KUTUHUKA 28
28
1Ukakundamise kuli yena yayenu Arone ni ana jenyi a malunga hamwe nenyi, kwachiza kuli A-Izalele hanga iye akangulingile usasendote; ni Arone, ni Nandambe, ni Ambihu, ni Elieza, ni Itama, eswe te ana a malunga a Arone. 2Ukatongele yayenu Arone mazalo asandu, akapwe a ulemu, a upeme. 3Ukahanjike ni atu eswe akwete mana, waze hinaazalisa ni Spiritu ya mana, akatonge mazalo a Arone akamusele ku usandu hanga iye akangulingile milimo ya usasendote. 4Mazalo matonga wano; ni chipwiko, ni efode, ni hina lia ngungu, ni chikuto cha milimo ya kwola ya uhenya, ni kapusa, ni muya wa ponda; akatongele yayenu Arone ni ana jenyi a malunga mazalo asandu hanga iye akangulingile usasendote.
5O akande oru ni mahina alauluka, ni a ufungo, ni a ngengu, ni apema atoma. 6Akalinge ye efode ya oru ni ya hina lilauluka, ni lia ufungo, ni lia ngengu, ni lipema litoma, chitanga cha chilangaji. 7Efode yikapwe ni yipaya yiali ya kutolokenya ku masongo jayo aali; akapwe a kutolokenya. 8We muya wa ponda wa ulangaji uliho wa kumujichikila ukapwe wa milimo yimuwika ni hina limuwika, te wa oru ni wa hina lilauluka, ni lia ufungo, ni lia ngengu, ni lipema litoma. 9Ukande nawa mawe aali a sardonica, ukoleho majina ja ana a Izalele. 10Majina ja asambano akapwe ha liwe limuwika, mba majina ja asambano alisalako akapwe ha liwe likwo nikulita ni kusemuka cho. 11Ukole e mawe aali ni milimo ya mukwa kwola ha mawe, ngwe mola ha kazeya nikulita ni majina ja ana a Izalele. Ukaanjise mu maselo ja oru. 12Ukanangike e mawe aali ha yipaya ya ye efode, akapwe mawe a Chiwulwiso hali A-Izalele. Arone akambate majina jo kumeso ja Yehova ha yipaya yenyi yiali, akapwe Chiwulwiso. 13Ukafule maselo ja oru. 14Ukafule nawa malenge aali a oru ya kusayisa, nikwafula ngwe mihipu ya kuhosa. Ukanunge e malenge a kuhosa ha maselo.
15Ukalinge chipwiko cha upatwilo, chitanga cha chilangaji. Ukachilinge cha kulifwa ni milimo ya ku ye efode, cha oru, ni cha hina lilauluka, ni lia ufungo, ni lia ngengu, ni lipema litoma. 16Chikapwe ni ukundwilo uwana weswe wa usuhe umuwika ndwa, cha kupama. Usuhe wacho wa chikambakamba chimuwika. Utohe wacho wa chikambakamba chimuwika. 17Ukanjise mawe mu yituwa yacho, mikala yiwana ya mawe. Mukala utangu wa mawe a sartiu, ni topajiu, ni carbunkulu. 18Mukala wamuchiali wa esmeralda, ni safwira, ni diamante. 19Mukala wamuchitatu wa jasendu, ni agata, ni ametita. 20Mukala wamuchiwana wa turkeza, ni sardonica, ni jasepe. Ukaasele mu maselo jo ja oru. 21E mawe akalite ni majina ja ana a Izalele, kumi lia mawe ni mawe aali nikulita ni majina jo, ngwe kwola cha ha kazeya, vungu ni vungu nikulita ni jina lialio. Akapwe a mavungu kumi ni aali. 22Ukafulile che chipwiko malenge aali a oru ya kusayisa, ngwe mihipu ya kuhosa. 23Ukafulile chipwiko ngo jiali ja oru nikujisela ku masongo aali a chipwiko. 24Ukanjise malenge aali a oru a kuhosa mu ngo jiali jize jatwama ku masongo aali a chipwiko. 25Masongo aali akwo a malenge aali a kuhosa ukanjise mu maselo aali mba hikwasa kuze kulutwe ha yipaya yiali ya ye efode. 26Ukafule ngo jiali ja oru, ukajisele ku masongo aali a chipwiko ha ukundwilo wacho wa muchima uze walihata ni ye efode. 27Ukafule nawa ngo jiali ja oru mba hikujisa kulutwe ha chihanda chize cha kushi cha yipaya yiali ya ye efode kusulangana ni unungino wayo helu lia we muya wa ponda wa ulangaji wa efode. 28Akakashile che chipwiko ku ngo jacho ni ku ngo ja efode ni wanda ulauluka hanga chikapwe ha muya wa ponda wa ulangaji wa ku efode, hanga chipwiko kuchichi kukasuluka ku ye efode. 29Arone akambate majina ja A-Izalele ku chipwiko cha upatwilo ha mbunge yenyi, muze manjila muma musandu, chikapwe Chiwulwiso kumeso ja Yehova matangwa eswe. 30Ukase nawa mu chipwiko cha upatwilo Urimi ni Tumimi, yikapwe ha mbunge ya Arone muze manjila kumeso ja Yehova. Arone akambate ha mbunge yenyi upatwilo wa A-Izalele kumeso ja Yehova matangwa eswe.
31Ukatonge hina lia ngungu lia efode lieswe lukombo lilauluka. 32Likapwe ni chituwa cha mutwe mukachi. Likapwe ni lupula wa kuseleka wa kujingilika che chituwa chalio, ngwe chituwa cha ku chikuto cha utale hanga kulichi katanuka. 33Ha lupula uli ku songo lialio ukatongeleho romana jilauluka, ni ja ufungo, ni ja ngengu, ja kusowela ni yiwolowolo ya oru ha kujingilika lupula mweswe. 34Chiwolowolo cha oru ni romana, chiwolowolo cha oru ni romana ha lupula wa hina lia ngungu, ha kujingilika kweswe. 35Mba Arone akalizale ha kuvumbika. Liji liacho mulikahiohia muze manjila muma musandu kumeso ja Yehova ni muze matuhuka, kuchina iye mafwa.
36Ukafule chipenya cha oru ya kusayisa. Ukoleho ngwe kwola cha ha kazeya, ngwo, MUSANDU KULI YEHOVA. 37Ukachikashile ha kapusa ni wanda ulauluka, chikapwe kulutwe ha mwe kapusa. 38Chikapwe ha huma lia Arone. Arone akambate uhenge wa yuma yisandu, yenayo A-Izalele makayisela ku usandu ku yawana yo yeswe yisandu. Chikapwe ha huma lienyi matangwa eswe hanga akaatambule kumeso ja Yehova.
39Ukatonge chikuto cha hina lipema litoma. Ukatonge nawa kapusa ni hina lipema litoma. Ukatonge muya wa ponda, milimo ya mukwa kwola.
40Ukatongele ana a malunga a Arone yikuto. Ukaatongele nawa miya ya ponda ni tupusa asuku ukaatongele, a ulemu, a upeme. 41Ukajikeyo yayenu Arone ni ana jenyi a malunga. Ukaawayise ni maji. Ukaasele ku uvumbiko. Ukaasele usandu hanga akangulingile usasendote. 42Ukaatongele kaputula wa hina lipema litoma, akafuke nenyi uselesele wa mijimba yo, chize ku mitanda akahete ndo ku shina lia kulu. 43Arone ni ana jenyi a malunga akamuzale muze manjila mu mbalaka ya chikungulwila hanji muze makundama ku chilumbilo mukuvumbika muma musandu, kuchina mambata uhenge mba mafwa. Chikapwe chiyulo ndo ku miaka ya mutolo hali iye ni hali ana jenyi kulutwe lienyi.
Currently Selected:
KUTUHUKA 28: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
