MUKANDA WAMUCHITANO WA MOSE Uze Akuvuluka Ngwo SHIMBI YAMUCHIALI 5
5
1Mose watambikile kuli A-Izalele eswe ngwenyi, Enu A-Izalele, ivwenu yiyulo ni upatwilo ngunambe mu matwi jenu musono, nulilongeseyo, nukayifunge, nuyilinge. 2Yehova Zambi yetu yakolesa usendo ni yetu mu Horepe. 3Yehova kakolesele usendo uno ni tulamba twetu, ka, alioze ni yetu, yetu eswe tuli a mwono kuno musono. 4Yehova yahanjika ni yenu meso ni meso ha mulundu, liji Unatuhuka mukachi ka kahia. 5(Yingumana hakachi kenu ni Yehova ha tangwa lize, mukunulweza liji lia Yehova, mumu te woma nunevu wa ke kahia, kunwakandukile ha mulundu.)
6Zambi yamba ngwenyi, Nakuchijile mu chifuchi cha Engitu, ku zuwo lia upinji, yami Yehova Zambi ye.
7Kanda ukapwa ni tuzambi tweka kumeso jami.
8Kanda ukalisongela kaponya, chipwe wa kulifwa ni chuma chimwe cha mwilu, chipwe chuma cha hashi, chipwe chuma cha mu meya mushi lia hashi. 9Kanda ukafukama kuli ayo, chipwe kwalingila, ka, mumu yami Yehova Zambi ye, nguli Zambi ya ukwa, nikufwetesa ana uhenge wa atato ndo ku chisemuko chamuchitatu ni chamuchiwana cha waze akunguvwila kole; 10nikulweza utu wa zango kuli tununu twa waze akunguzanga, kuli waze akufunga shimbi jami.
11Kanda ukavuluka ni mahuza jina lia Yehova Zambi ye, mumu Yehova kechi kusambisa yoze mavuluka ni mahuza jina lienyi.
12Ufunge tangwa lia Sambata nulisele lisandu ngwe Yehova Zambi ye akwambile. 13Ukahondangane matangwa asambano. Ukalingeho milimo ye yeswe. 14Alioze tangwa liamuchishimbiali Sambata kuli Yehova Zambi ye. Kanda ukalingaho milimo niyeyimwe, chipwe yena, chipwe mwané wa lunga, chipwe mwané wa pwo, chipwe ngamba ye wa lunga, chipwe ngamba ye wa pwo, chipwe ngombe ye, chipwe chimbulu che, chipwe yimuna je niamwe, chipwe njize uli mu chihunda che, hanga ngamba ye wa lunga ni ngamba ye wa pwo akahwime chimuwika ngwe yena. 15Iwuluka ngwami, Wapwile kapinji mu chifuchi cha Engitu, Yehova Zambi ye yakuchizamo ni kwoko lia ndundo, ni kwoko lia kwolola, kashika Yehova Zambi ye yakwamba ngwenyi, Ufunge tangwa lia Sambata.
16Lemesa tatenu ni noko ngwe Yehova Zambi ye yakwamba, hanga matangwa je akapwe anji, hanga Utwame kawape mu chifuchi chize Yehova Zambi ye kanakwehe.
17Kanda ukashiha mutu.
18Kanda ukalinga utanji.
19Kanda ukeya.
20Kanda ukatayila mahuza mukwenu.
21Kanda ukavwila chipululu pwo lia mukwenu, chipwe kanda ukazanga zuwo lia mukwenu, chipwe munda wenyi, chipwe ngamba yenyi wa lunga, chipwe ngamba yenyi wa pwo, chipwe ngombe yenyi, chipwe chimbulu chenyi, chipwe chuma chimwe cha mukwenu.
22Maliji ano ambile Yehova ha mulundu ku chikungulwila cheswe, liji Unatuhuka mukachi ka ke kahia, ni ku lelwa, ni ku milima pwi, ni liji linene. Kawezeleko nichimwe. Yaasoneka ha mikanda yiali ya mawe, yangwahayo yami. 23Ha kwivwa liji Unatuhuka mukachi ka ye milima, te mulundu unachiweme ni kahia, enu nwakundamine kuli yami, te akwa lutwe eswe a minyachi yenu hamwe ni makulwana jenu, 24yinwamba ngwenu, Kwivwa! Yehova Zambi yetu hatulweza ulemu wenyi ni unene wenyi, yitwivwa liji lienyi Unatuhuka mukachi ka ke kahia. Musono hitwamona ngwetu, Zambi kahanjika ni mutu, hindu mutu achili ni mwono. 25Kashika haliapwila tufwile yika? Mumu kahia kano kanene mukatulesa. Kachi mutwivwa cheka nawa liji lia Yehova Zambi yetu, henaho kumutufwa. 26Iya uliko kuli eswe evwile liji lia Zambi ya mwono anahanjika ni liji Unatuhuka mukachi ka ke kahia, ngwe yetu hitwevwa, hindu achili ni mwono? 27Ukundame wivwe yeswe Yehova Zambi yetu mamba; uhanjike ni yetu yeswe Yehova Zambi yetu mamba kuli yena; mutuyivwa, mutuyilinga.
28Mba Yehova yevwa liji lia kuhanjika chenu muze nwahanjikile ni yami. Yehova yamba kuli yami ngwenyi, Hinevwa liji lia kuhanjika cha atu ano chize hahanjika ni yena. Yeswe anambe pundu lume. 29Kachi mapwa ni mbunge yino muli ayo, hanga anguvwile woma, afunge maliji jami eswe a shimbi matangwa eswe, hanga atwame kawape, ana jo nawa atwame kawape cha mutolo. 30Yako, wambulwile ngwe, Hilukenu ku mbalaka jenu. 31Alioze, yena umane kuno kuli yami, mungwamba kuli yena maliji eswe a shimbi, ni yiyulo, ni upatwilo, ukaalongeseyo, hanga ayilinge mu chifuchi chize ngunaahecho kuzuka. 32Kashika nukanyame kanawa, nuyilinge ngwe Yehova Zambi yenu hanwamba; kanda nuhambuluka ku chindume chipwe ku chimeso. 33Nwende mu jila yeswe Yehova Zambi yenu hanwamba, hanga nupwe ni mwono, nutwame kawape, hanga nwokese matangwa jenu mu chifuchi munuzuka.
Currently Selected:
MUKANDA WAMUCHITANO WA MOSE Uze Akuvuluka Ngwo SHIMBI YAMUCHIALI 5: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
