'Olic 66
66
O Sapahmek a Mikansiya a Radiw
O ccay no radiw. Mapatorod i kakridan no paradiway.
1Kamo o kasafinacadan, kalipahak a milkal a mahmek to Kawas.
2Pahmeken a romadiw ko nika tadamaan Ningra.
Pacakaten i Cingraan ko sapahmek a 'olic.
3Pipasayra i Kawas a somowal, <<Wata: ko nika tadamaan no nidmakan Iso.
O nano tadamaanay a 'icel Iso ko sakapisodod no 'ada i Tisowanan.
4Mita'ong ko kasafinacadan no hkal a ma^min i Tisowanan,
pahmek cangra i Tisowanan a romadiw to nika tadamaan no ngangan Iso,>> han a somowal.
5Katayni a minengneng to tadamaanay a nidmakan no Kawas,
katayni a minengneng to kafahka'an a dmak Ningra i tamdamdaw.
6Nawhani falicen Ningra ko riyar a palahadhad,
ta pakayra ko tato'asan ita a romakat,
itira kita a lipahak to nano nidmakan Ningra.
7O tadamaanay a 'icel Ningra ko sapikowan Ningra a tahada'oc,
minengneng Cingra to kasakitakit,
kamo o pacoliay a tamdaw, akato pisatakaraw a malata'ang.
8Kamo o kasafinawlan, pahmeken ko Kawas niyam,
nanay malosiyang i cowacowa ko pipahmek namo i Cingraan.
9Dipoten Ningra ko 'orip ita saka,
caay ka polin kita.
10Kawasaw, o nilifetan Iso kami,
matiya o pi'olac to ^kim ko pilifet Iso i tamiyanan.
11Tfaden Iso kami i tilo,
pa'orongen Iso kami to kartengay a 'inorong.
12Papisakasaken Iso ko 'ada i tamiyanan,
papirakaten Iso kami to cdas ato marengrengay a namal,
nikawrira, anini sato i, pakamaro'en Iso kami i makadofahay a pala.
13O mamihawikid kako to nisakimoodan a mitodoh a sapato'aya a micomod i pita'ongan i Tisowanan a loma',
o lalahcien ako ko niktonan ako a sowal a pacakat i Tisowanan.
14Lahcien ako koya niktonan ako a sowal yo mapades kako.
15O mamipacakat kako to nisakimoodan a mitodoh a siri,
o mamipacakat kako to okang a kolong ato siri i Tisowanan,
ta tangasa i to'em ko fangsis no nisakimoodan a mitodoh a sapato'aya.
16Kamo o mangodoay to Kawas a tamdaw, katayni a ma^min a mitngil,
pasowalen ako kamo to kafahka'an a dmak Ningra to saki takowanan.
17Pasayra kako i Cingraan a mingitangit to pipadama Ningra,
pasayra haca kako i Cingraan a pahmek a romadiw.
18Ano ira i faloco' ako ko raraw i,
caay pitngil ko Tapang to pitolon ako.
19Nikawrira, so'linay o mitngilay ko Kawas to pitolon ako.
20O papahmeken ako ko Kawas,
nawhani caay pina'ay Cingra to pitolon ako,
caay haca pilodot Cingra to mida'ocay a olah Ningra.
Currently Selected:
'Olic 66: AMIS2019
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2019
