Galatia 6
6
Laeng musti tolong laeng
6:1-10
1Basudara e, kalo kamong dapa lia basudara satu yang parcaya Yesus ada biking dosa, kamong yang pung hidop dapa pimping dari Allah pung Roh musti kasi bale dia ka jalang yang batul kombali deng cara bae-bae. Mar waktu kamong biking bagitu, kamong musti jaga diri bae-bae lai biar kamong sandiri jua seng biking dosa. 2Kamong musti laeng lia laeng pung susa. Deng cara bagitu, kamong su biking Kristus pung parenta. 3Kalo ada orang yang anggap dia pung diri tu labe panting dari orang laeng, biar kata itu seng batul, itu sama sa deng dia tu su parlente dia pung diri sandiri. 4Labe bae satu-satu lia dia pung diri sandiri kalo apa yang dia biking tu su batul ka balong. Kalo su batul baru dia bisa sanang deng akang, mar jang sanang tagal banding dia pung diri deng orang laeng. 5Barang, satu-satu musti tanggong jawab par apa yang dia biking sandiri.
6La sapa yang tarima Allah pung ajarang, dia musti bage apa sa yang dia pung par orang yang su kasi balajar ajarang tu par dia.
7Basudara e, jang bodo! Katong seng bisa parlente Allah. Beta bilang bagini tagal apa yang orang tanang, itu jua yang nanti dia dapa. 8Sapa yang biking dosa iko dia pung tabiat yang jahat tu pung mau, dia nanti ancor tagal dia pung tabiat yang jahat tu. Mar sapa yang biking apa yang bae iko Allah pung Roh pung mau, dia nanti hidop tarus-tarus tagal Allah pung Roh tu.
9Tagal itu, jang barenti par biking apa yang bae. Barang, pas waktu yang Allah su ator, katong nanti dapa hasil dari apa yang katong su biking tu, asal katong seng pata samangat par biking apa yang bae tu tarus. 10Jadi, waktu katong masi ada pung kans par biking apa yang bae, mari katong biking akang par samua orang, labe-labe lai par katong pung basudara yang parcaya Yesus.
Paulus tutu dia pung surat
6:11-18
11Basudara e, taru kira beta pung tulisang yang basar-basar yang beta sandiri tulis par kamong ni!#6:11 Paulus jaga pake orang laeng par tulis dia pung surat. Mar dia jua tulis sadiki deng dia pung tangang sandiri. Dia biking bagitu biar orang-orang tau kalo surat tu batul-batul dari dia, bukang surat parlente yang orang laeng tulis pake dia pung nama. Lia 1 Korintus 16:21, Kolose 4:18, deng 2 Tesalonika 3:17. 12Orang-orang yang suka cari muka par orang Yahudi laeng tu, dong tu yang coba paksa kamong par dapa sunat iko Hukum Torat. Dong biking bagitu cuma biar orang Yahudi laeng seng siksa dong tagal kasi balajar orang-orang soal Kristus yang mati di kayo salib. 13Mala dong yang su dapa sunat tu, dong sandiri jua seng biking Hukum Torat samua. Mar, dong mau kamong dapa sunat biar dong bisa bicara mangarti di muka orang Yahudi laeng, kalo kamong su iko atorang-atorang yang manusia bisa lia tu. 14Mar kalo par beta, beta seng mau sama sakali par bicara mangarti soal satu hal lai, cuma soal apa yang Tuhan Yesus Kristus yang katong somba tu su biking di kayo salib sa. Waktu Yesus mati di kayo salib, beta macang kata su mati sama-sama deng Antua, jadi beta seng taika lai deng apapa yang ada di dunya ni. La dunya ni su seng taika lai deng beta. 15Dapa sunat ka seng dapa sunat ka, itu seng ada pung arti apapa. Yang panting tu Tuhan roba katong jadi manusia yang pung hidop baru.
16Beta minta biar Allah kasi dame deng kasi unju Antua pung hati bae par orang-orang yang hidop iko ajarang yang beta baru bilang ni, mala par samua orang yang Allah su pili par jadi Antua pung orang-orang lai.#6:16 Teks bahasa Yunani bilang orang yang Allah su pili par jadi Antua pung orang-orang lai tu par “Allah pung orang-orang Israel”. 17Laste, jang ada orang yang biking beta pung hati susa lai. Barang, di beta pung badang ni ada bakas-bakas luka yang jadi bukti kalo beta ni Yesus pung orang karja. 18Beta minta biar Tuhan Yesus Kristus yang katong somba tu kasi berkat basar par basudara samua. Amin.
Hormat, Paulus
Currently Selected:
Galatia 6: ABMA
Highlight
Copy
Compare
Share
Want to have your highlights saved across all your devices? Sign up or sign in
© 2022, Sinode Gereja Protestan Maluku
