A-TESALONIKA 1
1
1Yetu, Paulu, ni Selevwanu, ni Timoteu, Ku chikungulwila cha A-Tesalonika muli Zambi Tata ni Mwene Yesu Kristu:
Vumbi kuli yenu ni sambukila.
2Twakusakwila kuli Zambi matangwa eswe hali yenu, nikunuvulwoka mu yilemba yetu. 3Kutushi kulitwamina kwiwuluka milimo yenu ya Ufulielo, ni kukilikita chenu cha zango, ni uhumikizo wa kutalatala chenu muli Mwene wetu Yesu Kristu, kumeso ja Zambi yetu kanda Tata yetu. 4Mumu yenu mandumbu jetu, kananuzange kuli Zambi, tunanyingika ngwe hananutongola. 5Mumu sango lietu lipema kuliejile kuli yenu ni liji wika, alioze ni tachi nawa, ni Spiritu Musandu, ni kukununa chinji; chizechene ngwe nunanyingika chize twapwile hakachi kenu mumu hali yenu. 6Ni yenu nwalumukine akwa kutwimbulula, ni akwa kwimbulula Mwene, se nwatambwile liji lia Mwene mu luyinda munji hamwe ni uwahililo wa Spiritu Musandu. 7Chocho nwalumukine yeseko kuli waze eswe akufuliela mu Masendoniya ni Akeya. 8Mumu kuli yenu liji lia Mwene hiliahiohia, hi mu Masendoniya ni Akeya wika ko, alioze nawa mu yifuchi yeswe Ufulielo wenu kuli Zambi hiunafumana; chocho kuchatutambile yetu kwamba nichimwe. 9Mumu ayo ene kakwambujola ha kutwala kuli yetu, kunjila chize twapwile nacho kuli yenu; ni ngwe chize nwatewulukilile kuli Zambi nikwehuka mahamba, mukulingila Zambi ya mwono, wamwenemwene, 10nikutwaminyina Mwanenyi ku malilu, yoze amuhindwishile hakachi ka afu, iye Yesu, yoze wakutupulula ku utenu uze muwizaho.
Currently Selected:
A-TESALONIKA 1: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
