2 A-KORINDU 11
11
1Ngunazange nuhase kulihumikiza ni yami ni uzuzuke ukepe; alioze chamwenemwene nwakulihumikiza. 2Mumu ngunanuvwila ukwa umwe wa kuli Zambi: mumu nanulakenyene kuli lunga umuwika hanga ngukanutumbikile kuli Kristu ngwe *virgem wa kulinanga. 3Alioze ngunevu woma, kuchina ku chuma chimwe, chizechene ngwe kapela wongele Eva ni kalimbavuli kenyi, chocho mapihisa manyonga jenu ku kutuwika cha mbunge ni kulinanga chize chili kuli Kristu. 4Mumu kachi yoze meza, mambujola umwe Yesu mukwo, yoze yetu kutwamwambujolele, hanji munutambula Spiritu yeka, yoze kunwamutambwile, hanji sango lipema lieka, lize kunwatambwile, munulinga kanawa kulihumikiza, kumanyi 5Mumu ngunashinginyeka yami mwene chasalile kunyima nichimwe ha kutwala kuli waze apostolo ahiana. 6Alioze kachi nguli chikukumi ha kuhanjika hindu hi ha yinyingi ko. Alioze mu majila eswe hitunasolola chino kuli yenu ni yuma yeswe.
7Hanji navulumwine mulonga, nyi? Mumu nalilelesele hanga akanunangamise, mumu nambujolele sango lipema lia Kristu chawana, nyi? 8Nahupile yikungulwila yikwo, nikutambula fweto kuli ayo, hanga ngukanuvumbike; 9muze napwile hamwe ni yenu, nahonene, chalemenene niumwe; mumu mandumbu, muze ejilile ku Masendoniya, anguhele chize nahonene; ni yuma yeswe nalifungile hanga chishi kunulemena, chocho mungukalifunga. 10Nikulita ngwe umwenemwene wa Kristu uli muli yami, niumwe kechi kanguholesa ha kulisamba chino mu yifuchi ya Akeya. 11Kuchi te? Mumu chishi kunuzanga, nyi? Zambi kananyingika.
12Alioze chize nakulinga, chizechene mungukachilinga hanga ngukajike jila ya waze akuzanga kulisamba; hanga muze akulisamba, akaawane chizechene ngwe yetu. 13Mumu wano kanapu apostolo ja mahuza, akwa kulinga tulimbalimba, nikulihipula ngwe apostolo ja Kristu. 14Achi kuchatushimine, mumu chipwe Satana kakulihipula ngwe mungelo wa pangu. 15Kashika hi chuma chinene ko kachi tuvumbi twenyi nawa malihipula ngwe tuvumbi twa ululi; songo lio kumulikapwa nikulita ni yitanga yo.
16Ngunambe cheka nawa ngwami, Niumwe kanda akangumona ngwe nguli Chizuzuke; alioze kachi nunangumono chocho, hindu ngutambulenu ngwe Chizuzuke, hanga yami nawa ngukahase kulisamba chimwe chikepe. 17Chize ngunahanjika, chishi kuhanjika nikulita ni Mwene, alioze ngwe ni uzuzuke, ni ukolelo uno wa kulisamba. 18Se anji kakulisamba nikulita ni musunya, ni yami nawa mungulisamba. 19Mumu yizuzuke nwakwatayiza ni chiseke mu ukanyame wenu. 20Mumu munutayiza mutu kachi manutwala ku undungo, kachi manuumbula, kachi manwonga, kachi malinangamisa kachi manulamba ku meso. 21Ngunahanjika ngwe kulisaula, ngwe, twapwile alelu.
Hindu mweswamo umwe mahamuka (ngunahanjika ni uzuzuke), yami nawa ngunahamuka. 22O A-Hepreu, nyi? Yami nawa. O A-Izalele, nyi? Yami nawa. O munyachi wa Apalahama, nyi? Yami nawa. 23O tuvumbi twa Kristu, nyi? (Ngunahanjika ngwe ngunazaluka) yami nahianaho; nikukilikita kuhiana chikolo, mu mazuwo ja ususu kuhiana chikolo, ni mijiji yahiana naye, ni kufwa kanji. 24Kuli A-Yunda natambwile katano makumi awana a mijiji kuhona umuwika. 25Katatu angulambile ni shikote; kamuwika angwashile mawe; katatu nalilamwinyine muze wato te muushimbama; ufuku ni mwalwa napwile mu kalunga-lwiji. 26Mu mawenyi kanji, ni Utoji wa mu njiji, ni Utoji wa mihuza; ni Utoji kuli akwa munyachi wami; ni Utoji kuli akwa mavungu: ni Utoji mu membo; ni Utoji mu puya; ni Utoji ha kalungalwiji; ni Utoji hakachi ka mandumbu a kwonga; 27nikukilikita nikuhondangana, nikulawoka kanji; ni zala ni pwila, nikulitwamina kulia kanji; ni chishika ni uvu. 28Ni kuweza ku yuma yize yili haze, kuchili chize chakungushata tangwa ha tangwa, che kulema cha yikungulwila yeswe. 29Iya malela, ni yami chishi kulela? Iya mamutalingisa, ni yami chishi kufuluka?
30Kachi changutamba kulisamba, mungukalisamba mu yuma yize ya kutwala ku ulelu wami. 31Zambi kanda Tato ya Mwene Yesu Kristu, yoze wafumuna ndo ku miaka ya mutolo, kananyingika chishi kuhanjika mahuza. 32Mu Ndamaseku, nguvulu wa kuyula kushi lia mwanangana Areta, wafungile limbo lia A-Ndamaseku, hanga akangukwate. 33Ndusu mu kapenda mu chiseke anguhulumwishine ku chipanga, mba naputukile ku moko jenyi.
Currently Selected:
2 A-KORINDU 11: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
