Fiilibbi 2
2
Gwibupo lijo dilro letipo
1Minoŋ ada gathaje uwa gwimaje, ŋwuje di al Masiiẖ; ada dhuŋun dhimaje dha dhiŋiriye kwijo dhugore gi uminyi, ada aicaijiye gwimaje gwa Dhigirim, ada ina gwimaje gwina gwiŋir, 2meajul iŋiruŋw dhugore gwiny, danya uthi fikr gwetipo, a nyuthi uminyuŋw gwetipo, a nyirijo ŋida ŋetipo je galo.
A dilrujini litilitiny
3Athanya apo dhuŋuna dheda guginadhini gwai ganu i dhuŋun dhai dha dhare ŋamilai dhina dhiro tur no; abi ruini gwai gwitiny gi ŋadigireny ŋalo nyalabrico liter aliŋirani dagalo. 4Athanya irijo ŋida je galo ŋina ŋuthanyalo no, abi abricul gweta gweta dagalo ganu ŋwirijo ŋida je galo ŋa liji liter ko.
Dhuŋun dhina dhuthi Yasuuⓐ dha rujini gwitiny a ai gwuŋun gwan anaŋa
5Abricul fikr ibigwa ŋwuje dagalo gwina gwijo di al Masiiẖ Yasuuⓐ ko, 6gwina gwiro ŋinena s̱uura gwa Kalo, athuŋwbi dhuredhi aŋinu yuŋun darnu lubio Kalo gai no, 7ŋwubiruje gwidom gwuŋun gwitiny, ŋwapai s̱uura gwa gine, gwiliŋinu gwiro ŋinena liji; 8a ŋwubujini gwiro ŋinena kwiji, ŋwuruje gwidom gwuŋun gwitiny, ŋwuthejo Kaloŋa kuni duŋwai, ai gi lure alaŋ lina limaliganu. 9A minoŋ gwima Kalo alije alaŋ ko, ŋwudhedha jiriny jina jibuthanu gi jiriny peth, 10di ŋidi peth ŋina ŋo Sama, a ŋina ŋo kwiyaŋ, a ŋina ŋo kwiyaŋ galiny idijo jiriny ja Yasuuⓐ ŋwurko ŋwai, 11a diŋila peth dateje galo darnu Yasuuⓐ al Masiiẖ gwiro Kweleny, di majdh gwa Kalo gina giro Babo.
Dhuŋun dhan meaje gilaŋuŋw gi midhe gwuri
12A minoŋ, liji lai lina luminyinyilo, gwiro ŋinena uthejanyana dhuŋuna dhiny nyuni ŋwamun peth, gwati gwiro ŋinena nyinje dagalo ganu no, abi ŋinena gwoinyadhanu gwuleny ada nyi gwati gwimaje dagalo ganu no, meajul gilaŋuŋw gwalo ŋidheny ŋai a ubi gwai galo. 13Ŋinena Kalo giro gina gapo ŋiro dagalo ganu danya uminyi danyapai dhuŋuna dhina dhibupuŋw gwan iŋir dhugore gwuŋun. 14Apul dhuŋuna peth athanya romajo diman galo no, athanya upejiyo dhuŋuna alaŋ no, 15dathanya uthi lom no, nyaro ŋinena keleŋa gina gitigitiny ga Kalo gina gati guthi dhara keligeny ganu gi liji lina lapo ganu a lina like no, degen ganu nyaŋa limaŋini liro ŋinena fure gi kidhila. 16Muthadhul dhuŋuna dhadhi midhe; dathiny aro ŋamilai gi lamun la al Masiiẖ darnu nyi gwati gwiginadho tur no, i nyi gwati gwapo ŋiro tur no. 17Abi ada ŋin ŋiny ŋimabulujini ko gi loboŋ ladhi garini gwan ŋiro ŋa imaan gwalo, nyi gwiŋir dhugore, a nyi gwiŋir dhugore nyaŋa ŋalai peth. 18Gi dhuŋun ibidha iŋiriyul dugore ko, iŋiriyul dugore nyi ŋalai.
Tiimuuthaawus
19Abi nyi gwuthi dhunijuŋw di Kweleny gwina gwan Yasuuⓐ diny ukeja Tiimuuthaawusuŋw dagalo gwaji gwitiny, diny iŋir ganu ada nyi gwimaliŋa dhuŋuna dhalo. 20Ŋinena athiny uthi kwijo gwiter gwiro ŋinena ŋeda gwina gwathi gitijo dhuŋuna je momaŋ dhina dhuthanya no. 21Ŋinena liji peth lathibupe ŋida ŋegen ŋina ŋuthilo, a lati lathibupe ŋida ŋa Yasuuⓐ al Masiiẖ no. 22Abi nyaŋa liliŋidhi dhuŋuna dhina dhuthuŋw darnu, gwiro ŋinena ŋari ŋina ŋupijo babuŋw gwuŋun ŋiro, gwimanagwai apai ŋiro gi Dhuŋun dhina Dhiŋir. 23A nyi gwuminyu diny ukeja ŋeduŋw dagalo babraŋ maji minyi liŋa dhuŋuna dhina dhaji dhila diginy. 24Abi nyi gwuthi uminyuŋw di Kweleny darnu nyi ko gwila dagalo gwaji gwitiny.
Abafruuditus
25Abi nyi gwarnu aram nyi gwukeja maguri dagalo gwina gwan Abafruuditus, gwina gwapanagwai ŋiro ŋadhi ejigur gwina gwukejanya, gwina gwathiny upijo ŋiro ŋina ŋathinyil bupe. 26Ŋeda gwuminyu dajaŋa peth; gwithi dhugor ganu ŋinena diŋinanya darnu ŋeda gwuma. 27Titiganu ŋeda gwuma kwereny di ŋwuje githo dai, abi gwima Kalo ina, a gwati gwinudhi Kalo cucun no, abi anaŋa ram ko, dathiny uthi kuŋw dhugore ŋwamun ganu ram no. 28A minoŋ gwiny ukeja dagalo dhuŋun dhai dhina dhijo momaŋ di, ada gwimanya aŋa manaŋ nyiŋir dugore ko, a nyi gwati gwake dhugore gwuleny no. 29A minoŋ uminyul gi Kweleny iŋir gwai dugore peth; a neyilo lina liro minoŋ dagalo. 30Ŋinena gwan ŋiro ŋa al Masiiẖ gwijo githo dai, ŋwuje kalo gina guthi dhuŋuna dhina dhibur gi gwidom gwuŋun, duŋw meaje ŋiro ŋalo ŋina ŋamiratho diginy.
Currently Selected:
Fiilibbi 2: HBN
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1966.
