EZEKIEL 47
47
1Yanguneha nawa ku chikolo cha tembele, kumanyi meya anatuhuka kushi lia chikuli cha tembele nikutalikisa ku Chivumbuko (mumu te tembele yinatalikisa ku Chivumbuko). E meya kanakatuka kushi lia chikuli cha tembele ku songo lia ku Sule; te sali lia chilumbilo lia ku Sule. 2Yanguneha haze ku jila ya chikolo cha ku Norte, yangujingisa haze ku chikolo cha haze chize cha kutalikisa ku Chivumbuko. E meya kanatuhukila sali lia ku Sule.
3Mwe lunga kanayi nikutalikisa ku Chivumbuko ni muhipu mu kwoko lienyi; yeseka kanunu ka mbandu mba yangusongwela ndusu mu meya, meya ndo ku tusendengele. 4Cheka nawa yeseka kanunu mba yangusongwela ndusu mu meya, meya ndo ku makungunwa. Cheka nawa yeseka kanunu mba yangusongwela ndusu mu meya, meya ndo ku zalilo. 5Cheka nawa yeseka kanunu, mba hapwa lwiji, Chahashile kuzauka mumu meya hapwa anji; meya a kusanyikinamo; lwiji mutu kechi kuhasa kuzauka ha mwa. 6Aye yamba kuli yami ngwenyi, Mwana mutu, hiwamona chuma chino nyi?
Mba yangutwala ni kunguhilwisa ha mbumbulu ya lwiji. 7Ha kuya yingumona ha mbumbulu ya lwiji mitondo yinji chikolo sali ni sali. 8Aye yamba kuli yami ngwenyi, Meya wano kanende nikutalikisa ku chifuchi cha Chivumbuko, mba mapalumuka ku Arapa. E meya wano atuhukile kuze manjila mu kalunga-lwiji, mba makayemesa meya jamo. 9Kweswako lwiji matalikisa tushitu eswe akulisunga matwama ni mwono. Kumukupwa nawa yishi anji, mumu meya wano kanayiko hanga meya a kalunga-lwiji akayeme, hanga yuma yeswe yikapwe ni mwono kuze lwiji anayi. 10Akwa kutela yishi makamanyina ku kalunga-lwiji. Chize ku Engedi ndo ku Eneglame mukupwa chihela cha kwanyikina manda. Yishi jako makapwa a milali yeka ni yeka, ngwe yishi a ku Kalunga-lwiji Munene. 11Alioze matenga jako ni yitende yako kuyichi kwalumuka yiyema; muyikasala ya mungwa. 12Ha mbumbulu, sali ni sali lia lwiji, kumukupwa milali yeswe ya mitondo ya kulia. Mafwo jayo kechi koma, chipwe mihuko* yayo kuyichi kahona, alioze muyikema mihuko ya wisu kakweji ha kakweji, mumu meya jayo anakatuka ku zuwo lisandu. Mihuko yayo muyikapwa ya kulia, ni mafwo jayo makapwa ha kuwuka.
13Mwene Yehova kanambe ngwenyi, Jino je njiza munuhandununa najo che chifuchi ha yihinga hakachi ka kumi lia minyachi ni minyachi yiali ya Izalele. José akapwe ni yihanda yiali. 14Munukachiteta ni katonde keshiko. Nalishingile ni tulamba twenu kwaahacho, kashika chifuchi chino muchipwa nichenu cha chihinga.
15Njiza ya chifuchi yino: Sali lia ku Norte, chize ku Kalunga-lwiji Munene ndusu ku Hetelone ku unjililo wa Hamate, ndusu ku Zedade, 16ni Berota, ni Sibrame (yili ha njiza hakachi ka Ndamaseku ni Hamate) ndo ku Haza-hatikone yize yili ha njiza ya Haurana. 17Chocho njiza muyipalika chize ku kalunga-lwiji ndo ku Haza-Ena yize yili ha njiza ya Ndamaseku ku Norte, ni njiza ya Hamate ku Norte. Ye njiza ya ku Norte yenayo.
18Sali lia ku Chivumbuko njiza muyikatuka ku Hazare-enone hakachi ka Haurana ni Ndamaseku. Muyilisesa ni Yordau hakachi ka Ngiliate ni chifuchi cha Izalele, ndo ku Kalunga-lwiji wa ku Chivumbuko ndo ku Tamare. Ye njiza ya ku Chivumbuko yenayo.
19Ha sali lia ku Sule muyikatuka ku Tama ndo ku meya a Meripa-Kandeshe, mba kulisesa ni lwiji wa Engitu ndo ku Kalunga-lwiji Munene. Ye njiza ya ku Sule yenayo.
20Ha sali lia ku Chitokelo Kalunga-lwiji Munene mapwa njiza ndo kuze kwalitalangana ni unjililo wa Hamate. Ye njiza ya ku Chitokelo yenayo.
21Chocho munulitetela chifuchi hakachi kenu nikulita ni minyachi ya Izalele. 22Munuliselacho chihinga kuli yenwene ni kuli yilambala waze hanatungu ni yenu, hanaseme ana hakachi kenu. O makapwa kuli yenu ngwe A-Izalele a chisemuko. Munukaasela chihinga hamwe ni yenu hakachi ka minyachi ya Izalele. 23Munukasela mwe chilambala chihinga chenyi mu munyachi uze atwama. Chocho kanambe Mwene Yehova.
Currently Selected:
EZEKIEL 47: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
