Taneng 12
12
1O maolahay a mafana' a tamdaw i, maolah a milayap to sifana',
mi'intel to misalofay a pa'icel ko maapaay a tamdaw.
2Maolah ko Tapang to nga'ayay a tamdaw,
matfoc ko misahalakaay to tatiihay a tamdaw.
3Caay ko rarihaday ko tatiihay ko dmak a tamdaw,
o mo^celay a tamdaw i, tanektek a caay ka ngiyangi.
4O citanengay a fafahi i, o kacihrangan no fa'inay ningra,
o pakangodoay a fafahi i, matiya o i kmoday no 'okak no fa'inay ningra a tatiihay a ^kang.
5O mo^celay a tamdaw i, o milalenay ko dmak to saki tamdaw,
o sapisa'fitaw to tamdaw ko nisahalakaan no tatiihay a tamdaw.
6Mipatay to tamdaw ko sowal no tatiihay a tamdaw,
nikawrira, mipa'orip to tamdaw ko sowal no mo^celay a tamdaw.
7O mamalasawad ko tloc no tatiihay a tamdaw,
nikawrira, o mamararid ko laloma'an no mo^celay a tamdaw.
8O mamakahmek ko citangalay a tamdaw,
o mama^pec ko maapaay a tamdaw.
9O ma^pecay no tao a tamdaw i, ci koliho cingra,
ikaka noya misatakaraway a misalata'ata'ang a macahiway a tamdaw ko nika nga'ay.
10Maolah a midipot to 'a'adopen ko mo^celay a tamdaw,
miri'ang to pina'orip ko tatiihay a tamdaw.
11Caay ka cango'ot to kakaenen ko malalokay a maomah,
o milongocay to awaay ko ^poc a dmak i, tada o maapaay.
12Sapi'afasan to tama' no tatiihay a tamdaw ko ma'desay a tamdaw,
o mo^celay a tamdaw i, tanektek a caay ka ngiyangi.
13O ngoyos no tatiihay a tamdaw ko sakatfad ningra a tahatalakal,
sanga'ay sa ko piliyas no mo^celay a tamdaw to pades.
14O nano hci no sowal ato dmak no tamdaw ko sakapilayap to sapakaolah,
o mamilayalayap aca cingra to tatodong no dmak ningra.
15O maapaay a tamdaw i, matamaay ko no mako saan,
nikawrira, mitngil to pisalof ato pipa'icel no tao ko citanengay a tamdaw.
16Ano makter ko maapaay a tamdaw i, tangsol sa a patalahkal to kter ningra,
nikawrira, trep sa a mihadidi to pisamsam no tao ko citangalay a tamdaw.
17O so'linay a sowal i, o pahapinangay to mo^celay a dmak,
o misamangahay a pawacay i, o miri'angay to awaay ko raraw a tamdaw.
18Ano caay pina'on to sowal i, matiya o mikotangay a midoka' to tamdaw,
nikawrira, o citanengay a sowal i, matiya o nga'ayay a sapaiyo a miadah.
19O misamangahay ko sma a tamdaw i, ccay a mlet ko 'orip ningra,
o so'linay ko filfil a tamdaw i, mida'oc ko 'orip ningra.
20O misahalakaay to tatiihay a dmak i, ira i faloco' ningra ko sapisa'fit,
o pa'icelay a tamdaw to sakararihaday i, matomes no lipahak cingra.
21Awaay a malitmoh no mo^celay a tamdaw ko pades,
caay pitolas ko pades no tatiihay a tamdaw.
22O ka'intelan no Tapang ko misamangahay a ngoyos,
o kalipahakan Ningra ko so'linay a mido^do to sowal.
23Misimed to fana' ningra ko citangalay a tamdaw,
mipatalahkal to fokil ningra ko maapaay a tamdaw.
24O mamikowan ko kamay no malalokay a tamdaw,
o mamalakoli ko matokaay a tamdaw.
25O sakatoled no tamdaw ko rawraw no faloco',
o sakalipahak no tamdaw ko nga'ayay a sowal.
26O mo^celay a tamdaw i, o nga'ayay a singsi ato widang no fiyafiyaw,
nikawrira, pamoraraw to lalan ko tatiihay a tamdaw.
27O matokaay a tamdaw i, caay pihodhod to tama' ningra,
nikawrira, o malalokay a tamdaw i, kakahad ko kasadakan no dafong ningra.
28O mo^celay a dmak i, o sakatayra i ci'oripay a lalan,
awaay ko sakapatay a lalan tonini.
Currently Selected:
Taneng 12: AMIS2019
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2019
