AMOSE 9
9
1Namwene Mwene kanamana hakamwihi ni chilumbilo. Yamba ngwenyi,
Lamba manguji ha masongo ndo yikuli muyichikima
ukayifwenye ha mitwe ya atu eswe.
Waze malisalaho mungukaashihisa ni katana.
Kechi kahasa kuchina niumwe;
kechi kahasa kwomboka niumwe.
2Chipwe mafulila ndo ku Shiole
hindu kwoko liami mulikaachizako.
Chipwe manyina ku malilu
mungukaahulumunamo.
3Chipwe maswamina ha mbulwa mulundu wa Karmela
kwenako mungukaafupa ni kwakwata.
Chipwe manguswamina mu mashima a kalunga-lwiji
mungukatuma kapela mba makaasuma.
4Chipwe maya ufunge kuli akwa kole jo,
kwenako mungukatuma katana mba makaashiha.
Mungwahulikila meso jami kwalinga chipi hi chipema ko.
5Mwene Yehova-wa-Tujita,
yoze masunga hashi mba muhasangunuka,
mba waze eswe aliho malishimwoka,
neho heswe muhazunduka ngwe lwiji Nilo
ni kuhuwa nawa ngwe Nilo wa Engitu;
6yoze wakutunga yipatulo yenyi ya kwilu mu malilu
nikusa kuzazuluka chenyi helu lia hashi,
yoze wakusanyika meya a kalunga-lwiji
nikwazukwila ha mavu—jina lienyi Yehova.
7Yehova kanambe ngwenyi, Enu A-Izalele
kunwapwile ngwe A-Etiopia kuli yami?
Te chachijile A-Izalele ku chifuchi cha Engitu?
Ni A-Filistea ku Kafetore ni A-Seria ku Kiri?
8Meso ja Mwene Yehova ha chifuchi cha shili anaahulikila,
mba mungukachonwona he ha mavu:
Munyachi wa Yakomba wika chichi kaunongesa liakulu.
Chocho kanambe Yehova.
9Mumu mungukatuma
kusakumuna munyachi wa Izalele hakachi ka mavungu
ngwe umwe kakusakumuna musalo wa masekeseke,
alioze nikamwe kaliwe mukaholoka hashi kakuhi.
10Yivulumunyi eswe a atu jami makafwa ni katana
waze akwamba ngwo,
Chipi kuchichi kutuwana chipwe kutakana ni yetu.
11Ha tangwa lize mungutungulula nawa
mbalaka ya David yize hiyinapuzuka.
Mungukalulika yituwa yayo,
nikumika nawa yize yalimbuka hashi,
ni kuyitungulula chizechene ngwe ha matangwa a kunyima,
12hanga akazuke masalila ja Endome,
ni mavungu aze eswe hanaaluku jina liami.
Chocho kanambe Yehova mukwa kulinga chuma chino.
13Yehova kanambe ngwenyi, Matangwa kaneza
muze mukwa kuchipa maheta mukwa kucha,
ni mukwa kukama uva maheta mukwa kutumba mbuto.
Milundu muyikasulumuka ni vinyu yipema,
ni mindundena muyikapukukila nayo.
14Mungukahilwisa kuwaha cha atu jami A-Izalele
mba makatungulula yihunda yize hiyapuzuka, makatwamamo.
Makalima minda ya uva nikunwa vinyu yayo;
makalinga manaka nikulia mihuko yo.
15Mungukaatumba mu chifuchi cho,
mba kechi katukukako nawa ku chifuchi chize hinaaha.
Chocho kanambe Yehova Zambi yenu.
Currently Selected:
AMOSE 9: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
