'Olic 109
109
O Ngaliwngiw no Mapadesay a Tamdaw
O 'olic ni Tafiti. Mapatorod i kakridan no paradiway.
1O nipahmekan ako a Kawas,
nanay caay ka tomrep Kiso.
2Mikari'ang i takowanan ko tatiihay ato misa'fitay a tamdaw,
misamangah cangra a milokes a pasowal to pakayniay i takowanan.
3Tada o tatiihay ko sowal nangra to pakayniay i takowanan a padoka' to faloco' ako,
padteng sa cangra a mikari'ang i takowanan.
4Talacowa maolah kako i cangraan, mitolon kako to saki cangraan,
nikawrira, pacoli cangra i takowanan.
5O tatiihay ko sapaco'ay nangra to nga'ayay a dmak ako,
o 'intel ko sapaco'ay nangra to olah ako.
6Mamana o tatiihay a tamdaw ko papisawkiten Iso to 'ada ako,
ka o 'ada nangra ko pakokotay i cangraan.
7Mamana masawkit cingra a mapastek i raraw,
mamana halopitolon ningra a mapastek i raraw.
8Mamana mamoko' ko 'orip ningra,
mamana ma'afas no tao ko kamaro'an ningra.
9Mamana malapakoyoc ko wawa ningra,
mamana maponeng ko fafahi ningra.
10Mamana malamiki'a'amay ko wawa ningra a awaay ko loma' nangra,
mamana malaplap cangra nai matastasay a loma' nangra.
11Mamana maala no militadahay ko dafong ningra a ma^min,
mamana ma'afas no tao ko nikarorayan ningra a ma^min.
12Mamana awaay ko sida'itay i cingraan,
mamana awaay ko adayayay to nika lapakoyoc no wawa ningra.
13Mamana malasawad ko tloc ningra,
mamana awaayto ko mamirocok to ngangan ningra.
14Mamana maharateng no Tapang ko raraw no tato'asan ningra,
mamana maharateng Ningra ko raraw no wina ningra.
15Mamana tahada'oc a maharateng no Tapang ko raraw nangra,
mamana awaayto a maharaterateng cangra i tini i hkal.
16Nawhani o sasida'itho cingra to tamdaw,
sahto o pisamsam to pakosiya a tamdaw ato
pikari'ang a mipatay to awaay ko palawinaan a tamdaw ko dmak ningra.
17Maolah cingra a mi'kak saka, mamana ma'kak cingra,
caay ka olah cingra a palmed saka, mamana miliyas ko sapalmed i cingraan.
18Matiya o nipica'dong ningra to riko' a caloway ko nipi'kak ningra to tamdaw,
saka, mamana matiya o nipircep no nanom ko nipircep no lafo i cingraan,
mamana matiya o nipircep no simal a tangasa i 'okak ko nipircep no lafo i cingraan.
19Mamana matiya o nipitafo no riko' to tireng ningra ko nipitafo no lafo i cingraan,
mamana matiya o nipikdec no safaked to tatlecan ko nipikdec no lafo i cingraan.
20Mamana haenen Iso Tapang ko pitfoc to 'ada ako,
mamana co'ayen Iso koya milokesay a mikari'ang i takowanan a tamdaw.
21Nikawrira, o Isatakaraway a Tapang,
nanay do^doen Iso ko niktonan Iso a sowal a mipadama i takowanan,
nawhani pakaynien Iso i sini'ada ato nika nga'ay Iso ko pipa'orip i takowanan.
22Nawhani o pakosiya, o marorayay kako,
tada o mararomay ko faloco' ako.
23Matiya o lidong i picleman no cidal a sakalahdawan kako,
matiya o ccay a malaplapay a riri' kako.
24Tona misaliway kako saka, salomaing sato ko tosor ako,
mangiriwto a tadanca ko tireng ako.
25O minengnengay i takowanan a tamdaw i, milokes a ma^min,
'inga'ing sa cangra to fongoh a matawa i takowanan.
26 Tapang a Kawas ako, nanay padamaenho kako,
nawhani caay ka falic ko olah Iso, nanay pa'oripenho kako.
27Ta mafana' ko 'ada ako to nika o pa'oripay Kiso i takowanan.
28Ano mi'ka'kak cangra i takowanan, nikawrira, o papalmeden Iso kako,
mamana tfaden Iso a pakangodo koya mikari'angay i takowanan,
nikawrira, o lalipahak ko matayalay Iso.
29Mamana mapakangodo ko 'ada ako,
mamana kalakafafang han nangra ko ngodo.
30Milkal kako a mikansiya to Tapang,
o raromadiw kako a pahmek i Cingraan i kasa'opoan no finawlan,
31nawhani o pa'adingay Cingra to pakosiya a tamdaw,
o pa'oripay Cingra a paliyas nai mipastekay cingraan i patay a tamdaw.
Currently Selected:
'Olic 109: AMIS2019
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2019
