WA TIMOTEU 1
1
1Yami Paulu, postolo wa Yesu Kristu, nikulita ni chiyulo cha Zambi Chilamwina chetu, ni cha Kristu Yesu, iye kutalatala chetu; 2Kuli Timoteu, mwanami pundu mu Ufulielo:
Vumbi, ni keke, ni sambukila ya kuli Zambi Tata yetu, ni Kristu Yesu Mwene wetu.
3Ngwe nakushinjilile usale mu Efwesu, shimbu munguchiya ku Masendoniya, hanga ukakanjise amwe atu, kanda alongesa longeso lieka. 4Chipwe kanda apanjika ku yishima yamokomoko, ni kujichika miya yize kuyishi songo, yenayo kuyakuneha mbandanga, alioze kuyishi kusenyesa kulutwe uselo wa Zambi, uze uli mu Ufulielo. 5Alioze songo lia shimbi ngwo, Zango lia ku mbunge yitoma, ni shimbi yipema ya mbunge: ni Ufulielo uze kuushi ulembekese. 6Ku yuma yino amwe se apiasukile, hanakondolokela ku pande jamokomoko. 7Kanazange kupwa alongeshi a shimbi, alioze chize akwamba kuchaalumbunukine, chipwe ha kutwala ku chize akushindakenya ni tachi.
8Alioze tunanyingika shimbi yinawaha, kachi umwe malinga nayo nikulita ni shimbi. 9Nikunyingika chino, shimbi kayikolesele hali mukwa ululi, alioze ayikolesele hali yihulia ni akwa kulolema, ni yitanganyanyi ni yivulumunyi, ni akwa luchisa ni yijiluke, ni akwa kulamba atato, ni akwa kulamba anaye, ni yingalwe, 10ni yitanji, ni akwa utumwa, ni yikwachi, ni akwa mahuza, ni akwa kulishinga ni mahuza, nyi kachi muchipwa chuma chimwe chikwo cha kulimika ni longeso lingunu; 11lize linate ni sango lipema lize hanangukunjika, lia uhenya wa Zambi wa kuwaha.
12Nakusakwilila yoze wakunguhashisa, iye Kristu Yesu Mwene wetu, mumu Wangumwene nguli wamwenemwene, hangusela ku uvumbiko; 13chipwe napwile kunyima mukwa kushililika Zambi, mukwa kuhungumiona, mukwa kupopolola: alioze nawanyine keke, mumu nachilingile ni kwalajala, nikuhona Ufulielo. 14Ni vumbi lia Mwene wetu lialumbamine kuhiana chikolo, hamwe ni Ufulielo, ni zango, lize lili muli Kristu Yesu. 15Liji lino liatela kufuliela, linatambe kutá cheswe, ngwo, Kristu Yesu wejile hano hashi mukulamwina yivulumunyi; hakachi ko, yami nahiana. 16Alioze ha chikuma chino nawanyine keke, hanga muli yami ngwe mutangu, Yesu Kristu akasolele uhomboloji wenyi weswe, chikapwe cheseko kuli waze mafuliela kuli iye ha mwono wa mutolo. 17Haliapwila kuli Mwanangana wa mutolo, keshi kuhasa kupola, keshi kumoneka, mwe Zambi umuwika, ulemu ni uhenya ukapwe ndo ku miaka yeswe ya mutolo. Amene.
18Shimbi yino ngunakukunjikayo, mwanami Timoteu, nikulita ni uprofeto wa kutwala kuli yena, hanga ukase nawo jita yipema. 19Ukakakaminye ku Ufulielo ni mbunge yipema; amwe se hanalichinjiyo, asakaminyine mu jila ha kutwala ku Ufulielo. 20A kuli ayo kanapu Heweneu ni Alezandre; wano naakunjikile kuli Satana, hanga akafumbiwe alitwamine kushililika Zambi.
Currently Selected:
WA TIMOTEU 1: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
