kumi ni liamuchiwana lia kakweji, munukalia chiwanyino cha Chizomboka mba ha matangwa shimbiali munukalia mbolo kuyishi futunwiso. 22Ha tangwa lize mwe mulemu makahana hali iye mwene ni hali atu eswe a chifuchi chimbembe wa kuji akapwe mulambu ha shili. 23Mba ha matangwa shimbiali a chiwanyino makahana yimbembe a kuji shimbiali ni kuji a mapanga shimbiali keshi chipa akapwe mulambu wa kulumba kuli Yehova tangwa ha tangwa ha matangwa shimbiali, ni kuji ya pembe akapwe mulambu ha shili. 24Makahana nawa mulambu wa wunga, *efa yimuwika ha chimbembe mweswe, ni efa yimuwika ha kuji ya panga mweswe. Ha efa ni efa makahana *hine yimuwika ya maji. 25Ha kakweji wamuchishimbiali ni ha tangwa kumi ni liamuchitano lia kakweji, ni ha matangwa shimbiali a chiwanyino makalulika chizechene ha milambu ha shili, ni milambu ya kulumba, ni milambu ya wunga, ni ha maji.
Currently Selected:
EZEKIEL 45: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
