1 kurinṯus 8

asa 8

ŋuɽun ŋe ḏiḏuga ḏeḏi liji lun liro ga dino

1na gwan ŋɩdi ŋun ŋaṯɩḏəḏini ŋɩdio ŋe ḏorṯeḏa; liŋə ililɩŋiḏi wei iləṯi ḏilɩŋeḏa. na dilɩŋeḏa ḏaṯɩbuṯiane gwiji kwulo gwuŋun, namɩni ḏəmɩnyo ḏaṯɩbɩɽi nanu. 2ḏa gwiji manuməḏɩni manarno gwilɩŋiḏi ŋuɽuna ŋədi, namɩni ŋu ŋore ŋate ŋimunilɩŋə gi gwune ŋideleḏo ŋullɩŋe no. 3namɩni ḏa gwiji gwete manəmɩnyi eloŋu, ŋu malɩŋene ḏi elo.

4na ŋiro dino ŋan ḏiṯa ŋɩdio ŋun ŋaṯɩḏəḏini ŋɩdio ŋe ḏorṯeḏa, na ilɩŋiḏi ŋɩdi ŋe ḏorṯeḏa ŋate ŋəṯɩn ŋuɽuna ŋədi kɩḏilio no, na elo gwatɩn gwede no, namɩni gwiro gwetɩdo kuwei. 5na ḏa lɩmaje lun laṯɩl liji eico eloŋa, kanyin na kwɩnyəm, na gwerkwe eloŋa lo lutu, na lele lo lutu, 6namɩni lagəri elo gwo gwetɩdo, na ŋu gwiro baba, na ŋɩdi wei ŋɩduḏi lugwun, na ilo lugwun, na gwele gwo gwetɩdo gwan yecu kɩrisṯo, na ŋu gwe ŋɩdi wei ŋila na ilo lugwun.

ḏidɩmiḏi ḏugwor ḏeḏi mage gwun gwirebɩna

7namɩni liji wei late ləṯi ḏilɩŋeḏa ṯeno no. na kworo gi gwune gwerre laṯorṯeḏa ŋɩdio nalijɩre laṯarno ŋɩdi ŋun ŋaṯɩlɩne ganu ŋaṯɩlɩnḏoga ŋɩdio ŋe ḏorṯeḏa, na dugwor dagin dun direbɩna dɩmaro ŋɩrleḏ. 8na ḏiṯa ḏate ḏijidirkaḏaica ḏi elo no; gi gwune na ḏa ŋɩmilʼe ilate laniŋirane no, na ḏa ŋate ŋɩmilɩnʼe no ilate lankene no. 9jil muma əri kəbe a ŋuɽun ŋeno ŋun ŋaŋouwɩrico ŋaʼe ŋɩdio wei ŋwuro gi ḏobɩlkeja liji lun lɩrebɩna, 10na ḏa gwiji gwədi maŋaŋu, ŋa gwun gwəṯi ḏilɩŋeḏa ŋa gwiṯi kwu dunu gwun gwatɩnorṯeḏa ŋɩdio, ŋu gwate gwidujini gwubɩɽe nanu kalo ge ḏugwor ḏuŋun gi gwune gwirebɩna, gwaʼe ŋɩdio ŋun ŋaṯɩḏəḏini ŋɩdio ŋe ḏorṯeḏa na? 11na ŋa gwaḏuji mage gi ḏilɩŋeḏa ḏuŋa gwun gwirebɩna gwun gwima kɩrisṯo eiijo. 12namɩni ḏa nyalmape ŋuɽuna ŋɩki dino gi lɩmagalo lalo nanyalmaki dugwor dagin dun direbɩna nyalmape ŋuɽuna ŋɩki ḏi kɩrisṯo. 13na dino ḏa ŋɩdi ŋɩmaro ŋe ḏiṯa ŋɩmaḏuji magəri, nyi gwate gwanʼe jɩḏḏi ḏuṯ no kani nyate nyɩḏuji magəri no.

Currently Selected:

1 kurinṯus 8: OTR1966

Highlight

Copy

Compare