Boharni ad Johanes 2
2
Nongen ad Ndorlaben le ndro su lodu manondrdolo. Le ndro su Evesus.
1Ha hondre le ndro ndremda hernou ber lodu ad Ndorlaben i da le gor Evesus dege ogoro: I ge, i vong le ndro mu, biri manondrdolo i da le nemen sengen, i da hivane le dogro logna sul ber gold: 2Io dono mburer adem, io dono rang adem momen, io dono, uo ndoa le rang ber ngendiam, io dono uo ha somui le longu momen asu bui. Uo gin seslaini su holel, su gin bai, su Apostel, su gin bahilou ge, su Apostel bui. 3Ehe, uo ndoa, uo gin ibdi ngendian le ngoro, ndrnem i de gin med bui. 4Longu hendre i heb monen bui: Uo gin bieni golnisden adem ber goru. 5Hanguruen i, uo gin los dege ogoro belueni bern adem, ma ilndri bern ber goru. Be uo mbuerem, io gmeher ndro uo, io gbieni logna sul adem giao, be uo de belueni bern adem bui. 6Le longu hendre io mugueni uo: Uo da bo gus le ndro su ber Nikolai dege ndrno i mah le asu. 7Ar homo i delengan i hirong nongen ad Meluan i da boharni le ndro su ber lodu aden: Ar homo ir ndounen longu masi momen, io beg hengen le ndro i sengen ber gei hian ge, i da le beleng ad Jehova, i ghinen su ndramed mamaren.
Nongen le ndro su Smirna.
8Ha hondre le ndro ndremda hernou ber lodu ad Ndorlaben i da le gor Smirna, aga nongen aden ge ber nandugian i do da sidegesi, i da ginmad goru, boen i gin ndne lie le ngad aden. 9Io dono rang adem momen i da ndro uo, io dono heb memrad adem bugane, aga ndangen bui, memrad adem bulhe. Io dono su Juda su boii uo sidesi, su Juda monen bui, su ber skul ad Satan ge. 10Mbue uo go noh, be su bo ngendian ndro uo. E lele, beld Satan i ha leng bieni su holel ademu le kalabus, i seslaini mu, i gob ngendian le ndro mu le rang masongul. Ha somui Ndorlaben adem mabenan uo gamed, muren io beg hengen le ndro uo salion ber gor lundielang. 11Ar homo i delengan i hirong nongen ad Meluan i da boharni le ndro su ber lodu aden: Ar homo ir ndounen longu masi momen, i de somad bui.
Nongen le ndro su Pergamon.
12Ha hondre le ndro ndremda hernou ber lodu ad Ndorlaben, i da le gor Pergamon: I ge, i vong le ndro uo, nongen aden i dege mordo borla marn manden ge: 13Io dono gor adem, io dono, gor adem aga logna ad Satan, uo ge, uo gin boro ndoui le ngoro, uo gin boro ndoui ordo le rang ad Antipas, lao dandendegei ordo hian ge, uo de gin bieni io bui be su gin daii i, ndangen gor ademu aga logna ad Satan. 14Longu hendre ge io de dono mugueni bui: Su holel su da le molengamu, delengasu le nongen ad Bileam, i da gin henunuen Balak, i seslaini su Israel le longu asu momen, le dohor le ndro su beld, le bo longu sungsou. 15Su holel asu Nikolai su da le molengamu lie. 16Garbelueni bern adem, be uo mbuerem, io gmeher ndro uo roud, io grii uo le mordo borla i da le boho. 17Ar homo i delengan i hirong nongen ad Meluan i da boharni le ndro su ber lodu aden: Ar homo ir ndounen longu masi momen, io beg hengen le ndro i manna (aga bred ber belengan), io da gin bogulue i, io beg hengen le ndro i bad beren, ngarn houen io gin hondre le bad ogo, hom ndramed de danen ngarn ogo bui, i ge, i danen i, io beg hengen le ndro i.
Nongen le ndro su Tiatira.
18Ha hondre le ndro ndremda hernou ber lodu, i da le gor Tiatira: Aga nongen ad Ndur Jehova, begmarn i dege moan i da iad, ndegen i dege gold. 19Io dono mburer adem, io dono golnisden adem, io dono, uo gin boro ndoui ordo, io dono uo gin sobani su ndramed, io dono uo ndoa le rang adem momen, io dono mburer adem dsoln, uo bo mburer malabo manden ge. 20Longu hendre ge io de dono mugueni i bui, uo de sendraini bihin Isebel bui, i da vong, i hom Provet, i da henunuen su lao dandendegei ordo, i seslaini su, su bo longu sungsou, su dohor le ndro su beld. 21Heb rang hian i da ndro i, i garbelueni bern aden. I mbueren belueni bern aden momen. 22-23E lele, io gbieni i le berle aden, iab i ghedi i, io rii su, su da gin ha somui le longu momen ad bihin ogo, io gob ngendian le ndro su be su de bieni longu asu bui. Ndursu na gmed, boen su lao dandendegei ordo dansu i, io ge, io dono bergolsu e hanguruen asu ndramed. Muren io beg surien longu ad homo ma homo ademu, dege i gin hinen i, i hian de i momen. 24Malabo heb nongen le ndro mu ber Tiatira, mu de gin somui le longu ogo bui, mu de gin hanguruen longu ad beld Satan bugane io vong le ndro mu: Heb longu beruan beg meher ndro mu bui 25E boro memrad, i da ndro mu gle hian ge mabenan io gmehere. 26Ar homo ir ndounen longu momen masi, i ghinen mburer aden hian ge dege io ha lengi, io ghengen le ndro i ndoui, i ndoa le ndro su Haiden. 27I gobgulue su gle ndes aiern, i ndumbue su, dege homo i da ndumbue gor ber um hom. 28Ndoui ogo i da ndro io, Bo Domo gin hengeni me ndro io, io ghengen le ndro i biri ber mabing. 29Ar homo i delengan i hirong nongen ad Meluan i da boharni le ndro su ber lodu aden!
Currently Selected:
Boharni ad Johanes 2: LLENT
Highlight
Copy
Compare
Share
Want to have your highlights saved across all your devices? Sign up or sign in
Published by the British and Foreign Bible Society 1956
