Hebru 13
13
Heb nongen le bern hian le born.
1Hian mu ndoa le golnisden ademu le ndro su ndere. 2Ha somui su ber gor manan gle um ademu, su holel su gin bogulue su Angelo le um asu, dansu ri bui. 3Hanguruen su, su da le kalabus, golmugisden su, ghanguruen su, su da gin bo ngendian le ndro su, hian, ngendian asu i dege ngendian ademu. 4Homo ma homo i hanguruen nambulen ge, i de bo momen le ndro i bui, Jehova i bo gord le ndro su, su da bieni nambulsu, su da bo sungsou. 5Mbue meruamu dsoln, mbue hangungerou moni de memrad ber boan, longu i da ndro mu, aga i vonei le ademu. Jehova i ge gin bai: Io beg hanguruen uo sidegesi, beg sobani uo, io de gbieni uo bui. 6Iou ge, iou vong: Ndorlaben, i ge, i sobani io, io de noh hebsa bui, sehe longu momen su ndramed dansu hinen me ndro io ie?
7Hanguruen su labenen ber lodu, su da gin bohernou le ndro mu nongen ad Jehova. Hian ghanguruen su, su gin dogi, hi derbe, hian mu do ndrbon sal asu. 8Jesu Kristo ber bihe, i range dagara lie, i dege ogoro bing si e rang si sidegesi. 9Mbue delengamu, be su holel beg henunuen mu le sal momen ge. Aga i hian ge, ar bergoln i ndoa le golnisden ad Ndorlaben. Mbue de hanguruen bandri le gan hendre e hendre. I de bo hian le ndro homo bui. 10Geao ad Ndorlaben i da le molengamu, su de dansu gien leri bui, su ghanguruen longu ber goru. 11Be Ndurhian asu Prister gin hedi ndrai asu meh, su hedi sengen le marbohon gor, su bieni i le moan, moan i dilmui, ndurhian asu Prister i hedi ndrai ad ndurmeh, i la lundieum helian helian gane, i dohor le ndro Jehova. 12Jesu dagara lie, i gin dohor ndrai aden helian i gin ibdi ngendian le mandrn le marbohon gor. 13Hian, iou gbieni gor, iou la born ndro i le marbohon gor, iou ha leng sab ngendian aden. 14Gor adu i ber boan bui, iou gahi gor ber lundielang. 15Iou ha leng mugueni Ndorlaben gle ndoui ad Kristo, iou da dohor mugueni adu le ndro i, aga sengen hian ge ber gei adu. Iou gabmugueni ngarn gleri. 16Osbani su gle memrad ademu, ghanguruen su, su heb ndoa bui, aga dohor hian ge, dandu mugueni Jehova gleri. 17Delengamu le nongen asu ndremda hernou ademu, ha hirong nongen asu, su da bogulue mu sidesi. Bersi muren Jehova i bo gord le ndro su, le mburer su da gin hinen i, i hian de i momen. Io mbuere su ngundr le mburer asu, aga i de hian de la ndro mu bui. Su ha mugmug ge le mburer asu. 18Hanguruen du be mu ha soling le ndro Ndorlaben. Dandu, bergoldu, i monen ge, iou ha leng dogi monen le sal adu sidesi. 19Io ha lengi, mu ghanguruen io le raring ademu, io dono gmeher le gor ademu roud.
20Jehova Ndorlaben ber mandri, i da gin hingeni Jesu Ndorlaben adu, ndremda bogulue su meh aden, le ngad aden, le ndoui ber ndrai aden, 21i ogo i ghengen le ndro mu gle hian ge, dege i ha lengi, i gob mburer gle bergolmu dege i voaniso gle ndoui ad Jesu Kristo. Iou bamugueni i bing si e rang si sidegesi. Amen.
22-23Mu ndere hian, io ha soling ndro mu, delengamu le nongen ogo, nongen ordo io da gin hondre le ndro mu, i de dsoln bui, ghanguruen longu hendre ogo: Ndere Timoteus gin bieni kalabus io la born ndro i, io dono ilndri mu lie, be io mehere ndro mu. 24Io beani nongen hian le ndro su labenen ber lodu, ma le ndro su lao ad Jesu helian masi. Su nderedu ber Italia su beani nongen hian le ndro mu. 25Golnisden ad Ndorlaben i da ge ndro mu masi. Amen.
Currently Selected:
Hebru 13: LLENT
Highlight
Copy
Compare
Share
Want to have your highlights saved across all your devices? Sign up or sign in
Published by the British and Foreign Bible Society 1956
