Rom 6

Golnisden ad Ndorlaben i rumburdi du le longu masi momen.

1Malabo hi derbe, iou da bo longu momen sidegesi, boen golnisden ad Ndorlaben i da meher ndro du bulhe? 2Bugane, iou da ginmad le longu momen, iou mbuere longu momen i da mamaren le bergoldu. 3De danmu i bui, su gin surhi du gle ngarn ad Jesu Kristo, iou da ginmad, dege Jesu i ginmad. 4Ndran Helian i gin doni du le ngad, iou dege Kristo, damen gin hingeni i le ngad le ndoui aden ber lang, iou da dogi malabo gle ndoui houen. 5Iou dege i, be iou da ginmad, iou dege i lie, be iou dne, dege i gin ndne, 6dandu longu hendre ogo, Ndorlaben gin dadhe mandru momen sagen le beldigei ad Kristo bersi ge. Mandrn momen ge, i de bo longu momen bui, iou lao dandendegei le longu momen bugane. 7Ar homo i da ginmad longu momen de danen hinen i momen bui. 8Be iou da ginmad bersi le Jesu Kristo iou da mamaren ge bersi ndro i. Aga dandu i hian. 9Dandu longu hendre lie: Kristo, be i gin ndne lie le ngad aden i na gmed bersilie bui, longu hendre momen de danen ndounen i bugane. 10I ginmad bersi ge le surien longu momen. I da mamaren ge gle ndoui ad Jehova. 11Mu dagara lie, mu hanguruen le bergolmu longu momen masi i da ginmad, mu mamaren ge, mu ad Jehova ge gle ndoui ad Jesu Kristo, i Ndorlaben adu. 12Orgulue meluamu debosan longu momen ir ndounen mu, mu delengamu le hangungerou momen i da le mandrmu ber boan i da heb ndoa bui. 13Mandrmu de gob mburer le longu momen bui mu ghanguruen longu hendre ge: Mu da ginmad goru, malabo mu da mamaren ge, gob mburer ad Jehova ge mandrmu i ghinen longu hian monen le ndro Jehova. 14Longu momen de danen ndounen mu bui. Nongen ad Mose i da ndro mu bui, golnisden ad Ndorlaben, i ge, i da ndro mu.

15Malabo hi derbe, nongen ad Mose i da ndro mu bui, malabo iou da gob momen ge, golnisden ad Ndorlaben i esbui longu adu momen giao sidesi? Bugane, 16de danmu bui, ar homo i gob mburer ad hom ndorlaben, i lao dandendegei ad ndorlaben ogo, mu dagara lie, mu lao dandendegei ad homo ar delengamu le nongen ad homo. Mu lao dandendegei le longu momen, i da daii su lao aden, de mu lao dandendegei ad ndorlaben homo, i da bolumiamu. 17Iou mugueni Jehova, mahanu mu lao dandendegei le longu momen, malabo mu delengan le nongen ad Ndorlaben Jesu Kristo, dege su gin henunuen mu. 18I gin rumburdi mu le longu momen masi, malabo mu lao dandendegei le longu hian ge. 19Io da bosoui heb nongen ogo, io hanguruen, danmu longu ogo hian ge, aga longu hendre e hendre, dege i da meher ndro mu le gor ademu. Goru, mandrmu da gin bo mburer momen ge, mu da gin hanguruen longu momen ge, hian, malabo mandrmu i gob mburer hian monen ge mu horuan gleri. 20Be mu lao dandendegei le longu momen goru, mu de gin bo mburer hian hebsa bui. 21Sehe mburer mu da gin hinen i? Bombulmu i mesi malabo le longu ademu, mu da gin hinen i, mu na gmed leri. 22Malabo ge, Ndorlaben gin rumburdi mu, mu lao dandendegei ad Jehova. I da hengen le ndro mu, mu da rosan ge, bersi muren mu da mamaren ge sidesi le gor lundielang. 23Surian le longu momen aga: Su ndramed na gmed leri. Golnisden ad Jehova i ogoro: I hengen le ndro su, su mamaren ge sidesi le gor ad Jehova, gle ndoui ad Ndorlaben Jesu Kristo.

Currently Selected:

Rom 6: LLENT

Highlight

Copy