Popular Bible Verses from Galatia 6

Share

Tagal itu, jang barenti par biking apa yang bae. Barang, pas waktu yang Allah su ator, katong nanti dapa hasil dari apa yang katong su biking tu, asal katong seng pata samangat par biking apa yang bae tu tarus.

Jadi, waktu katong masi ada pung kans par biking apa yang bae, mari katong biking akang par samua orang, labe-labe lai par katong pung basudara yang parcaya Yesus.

Kamong musti laeng lia laeng pung susa. Deng cara bagitu, kamong su biking Kristus pung parenta.

Basudara e, jang bodo! Katong seng bisa parlente Allah. Beta bilang bagini tagal apa yang orang tanang, itu jua yang nanti dia dapa.

Sapa yang biking dosa iko dia pung tabiat yang jahat tu pung mau, dia nanti ancor tagal dia pung tabiat yang jahat tu. Mar sapa yang biking apa yang bae iko Allah pung Roh pung mau, dia nanti hidop tarus-tarus tagal Allah pung Roh tu.

Basudara e, kalo kamong dapa lia basudara satu yang parcaya Yesus ada biking dosa, kamong yang pung hidop dapa pimping dari Allah pung Roh musti kasi bale dia ka jalang yang batul kombali deng cara bae-bae. Mar waktu kamong biking bagitu, kamong musti jaga diri bae-bae lai biar kamong sandiri jua seng biking dosa.

Kalo ada orang yang anggap dia pung diri tu labe panting dari orang laeng, biar kata itu seng batul, itu sama sa deng dia tu su parlente dia pung diri sandiri. Labe bae satu-satu lia dia pung diri sandiri kalo apa yang dia biking tu su batul ka balong. Kalo su batul baru dia bisa sanang deng akang, mar jang sanang tagal banding dia pung diri deng orang laeng. Barang, satu-satu musti tanggong jawab par apa yang dia biking sandiri.