Jakobus 5
5
Dogi monen debosan mu gina momen le bing manden ad Jehova.
1Heb longu hendre lie: Mu labenen ber gor, memrad ademu dsoln, ha reng, ha dang gle ngendian ademu, i da beg meher le ndro mu. 2Memrad ademu gina momen, ul gin ieni salo ademu, 3rost gin ieni moni ademu, rost i da le memrad ademu i gob gord le ndro mu, rost ber memrad ademu i gien sengen ademu, dege moan i dilmui. Malabo rang ber boan baghege gina boen, mu gin hanguruen memrad ademu ge, mu gin huri me goure. 4Ghanguruen i: Mu de gin hengen le ndro su lao ademu, su da gin bo mburer le beleng ademu, heb surien monen asu bugane. Memrad ogo i da loholo le belengan, su lao dandendegei ademu, su da reng le ndro Ndorlaben le longu ademu momen, Ndorlaben gin hirong i. 5Mu da gin bo gous le boan ogo, mu da gin ien gan dsoln le gor ademu, mandrmu gina naman ge. 6Mu gin bo gord le ndro su ndramed hian ge, mu gin daii su ndramed monen ge. Su de gin bo iil heb le ndro mu bugane. 7Mu ndere hian, ha belengeni rang ad Ndorlaben, i da beg mehere. Danmu, homo i da gin daui gan le beleng aden, i ha belengeni gan, i bogulue beleng aden be lengen gin meher ri, be gan gina reg hian monen ge, boen i hedi gan anen le um aden. 8Hian mu dagara lie, bergolmu i ndoa gle ndoui ber lang. E lele, Ndorlaben i gmeher roud, i da baghege ndro du. 9Mbue bangondrngondr homo le ndro homo, mu ndere hian, debosan su gob gord le ndro mu. Hanguruen i: Ndremda gord i da baghege le babi. 10Mu ndere hian, ghanguruen su Provet le rang asu momen, su gin ibdi ngendian asu, su gin ha somui ri. Ghinen i dege su gin hinen i, su da gin bohernou le ngarn ad Ndorlaben. 11E lele, iou bamugueni su, su da gin belengeni Ndorlaben le rang asu momen. Mu gin hirong le ad Hiob, i da ndoa le ndoui ad Ndorlaben, danmu Ndorlaben i gin bo sa le ndro i, ghanguruen i, Ndorlaben i da ibdi gahaloseli manden ge, i golnisden dsoln.
12Mu ndere hian, ghanguruen i: Mbue daui nememu le belengan, mbue vong ndangen le belengan, mbue vong ndangen gor boan, de heb nongen dege ogoro. Ehe ademu, i ehe ndangen; bugane ademu, i bugane ndangen; debosan Ndorlaben i gob gord le ndro mu. 13-14Be rang momen i da ndro mu, hian gob raring. Ar rang hian i da ndro homo, i gabmugueni Ndorlaben le gagaile aden. Ar homo ademu gina sik, i eloh su labenen ber lodu, su ogo, su soling ndro Ndorlaben le bormarn, hanu su daui ndrelgei le mandrn le ngarn ad Ndorlaben. 15Muren Ndorlaben i ha somui le soling asu, i sobani ndramed i gina sik, i gregurdueni i. Be i gin hinen longu hendre momen, i esbui longu aden momen giao. 16Gobharni longu ademu momen homo ma homo, ha soling ndro Ndorlaben homo le ad homo, boen Ndorlaben i gregurdueni mu. Ndoui manden ge i da le soling ad hom lao ad Jesu. 17Elia, i hom ndramed dege iou. I gin soling ndro Jehova ndoun, Jehova i vadi babi ber lang, heb lengen da gin meher le boan bui le kristmas madolo sehendr. 18Boen i ha soling bersilie, e lele, lang gin deh, lengen gin ndrud le boan, sengen asu ndramed, gan ansu gin meher ri. 19Mu ndere, ar homo ademu gin bieni sal hian i gina le sal momen, ar homo gin dulieni i mul le sal hian, 20ghanguruen i: Ar homo gin dulieni hom ndramed momen, i da le sal aden momen mul, gle sal hian, i gin rumburdi meluan ad ndramed ogo le moan manden. Jehova i esbui longu aden mabosanged giao.
Currently Selected:
Jakobus 5: LLENT
Highlight
Copy
Compare
Share
Want to have your highlights saved across all your devices? Sign up or sign in
Published by the British and Foreign Bible Society 1956
