A-TESALONIKA 2
2
1Mumu yenwene, mandumbu, nunanyingika kunjila chetu kuli yenu, kuchapwile chamokomoko; 2alioze se twevwile lamba kunyima, kuze atulingile chipi, chizechene ngwe nunanyingika, mu Fwilipu, twahamukine muli Zambi yetu kuhanjika kuli yenu sango lipema lia Zambi, hamwe ni kulitachika chinji. 3Mumu kushinjila chetu kuchapwile cha kwonga, hanji cha luchisa, hanji cha kalimbalimba, ka. 4Alioze chizechene ngwe hanatusela Shindakenyo yipema kuli Zambi, akatukunjike sango lipema, chocho twakuhanjika; hi ngwe mutupemena kuli atu ko, alioze tukapemene kuli Zambi, yoze wakweseka mbunge jetu. 5Mumu nilimwe tangwa kutwahanjikile ni maliji a kupepieka, chizechene ngwe nunanyingika, chipwe ni ulembekese wa kuzo, ka; Zambi iye chela; 6chipwe tukafupe uhenya kuli atu, chipwe kuli yenu, chipwe kuli akwo, ka, muze te twahasa kunulemena ngwe apostolo ja Kristu. 7Alioze twendele makoke mukachi kenu, chizechene ngwe muze naye masusuminya ana jenyi mwene. 8Chocho nikunufwila chikolo, chatuwahilile kulianyina ni yenu, hi sango lipema wika ko, alioze kulihana yetwene nawa, mumu nwapwile akwetu tunanuzange chikolo.
9Mumu nunewuluka, mandumbu, kukilikita chetu ni kuhondangana chetu; nikulinga milimo ufuku ni mwalwa, hanga kutuchi kalemena kuli niumwe wa kuli yenu, twambujolele kuli yenu sango lipema lia Zambi. 10Yenu nuli yela, ni Zambi nawa, ngwe chize twendele hakachi kenu akwa kufuliela, ni kulinanga ni ululi, chitela te kuchishiko. 11Chizechene ngwe nunanyingika, ngwe chize twapwile nikushinjila mweswe wa kuli yenu, ngwe umwe tato mashinjila ana jenyi mwene, nikunusangulwisa, nikushindakenya, 12hanga nukende ngwe chinatela Zambi, mukwa kunutambika ku wanangana wenyi mwene ni uhenya.
13Ha chikuma chino twakusakwila kuli Zambi, nikulitwamina nichimwe, ngwe muze nwatambwile liji lia sango lia Zambi kuli yetu, nwalitambwile hi ngwe liji lia atu ko, alioze chizechene ngwe liapwa chamwenemwene, liji lia Zambi, lienalio nawa kuliakulinga kanawa muli yenu akwa kufuliela. 14Mumu yenu, mandumbu, nwalumukine akwa kwimbulula yikungulwila ya Zambi yize yili mu Yundeya muli Kristu Yesu: mumu ni yenu nawa nwevwile lamba lia yuma yimuwika kuli akwa vungu lia yenwene, chizechene ngwe ayo nawa evwile kuli A-Yunda: 15waze ashihile Mwene Yesu ni aprofeta jo ene; atuhumine haze nawa; keshi kupemena kuli Zambi; kakulimika ni atu eswe. 16Kakutukanjisa kuhanjika kuli akwa mavungu, kuchina maalamwina; hanga akazalise liakulu njongo ya milonga yo matangwa eswe: alioze utenu hiuneza hali ayo liakulu.
17Alioze yetu, mandumbu, se tunahandunuka kuli yenu ha shimbu likepe mu mujimba, hi mu mbunge ko, twalipupwishile kuhiana kumona meso jenu ni usona wunji; 18mumu twazangile kwiza kuli yenu, yami Paulu, kanji kanji; alioze Satana watukwikile. 19Mumu chika kutalatala chetu, hanji uwahililo, hanji chipangula cha kulisamba? Hi yenwene ko kumeso ja Mwene wetu Yesu ha kuheta chenyi, nyi? 20Mumu yenu nunapu uhenya wetu ni uwahililo wetu.
Currently Selected:
A-TESALONIKA 2: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
