AMOSE 3
3
1Enu A-Izalele, ivwenu liji lino Yehova hanahanjika lia kulimika ni yenu, munyachi uze weswe nachijile ku chifuchi cha Engitu, ngwami,
2Hakachi ka minyachi yeswe ya hashi
yenu wika hinanunyingika,
kashika mungukanwaha kastigu
mumu ha uhenge wenu weswe.
3Atu aali kakuliendela nyi kalitesele?
4Ndumba kakuhiohia mu yambu
nyi keshi ni yifwo?
Mwevu wa ndumba kakuteta mu chivwenge chenyi
nyi kakwachile chimwe?
5Kajila mafwa mu kambwila nyi kamutelelelio?
Kambwila kuliakukambuluka
nyi kashitu wakuhi?
6Atu kechi kwivwa woma
nyi hasunga chitavwi mu chihunda?
Chuma chikalu muchiwana chihunda
nyi Yehova kachitumine?
7Pundu Mwene Yehova keshi kulinga chuma
shina malweza chijimbikilo chenyi kuli tuvumbi twenyi aprofeta.
8Ndumba hahiohia,
iya kechi kwivwa woma?
Mwene Yehova hanahanjika,
iya mahasa kuhola ni uprofeto?
9Ambululenu mu mbonge ja Ashedode
ni mu mbonge ja chifuchi cha Engitu
ngwenu, Kungulukenu ha milundu ya Samaria
nukamone chizungozungo muli ayo
ni we upinjiso hakachi ko.
10Yehova kanambe ngwenyi,
Waze akuvundula upupilo ni wiji mu mbonge jo;
kanyingikine kulinga yipema.
11Kashika Mwene Yehova kanambe ngwenyi,
Mukwa kulimika makaseleka chifuchi
nikunupuzwila yipanga yenu
ni kupupa mbonge jenu.
12Yehova kanambe ngwenyi, Ngwe kafunga matambula ku kanwa lia ndumba molu aali hanji chipinji cha twitwi, chocho makupulula A-Izalele waze anatwama mu Samaria, ha mbango ya muu, hanji ha muhela wa kulilengela.
13Mwene Yehova,
Zambi-ya-Tujita kanambe ngwenyi,
Ivwenu nukashindakenye munyachi wa Yakomba ngwe,
14Ha tangwa lize mungulamba Izalele mumu ha mutonga wenyi,
mungulamba yilumbilo ya Mbetele.
Makateta mbinga ja chilumbilo
jikaholoke hashi.
15Mungulamba zuwo lia lushiho hamwe ni zuwo lia lwiza,
ni mazuwo ja mazo a njamba makanonga
ni mazuwo anene kumakahwa.
Chocho kanambe Yehova.
Currently Selected:
AMOSE 3: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
