Ifiso 1

1Ci Pawlo kako, pakayniay i nafaloco'an no Kawas a malatarokosay ni Kristo Yis kako. Patilid kako i tamowanan o i Ifisoay#1.1 O roma a katlangay a cudad awaay o i Ifisoay. a malaccayay aci Kristo Yis a so'linay ko faloco' a mitooray.

2Nanay, mapaini no Wama a Kawas ita ato Tapang ci Yis Kristo kamo to mikomi ato rihaday!

I ci Kristoan a Rocek no Fangcalay 'Adingo

3O aahowiden ita ko Wama a Kawas no Tapang a Yis Kristo. Nawhani pakaynien no Kawas i nika laccay ita aci Kristo ko pipaini titaanan to i kakarayanay a masamaamaanay a no 'adingoan a sapakalmed. 4I 'ayaw no nika sanga' no hkal i, mahrekto ko Kawas a mipili' titaanan to sapalaccayaw titaanan aci Kristo a palano Ningra. Ta makorac kita, ta awaay ko tatoro'en Ningra a raraw ita.

5Maolah ko Kawas i titaanan saka, pakaynien Ningra i ci Yis Kristoan ko pipalawawa titaanan. O nisahalakaan Ningra konini to sakalipahak Ningra. 6O papahmeken ita ko Kawas to nika tadamaan no mikomi Ningra, nawhani padteng sa Cingra a pafli i titaanan to kaolahan Ningra a Wawa. 7Pakayni i nika patay ni Kristo ko sakatdal ita a mapakonira ato sakahpol no raraw ita, o nano kadofahay a mikomi no Kawas konini. 8Wata: ko nika tadamakadofah ko mikomi no Kawas i titaanan!

Pakaynien no Kawas i talolongay a taneng ato fana' 9ko nipilahci to nafaloco'an Ningra a pahapinang i titaanan to pakakmoday a lalahcien ni Kristo a nisahalakaan Ningra a dmak. 10Ano maraodto ko romi'ad i, itiya a milahci ko Kawas tonini a nisahalakaan Ningra, a mipalaccay i ci Kristoan to i kakarayanay ato i hkalay a maamaan a nisanga'an Ningra, a pakoTapang i Cingraan.

11Saka, mato nipipali'ayaw no Kawas yo misanga' Cingra to hkal ko nipipili' titaanan a palafinawlan Ningra pakayni i nika laccay ita aci Kristo. Mado^do no masamaamaanay a dmak ko nafaloco'an no Kawas. 12Orasaka, kami o sa'ayaway a cifaloco' ci Kristoan ko papahmek to nika tadamaan no Kawas.

13Halo amo a mahaen, yo matngilto namo ko so'lin a ratoh, oya sapa'orip tamowanan a Nga'ayay Ratoh i, paso'lin sato kamo ci Kristoan, saka, paflien no Kawas kamo toya nihaydaan Ningra a Fangcalay 'Adingo, mala Ningra to a nitopaan kamo. 14Onini a Fangcalay 'Adingo ko kacipinangan ita to nika o mamalayap ita ko niktonan Ningra. O romasato, songila'en no Kawas a paini ko finawlan Ningra a mipakonira. O hahmeken ita ko nika tadamaan no 'dil no Kawas!

O Pitolon ni Pawlo

15Orasaka, yo matngilto ako ko pakayniay i piti'er namo to Tapang ci Yisan ato nika olah namo to mitooray a ma^min. 16Mararid kako a miahowid i Kawas to pakayniay tamowanan. Ano mitolon kako i, maharateng ako kamo. 17Nanay mapafli no tadamaanay a Wama a Kawas no Tapang ita ci Yis Kristo kamo to Fangcalay 'Adingo. Onini a Fangcalay 'Adingo i, o pafliay to sakacitaneng namo, o pahapinangay to sakafana' namo to Kawas. 18Milongoc haca kako to Kawas a papifohat to mata no faloco' namo, to sakafana'aw namo, o maan ko lalayapen a pafaloco'an to pitahidang Ningra i tamowanan, ato tadakadofah ko nihaydaan Ningra a sapafli to finawlan Ningra a dafong. 19O romasato, nanay mafana' kamo to nika hakowa ko nika tadamaan no 'icel no tayal no Kawas i titaanan o paso'linay, onini i o nido^doan Ningra to tadamaanay a 'icel a mipakatayal. 20Onini a 'icel ko sapalowad no Kawas ci Kristoan a pa'orip nai patay ato sapakamaro' Ningra ci Kristoan i kawanan Ningra i kakarayan. 21Itira i, mikikaka ko pikowan ni Kristo to polong no i kakarayanay a tatiihay a palafoay a mikowanay ato cisakowanay ato mikomoday ato tapatapang. Ano o aniniayto a hkal, ano o a irato a hkal i, o sakakaay no polong no cinganganay a mikowanay Cingra. 22Papihinokopen no Kawas i saripa' ni Kristo ko polong no maamaan no tahaf no kakarayan, patirengen no Kawas Cingra a palatapang no kiwkay a papikowan to maamaan. 23O tireng ni Kristo ko kiwkay, o matomesay i tahaf no kakarayan ato kalomaamaan a Kristo ko mitomesay tonini a sa'opo.#1.23 O matomesay ... mitomesay tonini a sa'opo -- ano ^ca i, O misongila'an a mitomes no Kawas a Kristo ko mitomesay, ano ^ca i, Oya matomesay no Kawas a Kristo ko mitomesay.

Currently Selected:

Ifiso 1: AMIS2019

Highlight

Copy