Loma 13
13
O Sikining to saki Mikowanay
1O tatooren no tamdaw a ma^min ko mikowanay to kitakit. Nawhani o sa'osi no Kawas ko sakatomireng no mikowanay. O Kawas ko patirengay cangraan o mikowanay a ma^min. 2Orasaka, o pacoliay to mikowanay a tamdaw i, o pacoliay to limo'ot no Kawas. O sakasawkit ningra ko matiniay a dmak ningra. 3Caay ka talaw to mikowanay ko nga'ayay ko dmak a tamdaw. O tatiihay ko dmak a tamdaw ko matalaway. Ano mangalay kiso to saka^caaw ka talaw to mikowanay a tamdaw i, ka o nga'ayay ko dmak iso ta malakahmekan ningra kiso. 4Nawhani o matayalay no Kawas cingra to sakanga'ay iso. Nikawrira, ano tatiihay ko dmak iso i, o katalawan iso cingra. Nawhani citodongay cingra a mitfoc. O matayalay no Kawas cingra saka, tfocen ningra ko tatiihay ko dmak a tamdaw. 5Orasaka, o tatooren ko sowal nangra o mikowanay. Aka ka o nano talaw to pitfoc no Kawas a ccay ko pitoor, ka o nga'ayay a faloco' iso ko pi'arawan iso a mitoor i cangraan.
6Onini ko sakapipasata namo. Nawhani o todong no milahciay to tayal no Kawas ko tayal nangra. 7Orasaka, ^minen a patiko ko tadah, ano o papatoroden, pipatorod. Ano papasataen, pipasata. Ano o kakatalawan i, katalaw. Ano o kakangoden i, pingodo.
O Sikining to saki Tao
8Aka ka citadah to maan aca i cimacimaan. Ka o nika sasiolaolah namo a ccay ko lalahcien namo. O maolahay to tamdaw i, o mido^doay to Rikec. 9Oya, <<Aka ka 'odang, aka pipatay, aka pitakaw, aka ka 'anof,>> sanay a limo'ot ato romaroma a limo'ot a ma^min i, masalaloma' noya, <<Samatiyaen o nika olah iso to tireng ko nika olah iso to tao,>> sanay a limo'ot. 10Nawhani ano maolah kamo i cimaanan i, caay pikari'ang kamo toya tamdaw. Saka, ano maolah ko tamdaw i, o mido^doay cingra to Rikec.
11O sakapihaen namo a mido^do i, mafana' kamo to nika masamaanto ko tatokian anini. Maraodayto i matini ko kapalalan namo nai foti'. Nawhani mingatato ko pipa'orip no Kawas i titaanan anini. Yo misatapangho kita a paso'lin i, miraayho itiya. 12Moniharto ko dadaya. Mangatato a ta^ngad. Saka, falahen ko no to'manay a dmak. Ca'dongen ko sapilood a riko' a pasayra i ta^ngaday. 13Aka ka matiya o macoosay, o malasangay no ^pah, o mikalonaay, o ma'amlasay, o mala'odotay, o ma'inapay ko dmak namo. Sanga'ayen ko dmak namo a matiya o no i ta^ngaday. 14Saka, ca'dongen ko sapilood no Tapang ci Yis Kristo a lalosidan. Sawaden ko pitoor to ciraraway a pinangan iso ato ma'anofay a faloco' iso.
Currently Selected:
Loma 13: AMIS2019
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2019
