1 Korintus 15
15
Yesus Kristus hidop kombali
15:1-11
1Basudara e! Sakarang beta mau kasi inga kamong kombali soal Kabar Bae yang beta su kasi tau par kamong tu. Kamong su tarima akang deng sampe sakarang masi tetap pegang akang kuat-kuat. 2Kalo kamong tetap pegang Kabar Bae yang beta su kasi tau tu kuat-kuat, kamong salamat. Mar kalo seng, parcuma sa kamong parcaya.
3Beta su bilang hal yang paleng panting par kamong yang beta sandiri su tarima. Hal yang paleng panting tu: Kristus su mati par tabus katong pung dosa-dosa, sama deng apa yang tatulis dalang Allah pung Tulisang.#Yesaya 53:5-12 4Antua su dapa kubur, mar dapa kasi hidop kombali pas hari yang katiga, sama deng apa yang tatulis dalang Allah pung Tulisang.#Lagu-Lagu 16:8-10; Matius 12:40; Utusang pung Carita 2:24-35, 13:32-37 5Abis itu, Antua su kasi unju diri par Petrus#15:5 Petrus: Teks bahasa Yunani bilang, Kefas. Itu tu Petrus pung nama laeng. Lia Yohanis 1:42. la par Antua pung murid sapulu dua orang tu.#Matius 28:16-17; Markus 16:14; Lukas 24:34-36; Yohanis 20:19 6Abis itu, Antua kasi unju diri par labe dari lima ratus orang yang parcaya Antua satu kali jalang. Banya dari dong yang masi hidop sampe oras ni, mar satu dua su mati. 7Abis itu, Antua kasi unju diri par Yakobis la abis itu par Antua pung utusang-utusang samua.
8La yang laste, Antua kasi unju diri jua par beta. Jadi beta ni macang deng ana yang lahir dari balakang paskali. 9Beta bilang bagitu tagal dari Yesus pung utusang-utusang samua, beta ni yang paleng hina, mala seng pantas dapa panggel par Antua pung utusang. Barang, beta yang siksa Allah pung orang-orang.#Utusang pung Carita 8:3 10Mar tagal Allah pung hati bae par beta, beta jadi macang sakarang ni. Antua pung sayang deng hati bae par beta tu seng parcuma. Mala dari Antua pung utusang-utusang samua, beta su karja banting tulang labe dari dong samua. Beta seng biking akang deng beta pung kuat sandiri, mar tagal Allah pung hati bae par beta, Antua tolong beta par biking akang. 11Jadi, seng apapa kalo beta ka Yesus pung utusang-utusang yang laeng kasi balajar Kabar Bae par kamong. Yang panting katong su kasi balajar ajarang yang sama par kamong la kamong parcaya akang.
Orang mati nanti hidop kombali
15:12-19
12Basudara e! Kalo katong su kasi balajar kamong kata Kristus su dapa kasi hidop kombali, mangapa kong ada dari kamong yang bilang kata orang yang su mati seng bisa hidop kombali lai? 13Kalo orang yang su mati seng hidop kombali, Kristus jua seng hidop kombali. 14Mar kalo Kristus seng hidop kombali, parcuma sa katong kasi balajar kamong soal Antua deng parcuma sa kamong parcaya Antua. 15Labe-labe lai, kalo memang batul Allah seng kasi hidop orang mati kombali, itu sama sa deng katong su parlente kamong soal Allah. Barang katong bilang kata Antua su kasi hidop Kristus kombali, sapa tau orang mati seng bisa hidop kombali. 16Barang, kalo memang batul Allah seng kasi hidop orang mati kombali, Antua jua pasti seng kasi hidop Kristus kombali. 17Kalo Allah seng kasi hidop Kristus kombali, parcuma sa kamong parcaya la kamong pung dosa-dosa seng dapa kasi ampong. 18Bagitu lai deng orang-orang yang su satu hati deng Kristus yang su mati, dong pasti binasa. 19Kalo katong taru harap par Kristus cuma soal katong pung hidop di dunya sakarang ni sa, katong ni orang yang paleng kasiang dari samua orang di dunya.
Katong nanti hidop kombali
15:20-28
20Mar yang batul tu Allah su kasi hidop Kristus kombali. Antua tu yang partama paskali dapa kasi hidop kombali dari samua orang yang su mati. 21Barang, tagal satu orang sampe samua orang musti mati, mar tagal satu orang jua sampe Allah nanti kasi hidop orang-orang yang su mati. 22Tagal samua orang tu Adam pung anana cucu, jadi samua orang musti mati. Mar samua orang yang satu hati deng Kristus, Allah nanti kasi hidop dong kombali. 23Mar dong yang hidop kombali tu musti tunggu dong pung bagiang. Nomor satu, Kristus hidop kombali kamuka do baru Antua pung orang-orang waktu Antua bale kombali. 24Abis itu baru dunya sakarang ni abis. Waktu itu, Antua kasi kala samua yang pegang parenta, yang pung kuasa, deng yang kuat. La Kristus yang jadi Raja tu kasi Antua pung kuasa tu par Allah, Antua pung Bapa. 25Barang, Kristus musti tetap pegang parenta sampe Allah kasi kala Kristus pung musu-musu la biking dong tundu par Kristus.#Lagu-Lagu 110:1 26Musu yang Antua kasi binasa paleng laste tu kamatiang. 27Barang, dalang Allah pung Tulisang ada bilang kata Allah su kasi kala samua-samua biar samua-samua tu tundu par Kristus.#Lagu-Lagu 8:7 Waktu bilang “samua-samua tu tundu par Antua”, itu jelas kalo Allah sandiri seng tundu par Kristus mar biking sampe samua-samua tu tundu par Antua. 28Mar abis samua-samua tu dapa kasi kala la tundu par Kristus, Kristus sandiri nanti tundu par Antua pung Bapa, yang kasi kala la biking sampe samua-samua tundu par Antua. Deng bagitu, Allah nanti parenta samua-samua.
Jang kasi biar orang parlente kamong kalo orang mati nanti seng hidop kombali
15:29-34
29Kalo memang Allah seng kasi hidop orang yang su mati, mangapa kong ada orang-orang yang mau dapa baptis par ganti dong pung sudara yang su mati? Kalo memang orang yang su mati seng hidop kombali, mangapa kong dong tinggal biking dong pung adat macang bagitu? 30La kalo memang orang yang su mati seng hidop kombali, mangapa kong katong musti bawa diri dalang bahaya siang-malang? 31Sabang hari beta ada dalang bahaya sampe amper-amper mati, sio basudara e. Beta seng parlente, sama deng beta jua seng parlente waktu bilang kalo beta sanang tagal kamong parcaya Tuhan Yesus Kristus yang katong somba. 32Kalo memang orang yang su mati seng hidop kombali, mangapa kong beta lawang orang-orang yang musu beta macang babi luka di kota Efesus ni? Seng ada untung par beta. Kalo memang Allah seng kasi hidop orang yang su mati, “Mari katong makang-minong, tagal eso katong mati.”#Yesaya 22:13
33Ingatang, jang sampe orang parlente kamong deng ajarang-ajarang macang bagitu! Kalo kamong baku tamang deng orang-orang yang kasi balajar ajarang-ajarang yang seng batul tu, kamong nanti rusak! 34Jadi, kamong musti batul-batul sadar deng jang biking dosa lai. Ada dari kamong yang balong batul-batul kanal Allah. Beta bilang bagitu biar kamong malu.
Katong pung badang yang baru
15:35-58
35Mangkali ada yang bilang bagini, “Masa orang yang su mati bisa hidop kombali tu bagemana? Kalo dong pung badang ancor, dong nanti hidop kombali deng badang macang bagemana?” 36Cuma orang bodo sa yang tanya macang bagitu. Kalo kamong tanang biji satu bagitu, akang musti mati do baru akang bisa batumbu.#15:36 Waktu itu, orang-orang pikir kata kalo tanang biji satu dalang tana, itu sama sa deng biji tu su mati. Lia Yohanis 12:24. 37La waktu kamong tanang, kamong seng tanang tatanamang tu pung bagiang-bagiang antero-antero samua, cuma akang pung biji sa. Conto macang biji gandum ka biji-biji laeng. 38Mar, Allah nanti kasi batumbu biji-biji tu iko akang pung model sandiri-sandiri iko Antua pung mau.
39Samua yang hidop ni pung badang seng sama. Manusia pung badang beda deng binatang pung badang. Burung pung badang beda deng ikang pung badang. 40Bagitu lai deng samua yang ada di langit deng yang ada di dunya. Yang ada di langit, akang pung bagus beda deng yang ada di dunya. 41Matahari pung bagus seng sama deng bulang pung bagus. Bulang pung bagus beda deng bintang-bintang pung bagus. Mala bintang satu pung bagus beda deng bintang laeng pung bagus. 42Bagitu lai deng katong pung badang waktu katong dapa kasi hidop kombali. Badang yang dapa kubur tu nanti ancor, mar badang yang Allah kasi waktu Antua kasi hidop katong kombali tu seng bisa ancor. 43Badang yang dapa kubur tu seng bagus, mar badang yang Antua kasi waktu Antua kasi hidop katong kombali tu bagus. Badang yang dapa kubur tu seng kuat, mar badang yang Antua kasi waktu Antua kasi hidop katong kombali tu kuat. 44Badang yang dapa kubur tu badang yang asal dari dunya ni, mar badang yang Antua kasi waktu Antua kasi hidop katong kombali tu badang yang asal dari Antua pung Roh pung kuasa.
Kalo ada badang yang asal dari dunya ni, itu pung arti ada badang yang asal dari Tuhan pung Roh lai. 45Sama deng apa yang Antua pung Tulisang bilang, “Tuhan biking manusia partama yang nama Adam tu jadi hidop.”#Carita Mula-Mula 2:7 Mar, Yesus Kristus yang sama deng Adam yang laste tu nanti biking orang-orang yang parcaya Antua tu hidop tarus-tarus. 46Yang Allah kasi kamuka tu badang par pake di dunya ni. Abis itu baru Antua kasi badang par pake di sorga. 47Adam partama tu dari abu tana, mar Kristus yang sama deng Adam kadua tu dari sorga. 48Samua orang yang hidop di dunya ni, dong pung badang sama deng Adam partama yang Allah biking dari abu tana. Mar samua orang yang nanti ada di sorga, dong pung badang sama deng Adam kadua yang asal dari sorga tu. 49Sakarang, katong pung badang ni macang deng Adam partama pung badang. Mar waktu katong hidop kombali, Antua nanti kasi badang yang baru macang deng Adam kadua dari sorga tu pung badang.
50Jadi basudara e, beta mau bilang ini par kamong: Katong seng bisa tinggal sama-sama deng Allah di Antua pung tampa pegang parenta jadi Raja deng badang yang katong pake par hidop di dunya ni. Katong seng bisa hidop deng badang yang bisa ancor di tampa yang orang pung badang seng bisa ancor tu.
51Dengar apa yang beta mau bilang ni, tagal dari dolo akang tatutu mati: Waktu Yesus bale kombali, ada dari katong yang balong mati. Mar katong samua yang masi hidop ka yang su mati ka nanti dapa roba. 52Waktu tahuri babunyi par yang laste paskali, skrek lai katong su dapa roba. Itu jadi paleng capat paskali, tutu buka mata sa. Barang waktu tahuri babunyi, orang-orang yang su mati nanti dapa kasi hidop kombali. Tarus dong nanti dapa badang yang baru yang seng bisa ancor. La katong yang masi hidop ni, katong pung badang ni jua nanti dapa roba jadi baru macang dong lai.#1 Tesalonika 4:15-17 53Barang, katong pung badang yang bisa ancor deng binasa ni musti dapa ganti deng badang yang baru yang seng bisa ancor deng binasa. 54La abis katong pung badang yang bisa ancor deng binasa ni dapa ganti deng badang yang seng bisa ancor deng binasa, apa yang Allah pung Tulisang bilang tu su jadi. Akang bilang,
“Allah su kasi kala kamatiang! Antua su manang!”#Yesaya 25:8
55“Hoe kamatiang e! Mana se pung kuasa tu?
Hoe kamatiang e! Mana se pung bisa tu?”#Hosea 13:14
56Sama deng ular bisa kalo gigi, katong mati, dosa jua biking katong mati. La orang yang biking dosa tu musti dapa hukum tagal dong su langgar Hukum Torat. 57Mar, dangke banya par Allah yang su biking katong manang lewat apa yang Tuhan Yesus Kristus yang katong somba tu su biking. Antua kasi lapas katong dari hukumang yang katong musti pikol tagal katong pung dosa.
58Tagal itu basudara jantong hati e, kamong musti tetap parcaya Yesus Kristus! Jang tagoyang sadiki lai dari kamong pung parcaya tu! Karja sunggu-sunggu par Tuhan, tagal kamong su tau kalo kamong pung karja par Tuhan tu seng parcuma!
Currently Selected:
1 Korintus 15: ABMA
Highlight
Copy
Compare
Share
Want to have your highlights saved across all your devices? Sign up or sign in
© 2022, Sinode Gereja Protestan Maluku
