KUTUHUKA 29
29
1Chuma mulinga kuli ayo mukwasela ku usandu, mukungulingila usasendote, chino, ngwami, Tongola kuji ya ngombe chimbembe, ni kuji aali a mapanga keshi chipa, 2ni mbolo kuyishi futunwiso, ni yandanda ya kuchinga ni maji, kuyishi futunwiso, ni malikemba alelu, keshi futunwiso, a kulembula ni maji. Ukayichike ni wunga wafufunuka wa tiliku. 3Ukayise mu mutonga umuwika nikuyineha mu mutonga hamwe ni mwe kuji ya ngombe, ni e kuji aali a mapanga. 4Arone ni ana jenyi a malunga ukaahetese ku chikolo cha mbalaka ya chikungulwila. Ukaasanyise meya. 5Ukande mazalo, ukajike Arone chikuto, ni hina lia ngungu lia efode, ni ye efode, ni chipwiko. Ukamujichike ni muya wa ponda wa ulangaji wa ye efode. 6Ukase kapusa ha mutwe wenyi mba hikunangika chipenya chisandu ha mwe kapusa. 7Hohene Ukande maji a kuwayisa no, ukaazuze ha mutwe wenyi, ukamuwayise no. 8Ukasake ana jenyi a malunga, ukaajike yikuto. 9Ukaajichike miya ya ponda ni Arone ni ana jenyi a malunga. Ukase tupusa asuku ha mitwe yo mba o makazuka usasendote ku chiyulo cha mutolo. Ukatumbikile Arone ni ana jenyi a malunga ku uvumbiko.
10Utwale mwe kuji ya ngombe kulutwe lia mbalaka ya chikungulwila. Arone ni ana jenyi a malunga asayike moko jo ha mutwe wa mwe kuji ya ngombe. 11Ushihe mwe kuji ya ngombe kumeso ja Yehova ku chikolo cha mbalaka ya chikungulwila. 12Ukachize ku manyinga a mwe kuji ya ngombe ukakomone ha mbinga ja chilumbilo ni munwe we. Ukazujile manyinga eswe ku shina lia chilumbilo. 13Ukachize maji eswe ku yingambiangambia yenyi ya muchima, ni maji a ha liayi, ni njiso jiali ni maji jaho, ukayilumbe ha chilumbilo. 14Alioze yifwo ya mwe kuji ya ngombe, ni kupu lienyi, ni ufwachi wenyi ukayoche ni kahia haze lia chilombo. Kapwa mulambu ha shili.
15Utwale nawa mwe kuji ya panga, Arone ni ana jenyi a malunga asayike moko jo ha mutwe wa mwe kuji ya panga. 16Ushihe kuji ya panga mba utwale manyinga jenyi wasapwile kwa kujingilika ha chilumbilo. 17Utete mwe kuji ya panga mu yihanda yenyi nikukosa yingambiangambia yenyi ya muchima, ni molu, ni yilama yenyi, hikuyilumbika hamwe ni yihanda yenyi ni hamwe ni mutwe wenyi. 18Ukalumbe kuji ya panga mweswe ha chilumbilo. Chapwa mulambu wa kulumba kuli Yehova. Lupembo mupema. Mulambu wa kwocha ni kahia kuli Yehova.
19Utwale mwe kuji ya panga mukwo; Arone ni ana jenyi a malunga asayike moko jo ha mutwe wa mwe kuji ya panga. 20Hohene ushihe mwe kuji ya panga, utwale manyinga jenyi hikukomona ha songo lia twitwi lia chindume lia Arone ni ha songo lia matwi a chindume a ana jenyi a malunga ni ha minwe ya shina ya moko jo a chindume, ni ha minwe ya shina ya molu jo a chindume. Usapwile e manyinga ha chilumbilo kwa kujingilika kweswe. 21Uchize ku manyinga ali ha chilumbilo ni ku maji a kuwayisa no, wasapwile hali Arone, ni ha mazalo jenyi, ni hali ana jenyi a malunga, ni ha mazalo a ana jenyi a malunga hamwe nenyi. Umusele usandu ni mazalo jenyi, ni ana jenyi a malunga, ni mazalo a ana jenyi a malunga.
22Ukande nawa maji a mwe kuji ya panga ni muchila wa maji, ni maji ali ku yingambiangambia ya muchima, ni maji a ha liayi, ni njiso jiali, ni maji jaho, ni chilama cha chindume, mumu iye kuji ya panga wa kwatumbikila ku uvumbiko. 23Ukachize ku mutonga wa mbolo kuyishi futunwiso watwama kumeso ja Yehova, mbolo yimuwika, ni chandanda chimuwika cha mbolo ya kulembula ni maji, ni likemba limuwika. 24Ukatumbike yeswe lukombo ha moko ja Arone ni ha moko ja ana jenyi a malunga. Ukayihungise yikapwe mulambu wa kuhungisa kumeso ja Yehova. 25Ukayichize ku moko jo hikuyilumba ha chilumbilo ya kunangika ha mulambu wa kulumba, yikapwe lupembo mupema kumeso ja Yehova. Kuwapwa mulambu wa kwocha ni kahia kuli Yehova.
26Ukande nawa pambo lia kuji ya panga yoze wa kutumbikila Arone ku uvumbiko, ukalihungise likapwe mulambu wa kuhungisa kumeso ja Yehova. Mba mulipwa chitundo che. 27Lie pambo lia mulambu wa kuhungisa ukalisele ku usandu ni chilama cha mulambu wa kuzundula cha kuhungisa, cha kuzundula cha ku kuji ya panga wa kwatumbikila ku uvumbiko te kuli yoze wapwa hali Arone ni kuli yoze wapwa hali ana jenyi a malunga. 28Yikapwe ya Arone ni ana jenyi a malunga ya kuli A-Izalele ni chiyulo cha mutolo. Kuwapwa mulambu wa kuzundula. Ukapwe mulambu wa kuzundula wa kuli A-Izalele wa ku milambu yo ya sambukila te milambu yo ya kuzundula kuli Yehova.
29Mazalo asandu a Arone akapwe hali ana jenyi a malunga kulutwe lienyi, ha kwazala akaawayise ni maji, akaatumbikile no ku uvumbiko. 30Mwanenyi wa lunga mapwa sasendote ha kumusalakana akaazale matangwa shimbiali muze manjila mu mbalaka ya chikungulwila mukuvumbikila muma musandu.
31Ukatwale mwe kuji ya panga wa kwatumbikila ku uvumbiko, mba yifwo yenyi ukayitelekele kumwe kuma kusandu. 32Ye yifwo ya kuji ya panga ni mbolo yili mu mutonga, Arone ni ana jenyi a malunga akayilile ku chikolo cha mbalaka ya chikungulwila. 33Akalie yuma ya kufuka nayo shili, mukwatumbikila ku uvumbiko, mukwasela ku usandu. Chilambala kanda akaliako, mumu kuyapwa yisandu. 34Mba nyi yifwo yimwe ya kwatumbikila ku uvumbiko, hanji mbolo yimwe muyilisalaho ndo mu kucha, ukoche ni kahia yize yalisalaho. Kanda akayilia mumu kuyapwa yisandu.
35Ukalinge chocho kuli Arone ni kuli ana jenyi a malunga nikulita ni yize yeswe hinakwamba. Ukaatumbikile ku uvumbiko matangwa shimbiali. 36Tangwa ha tangwa ukatambule kuji ya ngombe ha shili, ha kufuka. Ukapemese chilumbilo ha kutwala ku shili ha kuchifuka, ukachiwayise ni maji mukuchisela ku usandu. 37Ukafuke che chilumbilo matangwa shimbiali, ukachisele ku usandu. Chilumbilo chikapwe chisandu chahiana. Yeswayo muyikwata ku chilumbilo yikapwe yisandu.
38Chuma mulambwila ha chilumbilo chino, ana a mapanga aali a mwaka Umuwika, kwalambula tangwa ha tangwa, matangwa eswe. 39Mwana-panga umuwika ukamulambule ha chimene, mba mwana-panga mukwo ukamulambule ha chingoloshi. 40Hamwe ni mwana-panga umwe ukatambule chihanda chimuwika cha ku kumi lia yihanda ya wunga wafufunuka, cha kuchinga ni chihanda chimuwika cha ku yihanda yiwana ya *hine ya maji a kusohola ni chihanda chimuwika cha ku yihanda yiwana ya *hine ya vinyu, yikapwe mulambu wa kunwa. 41Mba mwana-panga mukwo ukamulambule ha chingoloshi. Ukalinge nenyi nikulita ni mulambu wa wunga wa chimene, nikulita ni mulambu wa kunwa, akapwe lupembo mupema, mulambu wa kwocha ni kahia kuli Yehova. 42Akapwe mulambu wa kulumba wa matangwa eswe ndusu yisemuko yenu, ku chikolo cha mbalaka ya chikungulwila, kumeso ja Yehova, kuze mungukatakana ni yenu mukuhanjikilako ni yenu. 43Kuze mungukatakana ni A-Izalele. Ulemu wami muukapwisa yisandu ye mbalaka. 44Mungukapwisa yisandu mbalaka ya chikungulwila ni chilumbilo nawa. Arone ni ana jenyi a malunga nawa mungwasela ku usandu, akangulingile usasendote. 45Kumungukatwama hakachi ka A-Izalele. Kumungukapwa Zambi yo. 46O kumakanyingika ngwo, Mwe Yehova Zambi yetu, watuchijile ku chifuchi cha Engitu, hanga akatwame hakachi ketu. Ngwami, Yami Yehova, Zambi yo.
Currently Selected:
KUTUHUKA 29: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
