MUKANDA WAMUCHITANO WA MOSE Uze Akuvuluka Ngwo SHIMBI YAMUCHIALI 6
6
1Achi, liji lino lia shimbi, ni yiyulo yino, ni upatwilo uno, Yehova Zambi yenu wambile ngunulongeseyo hanga nuyilinge mu chifuchi nunazauka kuchizuka. 2Nukavwile woma Yehova Zambi yenu, mukufunga yiyulo yenyi yeswe ni shimbi jenyi ngunanwambeyo, ni yenu, ni ana jenu, ni ajikulu jenu, matangwa eswe a mwono wenu, hanga matangwa jenu akapwe anji. 3Enu A-Izalele, ivwenu kashika, nukanyame kuyilinga, hanga nutwame kawape, hanga nwoke chinji, ngwe anulakenyene Yehova Zambi ya tulamba twenu, mu chifuchi munokela yamwa ni wuchi.
4Enu A-Izalele, ivwenu, Yehova Zambi yetu iye Yehova umuwika. 5Nuzange Yehova Zambi yenu ni mbunge jenu jeswe ni alma jenu jeswe, ni ndundo jenu jeswe. 6Maliji ano, ngunanwambe musono, akapwe ha mbunge jenu; 7nukaalongese kanawa kuli ana jenu, nukaatenge pande ha ku! wama mu mazuwo jenu, ha kwenda mu jila, ha kupomba chenu, ha kuhinduka chenu. 8Nukaajichike ha moko jenu akapwe chilayi, akapwe a kukashila mukachi ka meso jenu. 9Nukaasoneke ha yipamba ya mazuwo jenu, ni ha yajilo yenu.
10Muze Yehova Zambi yenu manuhetesa mu chifuchi alishingile iye kuli tulamba twenu ni kuli Apalahama, ni kuli Izake, ni kuli Yakomba, mukunwaha membo anene, apema, enu kunwaatungile, 11ni mazuwo a tò ni yuma yeswe yipema enu kunwaazalishile, ni mashima a kutota enu kunwaatotele, ni minda ya uva ni mitondo ya olevwe enu kunwayitumbile; munulia ni kukuta, 12henaho, nukanyame kuchina munuvulama Yehova wanuchijile mu chifuchi cha Engitu, ku zuwo lia upinji. 13Nukavwile woma Yehova Zambi yenu, nukamuvumbike iye, nukalishinge ni jina lienyi. 14Kanda nukaula tuzambi tweka, tuzambi twa mavungu ananujingilika, 15mumu Yehova Zambi yenu yoze uli hakachi kenu iye Zambi ya ukwa, kuchina utenu wa Yehova Zambi yenu muunukasumukina, iye makanukuwisa hashi heswe.
16Kanda nweseka Yehova Zambi yenu, ngwe nwamwesekele ku Masa. 17Nufunge kanawa maliji a shimbi a Yehova Zambi yenu, ni Shindakenyo jenyi ni yiyulo yenyi anwambileyo. 18Nulingelinge chize Chinalulama, chipema kumeso ja Yehova; hanga nutwame kawape, hanga nunjile, nuzuke chifuchi chipema chize alishingile Yehova kuhana kuli tulamba twenu, 19mukuhuma akwa kole jenu eswe kumeso jenu, ngwe ambile Yehova.
20Muze manuhula kuli ana jenu ha miaka muyizaho ngwo, Shindakenyo yinalumbunuka kuchi? ni yiyulo, ni upatwilo, Yehova Zambi yetu anwambileyo? 21Henaho nwambe kuli ana jenu ngwenu, Twapwile tupinji twa Falau mu Engitu, Yehova yatuchiza mu Engitu ni kwoko lia ndundo. 22Yehova yalweza yilayi, ni yikomokeso yinene, yikalu ni ha Engitu ni hali Falau, ni hali akwa zuwo lienyi eswe, kumeso jetu. 23Iye yatuchizamo hanga atunjise mu chifuchi chize alishingile kuhana kuli tulamba twetu. 24Yehova yatwamba tulinge yiyulo yino yeswe, tuvwile woma Yehova Zambi yetu, chikapwe chipema chetu matangwa eswe, iye atufunge a mwono, ngwe chinapu musono. 25Kumuchipwa ululi kuli yetu, kachi mutukanyama kulinga liji lino lieswe lia shimbi kumeso ja Yehova Zambi yetu, ngwe atwambilelio iye.
Currently Selected:
MUKANDA WAMUCHITANO WA MOSE Uze Akuvuluka Ngwo SHIMBI YAMUCHIALI 6: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
