Aⲁmaal Ar Rusul 6
6
Uthini ganu gwa liji lina liro kworoŋo‐thiril
1A gi ŋwamun ibiŋwa dina ma calmiz oinyadhani, a liji lina liro Yuunaaniyiin romaje diman galo gi liji lina liro ⓐibraaniyiin, ŋinena athi linina legen dhudhanini ganu gi ŋiro ŋadhi dhedha lijo ŋida ŋa dheny ŋina ŋupinu ŋwamun peth. 2A lina liro die‐a‐ram urnie calmiz jina joinyadho allaici, Dhuŋun dhati dhiŋir danagathani dhuŋuna dha Kalo danapai ŋiro ŋadhi dhedha lijo ŋida ŋa dheny no. 3A minoŋ, limega lai, uthinul lijo ganu kworoŋo‐thiril dagalo ganu lina luthi shahaada gwina gwiŋir, aloinyadhe Dhigirima dhina Dhiŋir aluthi bebruŋw, alligeta dilapai ŋiro ibiŋa. 4Abi anaŋa lathil labiŋaijo Kaloŋa ŋwamun peth, anapai ŋiro ŋadhabiŋaijo lijo dhuŋuna dha Kalo. 5A dhuŋun ibidha iŋir gi je ganu ja liji peth, almutha Istifaanuusuŋw, gwina gwiro kwoma gwina gwoinyadho imaan a Dhigirim dhina Dhiŋir, a Fiilibbus, a Buruukhuurus, a Niikaanuur, a Tiimuun, a Barmiinaas, a Niiguulaawus gwa Anṯaakiiya gwina gwuminyu dhuŋuna dha Yahuud. 6Lina lidhunejilo gi je ganu ja liji lina lukejinu, a dina malabiŋaijo Kaloŋa alligeta doi alaŋ. 7A dhuŋun dha Kalo bai galo; a calmiz oinyadhani gwuleny gi Urushaliim; a liji loinyadho gi gusus uthejo dhuŋuna dha imaan nyuni.
Liji luthi dhuŋuna dhina dhike dhan Istifaanuus
8Abi Istifaanuus, gwina gwoinyadho imaan a ŋoma, apai ŋiro ŋina ŋathalije lijo galo dir a ŋiro ŋina ŋipiŋipa gi liji ganu. 9A liji coŋ la majmaⓐ gwina gwan majmaⓐ gwa Liibartiiniyiin, a Gerawaaniyiin, a Iskandariyiin, a gi ŋediŋa lina lathije gi Kiiliikiiya a Asiiya alkadhe Istifaanuus ŋalai. 10Athil buthi ŋoma dildhinyi bebruŋw a Dhigirim dhina dhabiŋuŋwdhai no. 11A minoŋ alabiŋaijo lijo nyim dilarnu, Gwidiŋinana duŋwabiŋi dhuŋuna dhadhilo Muusuŋw a Kalo. 12Alkiye lijo dugore a shiyuuk a jathib, aldire almutha algwela gi juriya. 13Aligeta shuhuud lina liro lidhuŋun lina larnu, Kwiji ibigwa gwati gwimulo nono duŋwabiŋi dhuŋuna dhadhilo kaloŋa ibiga gina giŋir didirel, a naamuus no. 14Ŋinena diŋinana duŋwarnu Yasuuⓐ ibigwa gwa Naas̱ira gwaji gwirniye kaloŋa ibiga, a ŋwupeye dhuŋuna ganu dhina dhidhedhije Muusa. 15A liji teje je peth lina lijalo gi juriya, alaŋa gi je ganu juŋun diro ŋinena je ja malaak.
Currently Selected:
Aⲁmaal Ar Rusul 6: HBN
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1966.
