WA TIMOTEU 5
5
1Kanda ukámbila mukulwana ni maliji akalu, alioze liumba kuli iye ngwe kuli tatenu; 2makulwana ja mapwo ngwe amama; mapwo ni miaka yikepe ngwe mapangi, ni kulinanga cheswe; kuli akweze ngwe anaakwenu.
3Lemesa twamishi a mapwo waze anapu chamwenemwene twamishi. 4Alioze nyi twamishi umwe mapwa ni ana, hanji ajikulu, akalilongese hatangu uwayilo ha kutwala ku mazuwo jo ene, akahilwise chimwe kuli yisemi jo. Mumu chino chinapemena chikolo kuli Zambi. 5Achi, yoze chamwenemwene mapwa twamishi, hanamuhichika ukawenyi, kakutalatala hali Zambi, nikunyongonona mu kuliumba ni kulemba ufuku ni mwalwa. 6Alioze yoze matwama ni kuliyukisa usona weswe, kanafu shimbu achili ni mwono. 7Hana shimbi ha yino yuma nawa, hanga akapwe keshi kapalia. 8Alioze kachi umwe keshi kulisa atu jenyi mwene, ni kuhiana chikolo akwa zuwo lienyi, kachi hanalikate Ufulielo, kapiha kuhiana yoze keshi kufuliela.
9Kanda asoneka mu mukanda twamishi yoze kanda aheta makumi asambano a miaka, yoze amumbachile lunga umuwika, 10kanamushindakenya ha yitanga yipema; kachi hanalele ana kachi hanazumbula ngeji, kachi hanasanyisa yiliato ya asandu, kachi hanakwasa akwa kuyindama, kachi hanakaula yitanga yeswe yipema. 11Alioze kanda usoneka twamishi a mapwo ni miaka yikepe: mumu muze masulumioka kuli Kristu mazanga kuya ulo; 12chocho mahia, mumu hanambila Ufulielo wo utangu. 13Malilongesa nawa kulelumioka nikujingajinga ku zuwo ni zuwo; ni hi kulelumioka wika ko, alioze mapwa akwa kalundanganyishi, akwa moko a jiji, nikuhanjika yuma yize kuyatele. 14Kashika ngunazange twamishi a mapwo ni miaka yikepe akaye ulo, akaseme ana, akayule yuma ya mu zuwo, kanda akahana unjililo kuli mukwa kulimika akatúke. 15Mumu amwe hanakondoloka kulu mukukaula Satana. 16Kachi umwe mukwa kufuliela mapwa ni twamishi a mapwo, akaakwase, kanda akalemena chikungulwila, hanga akakwase waze apwa chamwenemwene twamishi.
17Makulwana waze akuyula kanawa, katela kwawezela ulemu, kuhiana chikolo kuli waze akukilikita mu milimo ya kwambujola liji ni kulongesa. 18Mumu chisoneko chinambe ngwo, Kanda ukasa kata ku kanwa lia ngombe muze mazungula mbuto. Chikwo ngwo, Mukwa milimo kanatela fweto yenyi. 19Kanda upanjika ku kusuma hali mukulwana, shina ku makanwa ja yela aali hanji atatu. 20Waze mavulumuna, ukaakumike kumeso ja atu eswe, hanga akwo nawa akapwe ni woma. 21Shimbi ngunakwehe kumeso ja Zambi ni Kristu Yesu ni angelo a kutongola, ufunge yino yuma, kanda upatula Shimbu-kanda, kanda ulinga nichimwe ni katonde. 22Kanda ukasayika moko nikawashi hali mutu niumwe, chipwe kanda ulikunda ni milonga ya mbala: ukalinange.
23Kanda ukanwa meya wika, alioze tambula kavinyu, mumu ha lufu we ni kukokoloka che chinji.
24Milonga ya atu amwe yinasoloka liakulu, nikutetekela ku upatwilo; ni yize ya atu amwe yinakaula kunyima. 25Chizechene nawa yitanga yipema ya amwe yinasoloka liakulu, ni yize muyipwa yeka kuyishi kuhasa kuswama.
Currently Selected:
WA TIMOTEU 5: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
