OBADIA 1
1
1Usolwelo wa Obadia uno. Mwene Yehova kanambe ha kutwala kuli Endome ngwenyi,
Hitunevu lusango wa kuli Yehova.
Hatuma kanganda hakachi ka mavungu nikwamba ngwenyi,
Katuka; tukatukenu kulimika nenyi mu jita.
2Tala, hinakupwisa mukepe hakachi ka mavungu.
Kanakulelesa chinji.
3Kulengumuka cha mbunge ye hichakwonga,
ena watunga mu yivwenge ya mu mawe,
zuwo lie liapwa kwilu;
kuwakwamba mu mbunge ye ngwe,
Iya manguhulumuna hashi?
4Yehova kanambe ngwenyi,
Chipwe mulinangamisa ngwe pupa;
chipwe muosa walo we hakachi ka matongonoshi
hindu mungukuhulumunako.
5Hakwenyeka Chichize!
Nyi kachi eji ejile kuli yena,
kachi yingumba ha ufuku,
kachi heya ndo hayuka, kunahu.
Nyi kachi akwa kuhela uva,
kachi hahichika yimwe ya kuhuhulula.
6Alioze hapupa Esau Chichize!
Cho kupolongoza nikufupa upite wa kusweka!
7Masepa je hakuhanga ndo ku njiza.
Waze Watwamine no ni sambukila hakwonga, hakukumba.
Waze alile kulia che hakutela muheto.
Kwapwile ni mana a kuchinyingika.
8Yehova kanambe ngwenyi,
Ha tangwa lienalio mungwonwona akwa mana mu Endome.
Mungwonwona malinjekela mu mulundu wa Esau.
9Ena Temane! Malunga je a ndundo makalishimwoka,
hanga eswe akaatete ku mulundu wa Esau nikwashiha.
10Kumakakutetako ku miaka ya mutolo,
sonyi mujikufuka mumu ha upupilo walingilile mwanakwenu Yakomba.
11Ha tangwa lize yena wamanyine ku lumbu.
Ha tangwa lize yilambala apunjile yikumba yenyi,
ni tundaka anjilile ku yajilo yenyi
nikulela chela Yerusaleme, chipwe yena wapwile hamuwika no.
12Kuchakutambile kutala ha tangwa lia mwanakwenu;
ha tangwa lia lamba lienyi.
Kuchakutambile kuwahilila ha kumona A-Yunda
ha tangwa lia kwaonwona,
chipwe kuhanjika nikulengumuka
ha tangwa lia luyinda.
13Kuchakutambile kunjila ku chajilo cha atu jami
ha tangwa lio lia kuji-ni-tomo.
Kuchakutambile kutala kupinda cho
ha tangwa lia kuji-ni-tomo,
chipwe kukwata ku yikumba yo
ha tangwa lia kuji-ni-tomo.
14Kuchakutambile kumana ku makano nikushiha waze te anomboka,
chipwe kuhandukula atu jenyi asalile
ha tangwa lia luyinda.
15Mumu tangwa lia Yehova hiliakundama ku mavungu eswe.
Chizechene walingile yena, chocho nawa makulinga.
Yitanga ye muyikahilukila ha mutwe we.
16Chizechene ngwe hiwanwa yena ha mulundu wami usandu
chocho mavungu eswe kumakanwanwa.
Ewa, kumakanwa, kumakapiepieta, kumakajimuka.
17Alioze mu mulundu wa Zaione kumukukapwa akwa kwomboka;
muukapwa usandu.
Munyachi wa Yakomba kumakazuka chihinga cho.
18Munyachi wa Yakomba muupwa kahia;
munyachi wa José muupwa mulengi;
mba munyachi wa Esau muupwa mwambu umu.
Kumakalengenya hakachi ko ni kwalalisa.
Kukuchi kasala niumwe wa ku munyachi wa Esau,
mumu Yehova hachamba.
19Akwa Negeve kumakazuka mulundu wa Esau.
Akwa Shefela kumakazuka A-Filistea.
Kumakazuka chifuchi cha Eframe ni chifuchi cha Samaria.
Mbenjamine kumakazuka Ngiliate.
20Funge a ku tujita wano, a kuli A-Izalele,
waze atwama hakachi ka A-Kanana, o kumakazuka ndo ku Zarafata.
Mba funge a ku Yerusaleme, waze atwama mu Shefarade,
o kumakazuka membo a ku Negeve.
21Akwa kulamwina kumakaya ku mulundu wa Zaione
akayule mulundu wa Esau,
mba wanangana kumuukapwa wa mbala wa Yehova.
Currently Selected:
OBADIA 1: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
