1 kurinṯus 7

asa 7

ŋuɽun ŋeḏi liji lun lagiḏo na lun late ləgini no, na ḏitio gwa

1na gwan ŋuɽun ŋun ŋulijiŋwijilo; ŋiŋir ḏa gwamɩnyo gwate malɩje gwa gwe no. 2namɩni ŋuɽun ŋeḏi ŋeḏor, ouwɩricil ləmɩnyo gwete gwete aṯuŋəṯi gwa gwuŋun, na la gwete gwete aṯuŋəṯi gwəmɩnyəŋe gwuŋun dino. 3na ouwɩricil gwəmɩnyo ŋwərrɩjo gwa gwuŋun ŋuɽuna ŋun ŋiḏeleḏo lugwun, na gwa dino kwəmɩnyo gwuŋun. 4gwa gwate gwəṯi ŋelɩnya kaŋɩnu yuŋun no, namɩni gwəmɩnyo gwe gwuŋun; na ŋiro ḏino gwəmɩnyo gwate gwəṯi ŋelɩnya kaŋɩnu yuŋun no namɩni gwa gwe gwuŋun. 5aṯanyadonyɩḏa gworo no, namɩni ḏijaga ŋuɽun ŋe ŋetɩdo ŋwamon ŋwouwɩrio, kani nyaḏəḏə dugwor dalo ḏɩməṯo əbuṯo na ḏuməḏɩjo eloŋu, na ŋɩno gɩdo nyaɽuwaḏa ldu kal gete kani ate aji seiṯan iḏeije ŋuɽun ŋun ŋɩki no gi gwune nyaŋa nyalbɩɽaṯo ŋelɩnya ŋeḏi jiŋɩno jalo no. 6na nyi gwar dino ŋədu ŋeḏi ŋuɽun ŋun ŋigelijɩnyil elo no, namɩni gi gwune uməḏɩjiŋi. 7namɩni nyi gwəmɩnyu liji wei laro gi nyi; namɩni gwete gwete gwəṯi ḏiḏəḏo ḏuŋun ḏeḏi gwuɽɩwə ḏi elo, namɩni gwete gi ṯaṯ ḏiro ḏino, na gwete gi ṯaṯ ḏiro kaja.

8na gi liji lun late lagiḏo no na linino, nileicɩno, ŋiŋir ḏa luŋa lamajiga ḏino gi nyi. 9namɩni ḏa late lɩməṯi ŋɩma ləməṯo jiŋɩno no, ouwɩricɩlo alagiḏe, gi gwune ḏaga ḏiŋirano gi dinunino ḏibunya ḏe ḏeḏi aŋɩnu. 10na lilgelɩjo ŋuɽuna lun lagiḏo, namɩni nyi gwəḏu no namɩni gwele gwiro gwun gwiro elo, gwa gwo gwawalane kwəmɩnyo gwuŋun. 11namɩni ḏa lɩməkenyɩḏiḏi ganu gwo gwanəgini, nalmɩni ouwɩrico alouwɩɽiḏe gwəmɩnyo gwe mɩna, na gwəmɩnyo gwo gwədi gwa gwuŋun.

12namɩni luməḏɩjɩlo lun lɩṯanu, nyi gwiro na gwele gwədu no, ḏa mage gwete gwɩməṯi gwa gwun gwate gwəmɩnyu eloŋu no, na ŋu məmɩnyi marno gwalgwije, gwo gwudonye. 13na gwa gwun gwəṯi gwəmɩnyəŋe gwun gwate gwəmɩnyu eloŋu no, na məmɩnyi marno gwalgwije gwo gwunwalane. 14gi gwune gwəmɩnyo gwun gwate gwəmɩnyu eloŋu no gwɩpiḏo pɽul gwa gwe gwuŋun, na gwa gwun gwate gwəmɩnyu eloŋu no gwɩpiḏo pɽul gwəmɩnyo gwe gwuŋun. namɩni ḏa ŋate ŋɩmaro dino no, na nyaɽe nyalo nyaro ŋɩrleḏ; namɩni gwunnɩno nyaro nyipiḏo pɽul. 15namɩni ḏa ŋu gwun gwate gwəmɩnyu eloŋu no gwumele ŋamɩni ouwɩrico ŋuwele. mage gwun gwiro gwəmɩnyo i gwun gwiro gwa late likanano ḏa ŋuɽun ŋɩmaro dino no, namɩni elo mijorneja ḏouwɩɽiḏa. 16namɩni ŋa gwa galakwe ŋa gwalɩŋe ŋa gwəkədəḏə gwəmɩnyo gwuŋa ga? na ŋa gwəmɩnyo galakwe ŋa gwalɩŋe ŋa gwəkədəḏə gwa gwuŋa ga?

17namɩni ouwɩricil gwete gwete ŋuwewele ŋuɽun ŋun ŋigəgɩnyeḏijijɩl gwele ganu ŋun ŋornejilɩlo elo. na ŋuɽun ŋeno ŋiro ŋuɽun ŋun ŋigelɩlo kalo geḏi kɩniso wei. 18na ḏa gwete gwun gwuɽənə morniḏini gwo gwanarno lərriḏi liəjico, namɩni ḏa gwete gwun gwate gwuɽəno no morniḏini gwo gwanarno luɽəne. 19gi gwune ḏuɽəno ḏate ḏəṯi ŋuɽuna ŋədi no, namɩni ḏimajiga dino gwate gwuɽəno no ḏate ḏəṯi ŋuɽuna ŋədi no, namɩni ḏidɩmeḏa ŋuɽuna ga ŋun ŋigelɩlo elo. 20ouwɩrico gwete gwete ŋwujaḏaṯa ŋuɽun ŋun ŋijune gwunne orniḏɩlo. 21ŋa gwiro wainy gwunne orniḏaŋalo a? aṯagela ŋuɽuna ŋeno ŋaŋani ḏugwor no, namɩni ḏa ŋa malɩŋe ŋe ḏɩkədəḏɩnə ga məṯi lamon leno. 22namɩni wainy gwun gworniḏɩnu kwele gwun gwiro elo, gwiro gwiji gweḏi gwele gwun gwukədəḏɩnu ga ŋɩwainy ŋuŋun, na ŋiro dino ŋu gwun gworniḏɩnu gwunne ju ga dino gwiro wainy gweḏi kɩrisṯo. 23nyaŋa liḏɩlɩnu jili je, nyaduḏa lɩwainy leḏi liji no. 24lɩmagəri, ouwɩrico gwete gwete ŋwujaḏaṯa ŋuɽun ŋun ŋijune gwunne orniḏɩlo na gwijil elo gwe.

25na gwan nyera, nyi gwate gwəṯi ŋuɽuna ŋun ŋigelijɩnyilo gwele gwun gwiro elo no, namɩni nyi gwəjiḏəḏə ŋuɽuna ŋinyi gi gwiji gwun gwima ḏiŋiriḏa ḏeḏi gwele ḏuḏɩni ga. 26niarno gi gwune ŋuɽun ŋeḏi gaja keno ŋɩbɩɽe, ŋiŋir ḏa gwiji majiga dino. 27ŋa kanano kwa a? aṯabunya ḏɩkədəḏɩnə ga no. ŋa gwate maje gwa na? aṯabunya gwa no. 28na ḏa ŋa mago ŋa gwo gwanape ŋuɽuna ŋɩki; na ḏa ŋera ŋɩməgini, ŋo ŋanape ŋuɽuna ŋɩki. na leno ləṯi ḏɩḏia kaŋɩnu na nyi gwəmɩnyu nyi gwajɩdɩme ḏɩḏia ṯeno.

29namɩni nyi gwar dino lɩmagəri, gi gwune gaja gwobɩla ganu; na dino kaja gun gila luŋa lun ləṯi la laro gi late ləṯɩlo no, 30na luŋa lun ləri gwula laro gi late ləri gwula no, na luŋa lun lidilo ganu gi late lidilo ganu no, na luŋa lun laṯela laro gi luŋa lun late ləṯi ŋɩdio no, 31na luŋa lun laṯɩduji ŋuɽuna ŋeḏi gɩḏɩlio keno laro gi luŋa lun late laṯɩduji no; gi gwune ŋuɽun ŋeḏi gɩḏilio keno ŋar ŋete.

32na nyi gwubunyaje nya late ləṯi ḏuməḏɩno ganu dino no. ŋu gwun gwate gwago no gwaṯɩdɩme ŋɩdio ŋeḏi gwele gwun gwiro elo, galakwe gwaṯiŋiri gwelɩnya ḏugwore. 33namɩni ŋu gwun gwago gwaṯɩdɩme ŋɩdio ŋeḏi gɩḏilio keno, galakwe aṯuiŋiri gwa gwuŋun ḏugwore; 34na dino ŋuɽun ŋo kaja ŋeḏi gwa gwun gwəginu na ŋeḏi ŋera. gwa gwun gwate gwəginu no gwadɩme ŋɩdio ŋeḏi gwele gwun gwiro elo, kani nuro piḏo pɽul kaŋɩnu na kwuɽɩwə dino; namɩni ŋu gwun gwəginu gwaṯɩdɩme ŋɩdio ŋeḏi gɩḏilio galakwe aṯuiŋiri gwəmɩnyo gwuŋun ḏugwore. 35na nyi gwar dino gwan ḏiŋiriḏa dalo, gaṯe giro geno gar ŋajiliŋgiɽɩjo lagalo no, namɩni gwan ŋuɽun ŋun ŋideleḏo, kani nyəpijo gwelɩnya ŋɩru nyanuməḏɩno ŋede no.

36namɩni ḏa gwiji manuməḏɩni manarno ŋimularre ŋun ŋate ŋideleḏo ŋera ŋuŋun no, namɩni ḏa kaja ŋuŋun gɩmadarane, na ḏa ŋɩmaro dino ouwɩrico ŋularre gi gwune əmɩnyulo. ŋu gwo gwanarre ŋuɽuna ŋun ŋɩki, ouwɩricɩlo alagiḏe. 37namɩni ŋu gwun gwuḏuḏɩnu muma gi ḏugwor ganu ḏuŋun, na gwate gwəṯi ŋuɽuna ŋe ḏiremeṯeḏeica no, namɩni gwəṯi ŋelɩnya ŋuɽun ŋuŋun ŋun ŋɩbunyulo, na ḏa mar gi ḏugwor ganu ḏuŋun no ŋudɩme ŋeria ŋuŋun ŋate ŋəgini no, ŋwərri muma. 38na ŋiro dino, ŋu gwun gwiḏəḏi ŋeria ŋuŋun ḏəgino ŋwarre muma, namɩni ŋu gwun gwate gwiḏəḏi ŋeria ḏəgino no ŋwərrɩjo ŋuɽuna ŋiŋirano.

39na gwa gwukanano kwəmɩnyo gwuŋun gwune gwijɩre miḏo; namɩni ḏa gwəmɩnyo gwuŋun mai, ŋu gwəṯi ŋɩma gwəgini gwəmɩnyəŋe gwiro kaja gwun gwubunyu, namɩni kwele kuwei. 40namɩni nyi gwarno, ŋu gwiŋirano ḏugwore ḏa majiga dino, na nyi gwarno nyi gwəṯi gwuɽɩwə gweḏi elo.

Currently Selected:

1 kurinṯus 7: OTR1966

Highlight

Copy

Compare