MUKANDA WA A-EFWESU 4
4
1Yami kashika, funge muli Mwene, ngunaliumbu kuli yenu, nukende ngwe chinatela kutambika chize hananutambika nacho, 2ni mbunge yeswe ya kulikehesa, ni umbovu, hamwe ni uhomboloji, nikulihumikiza umwe kuli mukwo mu zango, 3nukalipupwise kufunga kununga cha Spiritu ni muya wa sambukila. 4Kuuli mujimba umuwika, ni Spiritu umuwika, ngwe hananutambika mu kutalatala chimuwika cha kutambika chize anutambikile nacho; 5Mwene umuwika, Ufulielo umuwika, upapachiso umuwika; 6Zambi umuwika, Tato ya eswe, yoze uli helu lia eswe, ni kuli eswe, ni muli yetu eswe. 7Alioze kuli mweswe hakachi ketu hanatwehe vumbi, nikulita ni njongo ya chawana cha Kristu. 8Kashika kanambe ngwenyi,
Muze azezukile kwilu, wafungile funge anji,
wahanyine yawana kuli atu.
9(Achi, ha kwamba ngwo, Wazezukile, kuchi shina hatangu wahulumukine nawa mu yihanda ya kushi ya hashi? 10Yoze wahulumukine mwenawo wazezukile nawa helu lia malilu eswe, hanga akazalise yuma yeswe.) 11Iye hanahana amwe apostolo; ni amwe aprofeta; ni amwe akwa kwambujola; ni amwe tulayi ni alongeshi; 12kululika asandu ha milimo ya uvumbiko, mukukolesa mujimba wa Kristu, 13ndo yetu eswe mutuheta ku kununga cha Ufulielo, ni ku chinyingi cha mwe Mwana Zambi, kuli mutu mungunu, ku cheseko cha Chizundamo cha kuzala tò cha Kristu: 14hanga kutuchi kapwa ana-akemba nawa, ngwe tukahunguke ni mikanya ni kuhungumioka kweka ni kweka ni fuji yeswe ya longeso, ku kwonga cha atu ni unjiliji nikulita ni maliji a kuhengesa; 15alioze nikukakaminya ku umwenemwene mu zango, tukatatuke ni yuma yeswe kuli mwe mutwe, iye Kristu. 16Kuli iye we mujimba weswe wakusepekenya nikununga, ni chize makonekeno eswe akuhana, nikulita ni cheseko cha kulinga cha chihanda cheswe, chakuweza ku kulitatwisa cha mujimba wene mu zango.
17Kashika chino ngunambe, ngunashindakenya muli Mwene ngwami, Kanda nukenda nawa ngwe mavungu akwenda mu kunyonga cho chamokomoko, 18nikulá mu kunyonga cho, kahandunuka ku mwono wa Zambi mumu ha kwalajala chize chili muli ayo, mumu ha ukalu wa mbunge jo. 19Eno se halitwamina kwivwa chimwe, hanalitumbikila ku ujila, mukulinga luchisa mweswe, hamuwika ni chipululu. 20Alioze yenu kunwalilongesele Kristu chocho; 21kachi chinapu chocho ngwe hinunamwivu, hanufumba muli iye, ngwe umwenemwene uli muli Yesu. 22Ngwe nukazule mutu mukulu, yoze wakulipihisa nikulita ni usolo wa kwonga, nikulita ni kwenda chenu cha kunyima; 23nukapwe aha mu Spiritu ya kunyonga chenu, 24nukazale mutu mwaha, yoze hanamutange mu ululi ni usandu wamwenemwene nikulita ni Zambi.
25Kashika nikumbila mahuza, hanjikenu umwenemwene mweswe ni mwenyembo wenyi; mumu tuli yihanda yimwe ya mukwo. 26Tenukenu; kanda nuvulumuna; tangwa kanda Ukanjila ha utenu wenu; 27mwe Satana kanda numwaha unjililo. 28Yoze weyile kanda akeya nawa; alioze Shinaho akakilikite, akalinge yipema ni moko jenyi, hanga akapwe ni chize cha kulianyina ni yoze mahona. 29Liji lia kupihisa nilimwe kanda lituhuka mu makanwa jenu, alioze lize Unapeme ha kukolesa, nikulita ni chize muchitamba, hanga Ukahane vumbi kuli waze akwivwa. 30Kanda nuvwisa chinyengo Spiritu Musandu wa Zambi, yoze muli iye hananujiki ni Chijikilo ndo tangwa lia ukule. 31Usasu weswe, ni ufwatulo, ni utenu, ni zungo, ni kutukana, yimbilenu, hamwe ni uhuka weswe. 32Pwenu ni utu umwe kuli mukwo, akwa mbunge ja kwivwa keke, nikulikonekcna umwe ni mukwo, chizechene ngwe Zambi nawa hananukonekena muli Kristu.
Currently Selected:
MUKANDA WA A-EFWESU 4: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
