1 A-KORINDU 1
1
1Yetu, Paulu amutambikile postolo wa Yesu Kristu ku upale wa Zambi, ni ndumbu Sosetene,
2Ku chikungulwila cha Zambi chize chili mu Korindu, kuli waze hanaasela ku usandu muli Kristu Yesu, aatambikile asandu, hamwe ni waze eswe kweswe akutambika ha jina lia Mwene wetu Yesu Kristu, niwo kanda niwetu:
3Vumbi kuli yenu ni sambukila ya kuli Zambi Tata ni kuli Mwene Yesu Kristu.
4Nakusakwila kuli Zambi yami matangwa eswe, ha kutwala kuli yenu, ha vumbi lia Zambi lize anuhele muli Kristu Yesu; 5muli iye anupichishile yuma yeswe, ni maliji eswe, ni yinyingi yeswe; 6chizechene ngwe Shindakenyo ya Kristu ayikolesele muli yenu: 7chocho kunwahonene nichimwe chawana cha vumbi; nikulawoka usolwelo wa Mwene wetu Yesu Kristu. 8Yoze nawa kumakanukolesa ndo ku songo, hanga nukasambe ha tangwa lia Mwene wetu Yesu Kristu. 9Zambi keshi kwalumuka, kuli iye hananutambika ku kuliendela cha Mwanenyi Yesu Kristu Mwene wetu.
10Achi, ngunaliumbu kuli yenu, mandumbu, ku jina lia Mwene wetu Yesu Kristu, nukahanjike chuma chimuwika, kanda nulihandunyona hakachi kenu; alioze nukalinunge hamuwika ni kunyonga chimuwika ni upatwilo umuwika. 11Mumu hanangulwezecho ha kutwala kuli yenu, mandumbu jami, kuli akwa zuwo lia Choe, ngwo, Kuchili kulihangujola hakachi kenu. 12Achi, chino ngunambe ngwami, Mweswe wa kuli yenu kanambe ngwenyi, Ami nguli wa Paulu; ni mukwo ngwenyi, Ni yami nguli wa Apolu; ni mukwo ngwenyi, Ni yami nguli wa Sefwa; ni mukwo ngwenyi, Ni yami nguli wa Kristu. 13Kristu kanahandunuka, nyi? Ahachilile Paulu ha kulusu hali yenu, nyi? Hanji anupapachishile mu jina lia Paulu, nyi? 14Ngunasakwila kuli Zambi chapapachishile niumwe wa kuli yenu, shina Krispu ni Ngayu; 15kuchina umwe mamba ngwenyi, Hangupapachisa mu jina lia Paulu. 16Napapachishile akwa zuwo lia Eshetefwana nawa: mba Chanyingikine kachi napapachishile umwe mukwo nawa. 17Mumu Kristu kangutumineko mukupapachisa, alioze mukwambujola sango lipema: hi ni mana ja maliji ko, kuchina hanji kulusu ya Kristu mayipwisa yamokomoko.
18Mumu liji lia kulusu linapu uhepuke kuli waze anatoko; alioze kuli yetu, hanatulamwina, linapu je tachi ja Zambi. 19Mumu chinasonewa ngwo,
Kumungukonwona mana ja akwa mana,
kumungukalituna malinjekela ja akwa malinjekela.
20Ulihi mukwa mana? Ulihi mukwa kusonyeka? Ulihi mukwa kuhangujola wa mwakono? Zambi kahepwishileko mana ja mwakono, nyi? 21Se nikulita ni mana ja Zambi, akwa hashi ni mana jo kanyingikineko Zambi, chawahilile Zambi ni uhepuke wa kwambujola kulamwina waze anafuliela. 22Se A-Yunda kakwita yilayi, A-Ngresia kakufupa mana. 23Alioze yetu twakwambujola Kristu wa kuliachila ha kulusu, kuli A-Yunda chitalingiso, ni kuli akwa mavungu uhepuke; 24alioze kuli waze hanaatambika, ni A-Yunda ni A-Ngresia, Kristu je tachi ja Zambi ni e mana ja Zambi. 25Mumu uhepuke wa Zambi kuunahiana mana ja atu; ni ulelu wa Zambi kuunakangana atu.
26Mumu nyongenu mandumbu, chize anutambikile, hi akwa mana anji ko nikulita ni we musunya, hi akwa tachi anji ko, hi yilolo anji ko, hanaatambika. 27Alioze Zambi hanatongola yuma ya uhepuke ya hano hashi, hanga akakolese sonyi akwa mana, Zambi hanatongola yuma yilelu ya hano hashi, hanga akakolese sonyi yuma ya tachi; 28ni yuma yilelu ya hano hashi, ni yuma yamokomoko, Zambi hanatongola, ewa, ni yuma yize yakuhi, hanga akahwise yuma yize kuyili: 29hanga musunya niumwe kuuchi kalisamba kumeso ja Zambi. 30Alioze yenu nuli muli Kristu Yesu nikulita ni kulinga cha Zambi, yoze amupwishile kuli yetu, mana a kuli Zambi, ni ululi, ni usandu, ni ukule: 31hanga, nikulita ngwe chinasonewa ngwo, Yoze malisamba, akalisambe muli Mwene.
Currently Selected:
1 A-KORINDU 1: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
