1 A-KORINDU 2
2
1Yami, mandumbu, muze nejile kuli yenu, chejile ni kulenga cha maliji, hanji ni mana, nikwambujola kuli yenu Shindakenyo ya Zambi. 2Mumu napatwile ngwami, chichi kunyingika nichimwe hakachi kenu shina Yesu Kristu, wa kuliachila ha kulusu.
3Napwile hamwe ni yenu ni ulelu ni woma ni kuchikima chinji. 4Liji liami ni kwambujola chami kuyapwile ni maliji a kukununa ni mana ja atu, alioze ni kukumika cha Spiritu ni tachi: 5hanga Ufulielo wenu kuuchi kapwa mu mana ja atu, alioze ku tachi ja Zambi.
6Alioze twakuhanjika mana hakachi ka angunu: hindu hi mana ja mwakono ko, chipwe hi mana ja miata ja mwakono ko, aze meza kuhwa: 7alioze twakuhanjika mana ja Zambi mu chijimbikilo, te mana a kuhengama, aze Zambi wafunjikile shimbu kanda kushi lia miakulwila, ha uhenya wetu. 8Aze niumwe wa kuli miata ja mwakono kaanyingikineko, mumu kachi aanyingikine, kachi kahachilile ha kulusu Mwene wa uhenya. 9Alioze nikulita ngwe chinasonewa ngwo,
Yuma yize meso kayimwene, ni matwi kayivwile,
kuyanjilile mu mbunge ya mutu,
yuma yize hanalulika Zambi hali waze akumuzanga.
10Alioze Zambi hanayisolola kuli yetu ku tachi ja Spiritu: mumu Spiritu kakuhengula ha yuma yeswe, ewa, yuma yikalu ya Zambi. 11Mumu iya hakachi ka atu manyingika yuma ya mutu shina spiritu ya mutu, yize yili muli iye? Chizechene yuma ya Zambi niumwe manyingika shina Spiritu ya Zambi. 12Alioze kutwatambwile Spiritu ya hano hashi, alioze Spiritu yoze wa kuli Zambi; hanga tukanyingike yuma yize hanatwehe ni vumbi kuli Zambi. 13Ye yize twakuyihanjika, hi ni maliji aze ko mana ja atu akulongesa; alioze aze Spiritu kakulongesa; nikupalakenya yuma ya uspiritu ni uspiritu.
14Achi, mutu wa musunya keshi kutambula yuma ya Spiritu ya Zambi: mumu yinapu uhepuke kuli iye; iye kahashile kuyinyingika, mumu kakuyisa chinyingi ni Spiritu. 15Alioze mukwa uspiritu mapatula yuma yeswe, iye mwene keshi kumupatwila kuli niumwe. 16Mumu iya hananyingika kunyonga cha Mwene hanga akamufumbe? Alioze kunyonga cha Kristu tuli nacho yetu.
Currently Selected:
1 A-KORINDU 2: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
