WA TIMOTEU 6
6
1Ndungo waze eswe ali mu undungo, akanyonge miata jo ene akwa kutela ulemu weswe, hanga kechi hashililika jina lia Zambi chipwe lie longeso. 2Ni waze apwa miata, akwa kufuliela, kanda aalelesa, mumu apwa mandumbu; alioze Shinaho akaalingile, mumu waze akutambula ye milimo yipema o akwa kufuliela-ni-akwetu kanaazange chikolo.
Longesa yino yuma nikuyishinjila. 3Kachi umwe malongesa longeso lieka, keshi kutayiza ku maliji angunu, aze a Mwene wetu Yesu Kristu, ni ku longeso lize liakulita ni uwayilo; 4kanalifuzu, kanyingikine nichimwe, alioze kanahazwoka ha kutwala ku yihula ni kuhangujola cha maliji, kwenako kwakukatuka lufwachinda, ni vunda, ni kushililika, ni yishinginyeka ya ungulungulu, 5kumbalanga cha atu a kupiha mu kunyonga cho, akuhona umwenemwene, waze anashinginyeka ngwo, Uwayilo unapu jila ya kufumbuka. Lihandunune ni atu ngwe wano. 6Alioze uwayilo hamwe ni kuyuka, che kufumbuka chinene: 7mumu kutwanehene nichimwe hano hashi, mba chipwe kutwahashile kuchizamo nichimwe. 8Alioze nyi tuli ni ya kulia ni ya kuzala, chatutamba kuyuka nayo. 9Alioze waze mazanga kupwa pichi, malimbuka mu cheseko, ni mu muheto, ni mu usolo wunji wa kuhulama ni wa kulemeka, uze kuwakushimbamisa atu mu kwenyeka ni mu kwonwona. 10Mumu chipululu cha mbongo chikota cha yipi yeswe: amwe nikujifupa, hanapianguka ku Ufulielo, hanalituwu ni yikola yinji.
11Alioze yena, mutu wa Zambi, China yino yuma; ukakaule ululi, ni uwayilo, ni Ufulielo, ni zango, ni utunu, ni kushimbika. 12Litachike kulitachika chipema cha Ufulielo, kwata ku mwono wa mutolo, uze akutambikilile, ni yena watayijile kutayiza chipema kumeso ja yela anji. 13Shimbi ngunakwehe kumeso ja Zambi, yoze wakuhana mwono ku yuma yeswe, ni ja Kristu Yesu, yoze kumeso ja Ponteu Pilatu washindakenyene Shindakenyo yipema, 14ngwami, Ukafunge liji lia shimbi, kulishi chipeka, kulishi kapalia, ndo ku usolokelo wa Mwene wetu Yesu Kristu. 15Uze ha mwaka wawo makaulweza, yoze wapwa mukwa kuyula wa kuwaha kanda umuwika, mwe Mwanangana wa mianangana, mwe Mwene wa ene. 16Iye wika keshi kufwa, katwama mu pangu lize keshi kuhasa kukundamako; mutu niumwe kamumwene, chipwe mahasa kumumona, ka: ulemu ni ndundo ja mutolo jikapwe kuli iye. Amene.
17Kanjisa waze apwa pichi ha mwakono, kanda alengumuka, chipwe kanda atalatala ha upite wa ujilijili, alioze hali Zambi ya mwono, yoze wakutwaha yuma yeswe ya kulumbama, hanga tukawahe nayo. 18Akalinge yipema, akapwe ni yitanga yipema ya kulumbama, akapwe akwa kunyengumuna, akwa kulianyina, 19nikulitulikila fundamentu yipema ha miaka yize muyizaho, hanga akakwate mwono uze wapwa mwono wamwenemwene.
20Timoteu, funga chize akukunjikile, ukalikondolole ku kumbambula chamokomoko cha ujiluke, ni kulimika cha yinyingi yize anayivuluka chocho ni mahuza; 21yize amwe se hanayitayiza hanapiasuka ha kutwala ku Ufulielo.
Vumbi likapwe hamwe ni yenu.
Currently Selected:
WA TIMOTEU 6: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
