AMOSE 1
1
1Maliji ja Amose, aye wapwile hakachi ka tufunga twa mapanga a ku Tekoa; maliji aze amwene ha kutwala kuli Izalele ha matangwa a Uzia mwanangana wa Yunda, ni matangwa a Jeroboame mwana Njoashe mwanangana wa Izalele miaka yiali shimbu munyiko kanda wiza. 2Yamba ngwenyi,
Yehova kanakulunguza ku Zaione,
kanahiohesa liji lienyi ku Yerusaleme.
Ulilo wa tufunga unalili;
helu lia mulundu wa Karmela hanalele.
3Yehova kanambe ngwenyi,
Mumu ha milonga yitatu ya Ndamaseku,
hanji yiwana, chichi kahilwisa kastigu,
mumu hanazungula Ngiliate
ni chikungo cha utale.
4Kashika mungutuma kahia ku zuwo lia Hazaele
mba mukalalisa mbonge ja Mbene-Hadade.
5Mungumakuna njalo ja Ndamaseku,
mungutetaho waze atwama mu chikulo cha Avene;
munguteta ku Mbete-Endene mwe mukwa lukanda,
ni atu ja Seria maya ku unjize ku Kiri.
Chocho kanambe Yehova.
6Yehova kanambe ngwenyi,
Mumu ha milonga yitatu ya Ngeza
hanji yiwana, chichi kahilwisa kastigu,
mumu ambachile ku unjize vungu lia muwundu
akaakunjike ku Endome.
7Chocho mungutuma kahia ha chipanga cha Ngeza
mba mukalalisa mbonge jako.
8Mungutetaho waze atwama mu Ashedode;
munguteta ku Asekalone mwe mukwa lukanda.
Mungutalikisa kwoko liami kulimika ni Ekrone
ni masalila ja A-Filistea kumakanonga.
Chocho kanambe Mwene Yehova.
9Yehova kanambe ngwenyi,
Mumu ha milonga yitatu ya Teru
hanji yiwana, chichi kahilwisa kastigu,
mumu akunjikile vungu lia muwundu ku Endome
kewulukile usendo wa usoko.
10Chocho mungutuma kahia ha chipanga cha Teru,
mba mukalalisa mbonge jako.
11Yehova kanambe ngwenyi,
Mumu ha milonga yitatu ya Endome
hanji yiwana, chichi kahilwisa kastigu,
mumu yakaula mwanakwo ni katana
nikumbila keke yeswe.
Utenu wenyi wapapulwile matangwa eswe;
wafungile ufwatulo wenyi wa mutolo.
12Chocho mungutuma kahia ku Temane,
mba mukalalisa mbonge ja Mbozera.
13Yehova kanambe ngwenyi,
Mumu ha milonga yitatu ya A-Amone
hanji yiwana, chichi kahilwisa kastigu,
mumu yahangula mapwo tufumba mu Ngiliate
hanga akatohese manjiza jo.
14Chocho mungukawika kahia mu chipanga cha Raba,
mukalalisa mbonge jenyi,
ni kulikumbukila ha tangwa lia jita,
ni kangonga ha tangwa lia chijimbi.
15Mba mwanangana wo makaya ku unjize
iye ni alemu jenyi hamuwika.
Chocho kanambe Yehova.
Currently Selected:
AMOSE 1: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
