MUKANDA WAMUCHITANO WA MOSE Uze Akuvuluka Ngwo SHIMBI YAMUCHIALI 8
8
1Kanyamenu nulinge liji lieswe lia shimbi ngunanwambelio musono hanga nutwame ni mwono, ni kwoka, ni kunjila, ni kuzuka chifuchi chize walishingile Yehova kuchihana kuli tulamba twenu. 2Iwulukenu jila yeswe anusongwelele kuli Yehova Zambi yenu makumi aze awana a miaka mu puya, hanga anulelese, anweseke, anyingike chize chapwile mu mbunge jenu, shina munufunga maliji jenyi a shimbi, nyi ka. 3Yanulelesa, yanumwesa zala, yanulisa maná enu kunwayinyingikine, chipwe akakenu kayinyingikine, hanga akanunyingikise ngwenyi, Mutu keshi kupwa ni mwono ha kulia wika, alioze ku yeswe yinatuhuka mu kanwa lia Yehova mutu matwama ni mwono. 4Mazalo jenu kafwile hali yenu, molu jenu nawa kajimbile, makumi aze awana a miaka. 5Nunyonge mu mbunge jenu ngwenu, Ngwe chisemi mafumba mwanenyi, chocho Yehova Zambi yenu kakunufumba yenu. 6Nufunge maliji a shimbi a Yehova Zambi yenu, mukwenda mu majila jenyi, mukumuvwila woma. 7Mumu Yehova Zambi yenu ananuhetesa mu chifuchi chipema, chifuchi Chikwete yitwetwe ya meya, Chikwete mafuji a meya, ni meya asuku anavwelwokela mu yikulo ni ha milundu, 8chifuchi Chikwete tiliku, ni sevada, ni mitondo ya uva, ni mikuyu, ni romana, chifuchi Chikwete mitondo ya olevwe ni wuchi nawa. 9Mu chifuchi munukalia kulia chinji, kunuchi kahonamo nichimwe. Chifuchi, mawe jacho a utale, ku milundu yacho munukafula unengu. 10Munukalia ni kukuta, nukawahise Yehova Zambi yenu mumu ha chifuchi chipema iye hananwehecho.
11Nukanyame kuchina munukavulama Yehova Zambi yenu ha kulituna kufunga maliji jenyi a shimbi, ni upatwilo wenyi, ni yiyulo yenyi, ngunanwambeyo musono. 12Kuchina ngwami, Ha kulia ni kukuta, ha kutunga mazuwo apema ni kutwamamo, 13ha kwoka cha ngombe jenu ni yimuna jenu, ha kwoka cha prata ni oru jenu, ha kwoka cha yeswe nuli nayo, 14hanji mbunge jenu mujikazunduka, munukavulama Yehova Zambi yenu wanuchijile mu chifuchi cha Engitu, ku zuwo lia upinji. 15Iye wanusongwelele ndusu puya yinene, kole ni mwongo, tupela ni tuvwanda apwilemo, chifuchi chumu, kumwapwilemo meya niamwe, iye wanutuhwishilile meya ku liwe lia utale. 16Iye wanulishile maná mu puya, akakenu kayinyingikine, hanga anulelese, hanga anweseke, mba ha kusula akanulinge chipema. 17Kuchina munwamba mu mbunge jenu ngwenu, Ngolo jetu ni ndundo ja moko jetu yinatuzukisa upite uno. 18Alioze iwulukenu Yehova Zambi yenu, mumu iye ananwehe ngolo nuzuke upite; hanga akakolese usendo wenyi alishingililewo kuli tulamba twenu, ngwe chinapu musono. 19Kachi munuvulama Yehova Zambi yenu, nikukaula tuzambi tweka, ni kutuvumbika, ni kutuwayila, chamwenemwene ngunanushindakenya musono ngwami, Kumunukakuwa. 20Enu nawa munukakuwa ngwe mavungu aakuwishile kuli Yehova kumeso jenu mumu te kunusolo kupanjika liji lia Yehova Zambi yenu.
Currently Selected:
MUKANDA WAMUCHITANO WA MOSE Uze Akuvuluka Ngwo SHIMBI YAMUCHIALI 8: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
