1 Korintus 16
16
Soal kepeng par bantu basudara di Yerusalem
16:1-4
1Basudara e! Soal kepeng yang kamong mau kumpul par Tuhan pung orang-orang di kota Yerusalem tu, beta minta biar kamong biking akang iko apa yang beta su bilang par jamaat-jamaat di propinsi Galatia. 2Sabang hari Minggu, kamong satu-satu jang lupa angka kepeng sadiki dari apa yang kamong dapa la simpang akang, biar jang sampe waktu beta datang baru kamong bagara par kumpul akang. 3Pas beta datang baru beta utus orang-orang yang kamong anggap pantas par pi antar kepeng tu ka Yerusalem. Nanti baru beta tulis surat sapanggal par kasi kanal dong deng jamaat di sana. 4Kalo kamong pikir bagus par beta pi lai, beta nanti pi sama-sama deng dong.
Paulus pung rencana
16:5-12
5Basudara e! Abis koliling propinsi Makedonia, beta nanti pi baku dapa kamong di kota Korintus, tagal memang beta mau lewat propinsi Makedonia kamuka do.#Utusang pung Carita 19:21 6Sampe di situ, mangkali beta tinggal sadiki lama deng kamong do, ka mala tinggal sampe abis musing ujang, biar kamong bisa tolong beta par pi ka tampa laeng. 7Tagal sakarang ni, beta seng mau tinggal deng kamong sadiki tempo sa. Kalo Tuhan sayang, beta harap bisa tinggal sadiki lama deng kamong. 8Mar par sakarang ni, beta mau tinggal di kota Efesus ni sampe hari basar Pentakosta#16:8 Orang Yahudi pung hari basar Pentakosta tu hari ambe hasil gandum. Waktu itu, orang Yahudi samua datang bakumpul di kota Yerusalem par iko hari basar ni sama-sama. do, 9tagal Tuhan buka jalang par beta di sini par biking Antua pung karja yang panting, biar kata ada banya orang yang malawang beta.#Utusang pung Carita 19:8-10
10Kalo Timotius datang,#1 Korintus 4:17 beta harap biar kamong tarima dia bae-bae, biar dia seng parlu taku soal apa sa. Barang, dia jua karja par Tuhan sama deng beta. 11Jadi jang ada orang yang lia dia deng mata sabala. Mala kamong musti bantu dia biar dia bisa bale kamari par beta deng salamat. Barang, beta deng basudara yang parcaya Yesus di sini ada tunggu dia datang.#16:11 Ka, “Barang, beta di sini ada tunggu dia deng basudara yang laeng par datang.”
12Soal katong pung sudara Apolos tu, beta su buju dia ulang-ulang par pi lia kamong sama-sama deng basudara yang parcaya Yesus yang laeng. Mar dia masi balong mau pi sakarang. Kalo ada kans baru dia pi.
Paulus tutu dia pung surat
16:13-24
13Kamong musti ati-ati deng jaga diri bae-bae! Kamong musti pegang kuat-kuat kamong pung parcaya tu tarus. Kamong musti barani deng tetap kuat dalang kamong pung parcaya par Antua. 14La kasi unju kamong pung sayang par orang laeng waktu biking apa sa.
15Kamong su tau kalo Stefanus deng dia pung kaluarga tu orang-orang yang partama kali parcaya Yesus di propinsi Akaya#16:15 Stefanus dong tu tinggal di kota Korintus, yang ada di propinsi Akaya. deng yang su karja deng sunggu-sunggu par tolong basudara yang parcaya Yesus. Tagal itu basudara e, beta minta kamong 16dengar-dengarang orang-orang macang bagitu ka sapa sa yang su karja banting tulang par Tuhan macang deng dong. 17Beta sanang tagal Stefanus, Fortunatus, deng Akaikus datang kamari, tagal dong ganti kamong di sini. 18Barang, dong kasi kuat beta pung hati sama deng dong kasi kuat kamong lai. Ingatang! Taru hormat par orang-orang macang bagitu.
19Jamaat-jamaat di propinsi Asia kiring hormat par kamong. Akwila deng Priskila,#16:19 Akwila deng Priskila tu orang Kristen yang dolo tinggal di kota Korintus mar su pinda ka kota Efesus. Jadi waktu Paulus tulis surat par jamaat Korintus ni, dong jua ada sama-sama deng dia di Efesus. Lia Utusang pung Carita 18:1-2, 18-19. bagitu lai deng jamaat yang jaga bakumpul par ibada di dong pung ruma kiring hormat banya-banya par kamong yang sama-sama parcaya Tuhan. 20Basudara jamaat samua yang ada di sini kiring hormat par kamong. Kalo kamong baku dapa, kasi salam manis#16:20 Kasi salam manis: Bahasa Yunani bilang, “ciong kudus”. Waktu itu, orang-orang biasa baku kasi salam manis deng cara ciong pipi. satu deng laeng.
21Salam dari beta, Paulus. Beta sandiri yang tulis salam ni.#16:21 Paulus jaga pake orang laeng par tulis dia pung surat. Mar dia jua tulis sadiki deng dia pung tangang sandiri. Dia biking bagitu biar orang-orang tau kalo surat tu batul-batul dari dia, bukang surat parlente yang orang laeng tulis pake dia pung nama. Lia Galatia 6:11, Kolose 4:18, deng 2 Tesalonika 3:17. 22Sapa yang seng sayang Tuhan, dia nanti dapa hukum tarus-tarus. Maranata, Tuhan Yesus datang jua! 23Beta minta biar Tuhan Yesus kasi unju Antua pung hati bae par kamong. 24Beta sayang kamong samua yang parcaya Yesus Kristus.
Hormat, Paulus
Currently Selected:
1 Korintus 16: ABMA
Highlight
Copy
Compare
Share
Want to have your highlights saved across all your devices? Sign up or sign in
© 2022, Sinode Gereja Protestan Maluku
