Ifiso 2

Ma'orip nai Patay

1I tiyaho i, o mapatayay kamo to no 'adingoan to nika ciraraw ato nipipacoli namo to limo'ot no Kawas. 2Mado^do namo itiya ko ngiros a pinangan nonini a hkal. Mihaklong kamo to kakridan no mikowanay tonini a hkal, oya mikowanay to pacoliay to limo'ot no Kawas a tamdamdaw a palafoay. 3'Arawhani, o nano malcaday kita cangraan a mitoor to 'anof no tireng. Matoor ita ko 'anof ato kangalayan no tireng ato harateng. Saka, awaay ko kasasiroma ita ato tao, o kaktekteren aca no Kawas kita a mitfoc.

4Nikawrira, tadamaan ko adayay no Kawas. Tata'ang ko olah Ningra i titaanan. 5Saka, yo mapatayho kita to no salo'afangan tona pacoli kita i, pakapoten no Kawas kita i ci Kristoan a miliyaw a palowad a pa'orip nai patay. O nano mikomi no Kawas ko saka mapa'orip kamo. 6Pakaynien no Kawas i nika laccay ita aci Kristo ko nipipakapot titaanan i ci Kristo Yisan a palowad a pa'orip nai patay. Papikapoten Ningra kita ci Kristoan a mikowan i kakarayan. 7O saka pihaen Ningra a midmak haw i, o sapatiri'aw Ningra i kasarayray no 'orip to nika tadamaan no mikomi Ningra i titaanan, pakayni i ci Kristo Yisan a mapahapinang ko olah Ningra. 8O nano mikomi no Kawas ato nipiti'er namo i ci Kristoan ko saka mapa'orip a mapakalmed kamo. Caay ko nano dmak namo, o nano Kawas a sapalmed konini. 9Tona caay ko nano nga'ayay a dmak namo ko tati'eren. Saka, awaay ko maan aca a papasnengen namo. 10O misanga'ay titaanan ko Kawas. Pakaynien no Kawas i nika laccay ita aci Kristo Yis ko nipisafa^loh titaanan to sakanga'ayaw no dmak ita. O nisahalakaanto no Kawas konini naniti:ya aca to dadmaken ita.

O i ci Kristoananay a 'Orip a Malaccay

11Kamo o roma a finacadan a sofocen, haratengen ko iti:yaayho a pinangan. O caay ka pido^do to krit a lisin hananay no mido^doay to krit a lisin kami sanay a Yutaya a tamdaw kamo. 12Itiya i, awaay ko kihar namo ci Kristoan, masapapotalay no nipili'an no Kawas a finawlan kamo. Ano pakaynien i katatlekan ato niktonan no Kawas a sowal i, caay ka sa'osi kamo, awaay ko pafaloco'an i hkal, awaay ko Kawas. 13Talacowa o mafokilay kamo to Kawas i ti:yaho, nikawrira, anini sa i, pakayni i nika laccay namo aci Yis Kristo ato nika patay Ningra a malamafana'ayto kamo to Kawas. 14O pararihadayay titaanan ci Kristo. Nawhani mapalaccay Ningra ko Yutaya a tamdaw ato roma a finacadan. Pakayni i tireng Ningra ko sapipalasawad to palala'eday a masasi'adaay a faloco' nangra. 15Palasawaden Ningra ko limo'ot ato lkakawa no Rikec no Yutaya a tamdaw, onini i, pakaynien i 'orip Ningra a malaccay ko tosaay a finacadan a malafa^lohay a tamdaw, ta malarihaday. 16Pakayni i nika patay i ciwcika, palasawaden ni Kristo ko matiniay a masasi'adaay a pinangan, pakayni i ciwcika ko sakalaccay no tosaay a finacadan, ta malali'ay ato Kawas. 17Mahaenay saka, tayni ci Kristo a mipatnak to sakararihaday a Nga'ayay Ratoh i polong no tamdaw halo amo o mafokilay to Kawas a roma a finacadan ato mafana'ayto to Kawas a Yutaya a tamdaw. 18Nawhani pakayni i Cingraan kita o nao tosaay a finacadan a mapalaccay toyanan to a Fangcalay 'Adingo a manga'ay a miraod i ci Wamaan.

19Ano hatira i, kamo o roma a finacadan caayto ko tao ato lafang, o kapotto no finawlan no Kawas kamo, o ccayayto a laloma'an no Kawas kamo. 20Matiya o nipatirengan a loma' kamo i fafaed no nipatirengan no tarokos ato pali'ayaway to sowal no Kawas a paranaan. Ci Kristo Yis ko ta'enengan a fokloh nonini. 21I Cingraan ko sakakakafit nonini a loma'. Cingra ko palahaday tonini a loma' a palaFangcalay Pita'ongan to Tapang. 22Pakayni i nika laccay namo aci Kristo a mapalakapot kamo ato romaroma a mapatireng a malakamaro'an no todong no tireng no Kawas a Fangcalay 'Adingo.

Currently Selected:

Ifiso 2: AMIS2019

Highlight

Copy