MUKANDA WA A-EFWESU 3
3
1Ha chikuma chino yami Paulu, funge ya Kristu Yesu mumu hali yenu akwa mavungu, 2kachi nwevwile ha uselo wa vumbi lia Zambi uze hanangwehe hali yenu; 3ngwe ku usolwelo angunyingikishine chijimbikilo, nikulita ngwe nasonekene kulu ni maliji akehe, 4hanga muze munutanga, malinjekela jami mu chijimbikilo cha Kristu akanulumbunuke; 5chize ha yisemuko yikwo kachisolwele kuli ana ja atu, ngwe haliapwila hanachisolola kuli apostolo jenyi asandu, ni aprofeta, muli Spiritu. 6Ngwo, Akwa mavungu kanapu maswana-ni-akwo, ni yihanda-ni-yikwo ya mujimba umuwika, ni akwa kuliangana-ni-akwo cha chilakenyo muli Kristu Yesu ku sango lipema.
7Ha lienalio angupwishile kavumbi, nikulita ni chawana cha vumbi lia Zambi lize anguhele, nikulita ni kulinga cha tachi jenyi. 8Kuli yami, nguli mukepekepe Wahiana eswe wa kuli asandu eswe, hanangwehe vumbi lino, kwambujola hakachi ka akwa mavungu sango lipema lia upite wa Kristu, uze niumwe mahasa kuunyingika; 9ngukalweze atu eswe uze wapwa uselo wa chijimbikilo, chahengamine chize ku miakulwila muli Zambi, yoze watangile yuma yeswe; 10hanga haliapwila akanyingikise mawanangana ni yiyulo mu malilu, ku chikungulwila, milali yeka ni yeka ya mana a Zambi. 11Nikulita ni kupala chize cha ku miaka ya mutolo, chize apalile kulinga muli Kristu Yesu Mwene wetu; 12muli iye, hamu tuli nalio, ni unjililo mukujikiza ku Ufulielo kuli iye. 13Kashika ngunanuhinjila ngwami, Kanda nulezumuka ha luyinda wami hali yenu, mwenawo uhenya wenu.
14Ha chikuma chino nakuumba makungunwa jami kuli Tato ya Mwene wetu Yesu Kristu, 15yoze hali iye minyachi yeswe, mwilu ni hashi hanayiluku majina, 16hanga akanwehe, nikulita ni kulumbama cha uhenya wenyi, kunutakamisa ni tachi kuli Spiritu yenyi muli mutu wa muchima; 17hanga Kristu akatwame mu mbunge jenu ku Ufulielo; hanga yenu nikutanda miji, nukajikize mu zango; 18nukahase kunyingika hamwe ni asandu eswe uze wapwa utohe, ni usuhe, ni usuku kwilu, ni usuku kushi, 19nikunyingika zango lia Kristu, lize Kakuhiana yinyingi, hanga nukazale tò ndo ku kuzala cheswe cha Zambi.
20Haliapwila kuli yoze wakuhasa kulinga kuhiana chikolo chize cheswe mutwita, hanji mutunyonga, nikulita ni tachi jize jakulinga muli yetu, 21uhenya upwe kuli iye, mu chikungulwila ni muli Kristu Yesu ndo ku yisemuko yeswe ku miaka ya mutolo. Amene.
Currently Selected:
MUKANDA WA A-EFWESU 3: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
