Matay 13

O Tinako to Mifolsakay

(Maroko 4.1-9; Luka 8.4-8)

1Toyanan to a romi'ad i, masadak ci Yis nai loma' a tayra i lawac no fanaw a maro'. 2'Aloman ko finawlan a masa'opo i Cingraan saka, midakaw ci Yis to tamina a maro' itira. Tomireng i lawac no fanaw ko finawlan a ma^min. 3Patinako han ni Yis cangra a somowal to masamaamaanay a dmak.

Sowal sa, <<Ira ko ccay a tamdaw a talaomah a mifolsak. 4Yo mifolsak cingra i, ira ko matfaday i lalan a sapaloma, kaenen no ma^feray a 'ayam konini. 5O roma a sapaloma i, matfad i fokloklohan o kohpicay ko sra. Tona caay ka talolong ko sra saka, ranikay a molngaw koya sapaloma. 6Yo tata'ang ko cidal i, mafadi' koya lngaw. Nawhani awaay ko palamitan nira saka, ma'icang ciira. 7O roma a sapaloma i, matfad i cifadalay#13.7 cifadalay -- o cickaay a talod han no i katimolay. a sra. Lomahad koya fadal i, ma'co koya lngaw. 8O roma a sapaloma i, matfad i nga'ayay a sra, cihci to maloficay, cihci koya sapaloma to smo'ot, o roma i, ^nem a polo', o roma i, tolo a polo' ko nika lofic#13.8 lofic -- o roma i, hpik (katimol). no hci.

9<<Pitngil kamo, o pakatngilay ko tangila a tamdaw,>> han ni Yis.

O Patosokan no Pipatinako

(Maroko 4.10-12; Luka 8.9-10)

10Itiyasato, raod han no nisawawaan ci Yis a milicay, <<Nawiro, o tinako#13.10 tinako -- pakaynien ni Yis i tinako ko pisahci to pakakmoday a dmak no Kawas. ko sapasowal Iso i finawlan saw?>> han nangra.

11Paca'of sa ci Yis, <<Mapaflito i tamowanan ko pakakmoday a sowal to pakayniay i Kitakit no Kawas, caay ka pafli i cangraan. 12Nawhani o iraay ko nitatoyan i, matongal a matongal a mapafli a marafas. O awaay ko nitatoyan i, halonitatoyan ningra a mamangay a ma'afas. 13O sakasaan Ako a pakatinako to sowal i cangraan i, nawhani, minengneng cangra i, caay paka'araw, mitngil cangra i, caay pakatngil, caay haca ka fana' cangra. 14Orasaka, matama i cangraan ko sowal ni Isaya to nano sowal no Kawas toya,

<Talacowa mitngil kamo i, caay ko mamafana' kamo.

Talacowa minengneng kamo i, caay ko papaka'araw kamo.

15Nawhani foteken#13.15 foteken -- o roma i, kocem (katimol), kni'. nonini a finawlan ko mata nangra.

Do'engen nangra ko tangila nangra.

Maorat ko faloco' nangra.

Ano ^ca ka haen i, latek paka'araw ko mata nangra.

Latek pakatngil ko tangila nangra.

Latek mafana' ko faloco' nangra a pasasiyor a pasayni i Takowanan, ta maadah Ako cangra,> sanay.

16<<Nikawrira, kamo o paka'araway ko mata, o pakatngilay ko tangila a tamdaw i, o malmeday. 17So'linen Ako a somowal kamo, sapinengnengan ko iti:yaayho a 'alomanay a pali'ayaway to sowal no Kawas ato mo^cel ko faloco' a tamdamdaw to ninengnengan namo, nikawrira, caay pakanengneng. Sapitngilan cangra to nitngilan namo, nikawrira, caay pakatngil.

O Pisahci to Tatodong no Tinako to Mifolsakay

(Maroko 4.13-20; Luka 8.11-15)

18<<Orasaka, pitngil kamo to tatodong no mifolsakay a tinako. 19O mafokilay a mitngil to tatodong no sowal to pakayniay i Kitakit no Kawas i, matiya o katfadan no sapaloma i lawac no lalan ko faloco' ningra. Tayra ko Palafoay a mi'afas to nifolsakan i faloco' ningra to tatodong no sowal. 20O tatodong no mafolsakay i fokloklohan a sapaloma hananay i, mitngil ko tamdaw to sowal no Kawas i, tangsol sa a lipahak a milayap. 21Nikawrira, awaay ko palamitan saka, caay ka halafin. Ano ira ko pades ato kari'ang pakayni tona sowal no Kawas i, tangsol sa a misawad a mitoor. 22O romasato, o tatodong no mafolsakay a sapaloma i cifadalay a sra ko faloco' hananay i, mitngil cingra to sowal no Kawas, nikawrira, ira ko roray no faloco' to saki 'orip ato 'anof to saki dafong a mi'co to sowal no Kawas. Saka, caay ka cihci. 23Nikawrira, o tatodong no mafolsakay a sapaloma i nga'ayay a sra hananay i, mitngil ko tamdaw to sowal no Kawas i, mafana' cingra. Ta cihci cingra. Yo militodto i, ira ko cihciay to smo'ot, ira ko cihciay to ^nem a polo', ira ko cihciay to tolo a polo',>> han Ningra.

O Tinako to Samado

24Pasowal ci Yis i cangraan to roma a tinako. Sowal sa, <<O Kitakit no Kawas i, matiya o nipifolsak no tamdaw to nga'ayay a sapaloma i omah ningra. 25Yo ccay a dadaya, yo mafoti' ko tamdamdaw i, tayra ko 'ada a mifolsak to samado#13.25 samado -- o roma i, karapanay (sawali), salipanay (Fata'an). i ci^miay. Ta milaliw cingra. 26Yo lomahadto koya ^mi a cipoyapoy i, itiya a mahapinang koya samado. 27Saka, tayra sa ko koli a pasowal to tawki, <Tawkiaw, oya nifolsakan niyam i omah iso a sapaloma i, o nga'ayay a sapaloma kiya saw? Nawiro ira a molngaw ko samado saw?> han nangra. 28Pasowal sa koya tawki, <O nidmakan no 'ada konini,> han ningra. Sowal sa koya koli, <Ano hatira i, mangalay kiso to nika tayra niyam a mifo'not#13.28 mifo'not -- o roma i, pocpoc (ka'amis). toya samado haw?> han nangra a milicay. 29Paca'of sa koya tawki, <Caanto. Ano mifo'not kamo toya samado i, latek halo^mi a mafo'not namo. 30Palihaen han koya ^mi ato samado tangasa i pipanayan. Ano maraod ko pipanayan i, pasowalen ako ko mipanayay, i 'ayawen a misa'opo ko samado a mirorong ta todohen. Ta sa'opoen ko ^mi a miparo i 'ariri ako, wa han ako a somowal,> >> han Ningra.

O Tinako to Falo no Kolang

(Maroko 4.30-32; Luka 13.18-19)

31Pasowal ci Yis i cangraan to roma a tinako. Sowal sa, <<O Kitakit no Kawas i, matiya o falo no ccay a kolang. Palomaen no tamdaw ko falo no kolang i omah, talacowa o samimingay no kalosapaloma a ma^min ko falo no kolang, 32nikawrira, yo lomahad ko falo no kolang i, o satata'angay no kalodateng a ma^min ko lahad niira a malakilang. Saka, haloma^feray a 'ayam a tayra a padipong i ca'ang niira,>> han Ningra.

O Tinako to Tamod

(Luka 13.20-21)

33Pasowal ci Yis to roma a tinako, sowal sa, <<O Kitakit no Kawas i, malcad to dmak no tamod#13.33 tamod -- o roma i, ^kak (katimol).. Alaen no ccay a fafahiyan ko tamod a mipacamol i spat polo' a kongsen no aped no ^mi i, mafihahak konini a ma^min,>> han Ningra.

O Patosokan no Pipatinako

(Maroko 4.33-34)

34O matiniay a adihayay a tinako ko sapakimad ni Yis i finawlan. Deng o tinako ko sapasowal Ningra i cangraan, caay to pasowal to maamaan Cingra i cangraan. 35Onini i, o nika lahci no sowal no pali'ayaway to sowal no Kawas toya,

<<O tinako ko sapasowal Ako i cangraan,

o papasowal Kako i cangraan to nano masimeday a dmak nai satapangan no hkal,>> sanay.

O Pisahci to Tatodong no Samado a Tinako

36Nanoya, liyasen ni Yis ko finawlan a micomod to loma'. Raoden no nisawawaan Cingra a somowal, <<Pakafana'en kami to tatodong no tinako Iso to pakayniay toya samado i omah,>> han nangra.

37Paca'of sa ci Yis, <<O mifolsakay to nga'ayay a sapaloma hananay i, o Wawa no Tamdaw korira. 38O omah hananay i, onini a hkal. O nga'ayay a sapaloma hananay i, o no Kitakit no Kawas a tamdaw. O samado hananay i, o makowanay no Palafoay. 39O mifolsakay to samado a 'ada hananay i, o kakridan no palafoay ci Satan. O pipanayan hananay i, o pahrekan nonini a hkal. O mipanayay a tamdaw hananay i, o coyoh. 40Mahaenay. Saka, matiya o nipisa'opo to samado a mitodoh i namal ko dmak i pahrekan no hkal. 41Oya Wawa no Tamdaw ko mamiocor to coyoh Ningra. O sasa'opoen noya coyoh ko patahfikoday ato tatiihay ko dmak a tamdaw a ma^min a paliyas nai Kitakit Ningra 42a mifahkol cangraan i marengrengay a namal i parod. O a itira cangra a tomangic a mingric to wadis. 43Itiya i, o mamatdi a matiya o cidal ko mo^celay a tamdaw i Kitakit no Wama. Pitngil kamo, o pakatngilay ko tangila a tamdaw.

O Tinako no Masimeday a Dafong

44<<O Kitakit no Kawas i, matiya o masimeday i omah a dafong. Matama no tamdaw konini i, lafong hanho ningra. Salipahak sa cingra. Ta minokay a pacakay to maamaan ningra a ma^min, ta micakay toya omah.

O Tinako no Cinco

45<<O romasato, o Kitakit no Kawas i, matiya o nipikilim no patiyamay a tamdaw to fangcalay a cinco. 46Matama ningra ko ccay a matkesay a cinco i, minokay cingra a pacakay to maamaan ningra a ma^min, ta micakay toya cinco.

O Tinako no Pisalil

47<<O romasato, o Kitakit no Kawas i, matiya o pisalil i riyar a misa'opo to masamaamaanay a foting. 48Ano matomesto koya salil i, pasadaken nangra i hkal. Aro' sa cangra a mipili'. O nga'ayay a foting i, paroen nangra i patlian. O tatiihay a foting i, falahen nangra. 49O mamahaen ko dmak i pahrekan nonini a hkal. O tatayni ko coyoh a palacidek to nga'ayay a tamdaw ato tatiihay a tamdaw 50a mifahkol to tatiihay a tamdaw i marengrengay a namal i parod. O a itira cangra a tomangic a mingric to wadis.

O Fa^lohay ato Matlangay

51<<Mafana'to kamo tonini a dmak a ma^min haw?>> han ni Yis a milicay.

<<Hai,>> han nangra.

52Sowal sa ci Yis, <<Mahaenay saka, o minanamay to pakayniay i Kitakit no Kawas a pasifana'ay to Rikec a nisawawaan i, matiya o misadakay to fa^lohay ato matlangay a dafong nai 'ariri no loma' no tawki,>> han Ningra.

O Nika 'Osi no Nacali a Tamdaw ci Yisan

(Maroko 6.1-6; Luka 4.16-30)

53Mahrek ci Yis a pasowal tonini a tinako i, liyas sa Cingra itira a 54minokay i niyaro' Ningra. Pasifana'en Ningra ko tamdamdaw i kasa'opoan nangra a loma'. O pakatngilay a tamdaw i, safahka' sa cangra. Sowal sa, <<Nai cowaay ko sakacitaneng Ningra to matiniay saw? Iro midmak haca Cingra to kafahka'an a dmak saw? 55Onini a tamdaw i, o wawa no misakilangay a sayho kiya saw? Caay ko ina Ningra ci Mariya saw? Caay ko safa Ningra to fa'inayan ci Yakop aci Yosif aci Simon aci Yuta saw? 56O safa Ningra to fafahiyan a ma^min i, ini a mikapot i titaanan kiya saw? Ano hatira i, o nano maan ko sakafana' Ningra to hatiniay a dmak saw?>> saan cangra. 57Orasaka, ma'osi cangra i Cingraan.

Pasowal sa ci Yis i cangraan, <<O mikangodoan no i cowacowaay no niyaro' no tireng ato paro no loma' ko pali'ayaway to sowal no Kawas,>> han ni Yis. 58Tona caay paso'lin cangra saka, caay ka adihay ko pidmak ni Yis to kafahka'an a dmak itira.

Currently Selected:

Matay 13: AMIS2019

Highlight

Copy