Aⲁmaal Ar Rusul 5

H̱anaaniiya a Saffiira

1Abi kwiji gwina gwan H̱anaaniiya, a kwa gwuŋun gwina gwan Saffiira, lili dhiruiny dhina dhuthilo, 2algathani gwarush degen gidhria, a kwa gwuŋun gwiliŋidhi dhuŋuna ibidha, ŋwapai gidhria, ŋwugeta ŋwora ganu ŋwa liji lina lukejinu. 3Abi Buṯrus aicinu, H̱anaaniiya gwai, kworaŋ abi Sheṯaan oinyaje dhugore dhuŋa daŋa abiŋaijo Dhigirima dhina Dhiŋir ŋidhuŋinaŋa, ŋababricana gwarush gidhria gwina gwilanya dhiruiny? 4Dina uthaŋa dhiruiny, dhuŋa dhati dhiro na? A dina ilaŋa, dhuŋun dhuŋa dhati dhiro na? Kworaŋ ŋabi geta dhuŋuna ibidha gi dhugor ganu dhuŋa? Ŋa gwati gwabiŋaijo lijo dhuŋuna dhina dhiro ŋidhuŋun no, ŋa babiŋaijo Kaloŋa. 5A dina ma H̱anaaniiya diŋini dhuŋuna ibidha ŋwide, ŋwai. A ŋidheny je ŋina ŋinaŋ degen peth lina lidiŋinu dhuŋuna ibidha. 6A jamal dire, almiri nono kiraŋ gai, alapai por, algwurce. 7Dina ma saaⓐa erna jina jiro ŋinena thiril, a kwa gwuŋun uni, athuŋw liŋidhi dhuŋuna dhina dhimaje no. 8A Buṯrus abiŋaijo ŋwaicinu, Abiŋaijiny gwarush ibigwa gwiro gwina gwilanya dhiruiny peth di a? Ŋwubarnu, Ye, gwiro ibigwa. 9A Buṯrus aicinu, Kworaŋ nyabecejiye dhuŋuna danya idheje Dhigirima dha Kweleny? Aŋadhi, ŋwora ŋwa ŋediŋa lina ligwurco kwoma gwuŋa ŋwo kour, a laŋapai por. 10Ŋwunida ganu ŋwora ganu ŋwuŋun, ŋwai, a jamal udha, albuje gwimai, alapai por, algwurce dhel kuni dha kwoma gwuŋun. 11A ŋidheny je ŋina ŋipa gwuleny gi liji peth la kaniisa, a gi liji peth lina lidiŋinu dhuŋuna ibidha.

Ŋiro ŋina ŋipiŋipa ŋina ŋapilo liji lina lukejinu, a dhuŋun dha dhiŋiriye lijo nono

12A ŋiro ŋina ŋipiŋipa a ŋina ŋathalije lijo galo dir je gi liji ganu loinyadho gi doi da liji lina lukejinu; (a ŋediŋa peth je luthi dhugore dhetipo kwereny ganu gwa Sulemaan. 13Abi gi liji lina lidhainu athuŋwbi jo gweda degen ganu gwina gwire ganu dilaicaijiye ŋediŋa lai liduŋw no; abi lathil liji neye. 14A liji lina liro loma a lina liro la lina luminyu Kwelenya aloinyadhani gwoinyadho.) 15Di athi liji apa lijo lina luma alligeta gi dai alaŋ ŋwagram alaŋ a ŋidi alaŋ ŋiter ŋa dhidhire, di ada Buṯrus gwimila githo degen a gi dhuŋun dhina dhitinyunu ada dhigirim dhuŋun dhimaje gi coŋ degen alaŋ. 16A liji auradha liduŋw loinyadho ko la ŋwen ŋwina ŋwipiŋwipa ŋwina ŋwurejo Urushaliimuŋw galo, alapa lijo lina luma, a lina lidhagirinuna nyuriny; aliŋir nono peth.

Buṯrusŋa Yuuẖanna gwai gi je ganu ja juriya manaŋ

17Abi kweleny gwa gusus dire, a ŋediŋa peth lina lijil lai, (lina liro liji la S̱adduugiyiin,) alkadugore gwuleny, 18almutha lijo lina lukejinu doi dai degen, alligeta gi sijn gwa liji peth. 19Abi malaak gwa Kweleny igiye jibura ja sijn gile, ŋwulteye por, ŋwulaicinu, 20Idhul, nya dhuna gi hekal nyabiŋaijo lijo peth dhuŋuna peth dha midhe ibigwa. 21A dina maldiŋini dhuŋuna ibidhe, aluni gi hekal ro gile galo, alje dalimiye. Abi kweleny gwa gusus a ŋediŋa lina lijil lai urnie lijo la juriya a shiyuuk peth la keleŋa ga Israayiil liduŋw, alukejiye gi sijn dilodha. 22Abi dina ma jadham ila, athilibujo gi sijn no, albaura, allabiŋaijo, 23allaici, Anaŋa libujo sijn gwilaŋthinu momaŋ, a lina lathethadhe lidhunudhi por kwereny kour, abi dina manigiye, athana bujo kwijo gweda kiru no. 24A dina ma zabith gwa ejigur ya hekal diŋini a leleny la gusus dhuŋuna ibidha, alireye je galo gi dhuŋun dhegen alarnu dhuŋun dhiro dhaŋ ibidha? 25A gweta ila, ŋwulabiŋaijo, ŋwulaicinu, Aŋadhul, liji lina ligetanyalo gi sijn ŋediŋa lo gi hekal, lidhunudhi alalimiye lijo. 26Abaji a zabith gwa ejigurŋa jadham jai ela alodha ŋediŋaije athili udhi ŋura ŋai no, ŋinena dhenyilo lijo, dathil laico nyol nyai no. 27A dina mallodha, allidhuneje gi juriya. Al kweleny gwa gusus othaije galo, 28ŋwulaicinu, Anaŋa lati labiŋaijaje momaŋ darnu nyaŋa lati lalimiye jiriny jai ibija na? A aŋadhi, nyaŋa limoinyaje Urushaliimuŋw taⓐliim dhai dhalo, a nyabupe dijilupijo ŋina ŋa kwiji ibigwa. 29Albi Buṯrus abiŋaijo a liji lina lukejinu alarnu, Gwiŋiranu dana uthejo Kaloŋa nyuni gwoinyadhanu gi liji. 30Kalo ga baboŋa lega gimadireye Yasuuⓐuŋw, gwina gwimanya rinya nyalije gi lure alaŋ lina limaliganu. 31Ŋeda gwima Kalo alije dhoi dhai dhuŋun dhina dhiro dhiŋir ŋwuro Kweleny a Mukhallis̱, duŋwdhedha Israayiiluŋw urluŋw dugore galo gi ŋidi ŋina ŋike, a dhudhanuŋw ganu gi ŋidi ŋina ŋike. 32A anaŋa liro shuhuud gwuŋun gi dhuŋun ibidha; a Dhigirim dhina Dhiŋir ko, dhina dhidhedhi Kalo ŋediŋaije lina lathuthejo dhuŋuna dhuŋun kuni.

33A dina maldiŋini dhuŋuna ibidhe, alkadugore gwuleny, alabiŋaijiye dillirinya. 34Abi kwiji gweta direlaŋ gi juriya gwina gwiro Farriisi, gwan Qamaalaayiil, gwina gwiro muⓐallim gwa naamuus, gwathi liji neje ŋwudhedha amr di liji lina lukejinu tu por kaija gitiny; 35ŋwulbabiŋaijo ŋwulaici, Liji lai la Israayiil, ethadhinul galo gi lidom lalo gi dhuŋun dha liji ibila dhina dhibupanya danyapai. 36Kwereny ŋwamun ibiŋwa Thuudaas gwidiro ŋwarnu gwiro kwiji gwina gwinaŋ kwidom gwuŋun; gwina gwijilo liji lai lina lar ŋinena arbaⓐ miiya; gwina gwimarinyini, a liji peth lina lathillai gwudhie albai galo, alruini tur. 37A gidon gi kwiji ibigwa a Yahuudha dire gwa Jaliil gi ŋwamun ŋwadhule jiriny ja liji peth, ŋwodha lijo loinyadho dilgwuje; a ŋeda ko erna, a liji peth lina ligwujo ŋeduŋw albai galo. 38A ŋinena nyi gwajabiŋaijo ŋajaici, Tuiyul ganu gi liji ibila a abricillo; ŋinena ada juriya ibija i ŋiro ibiŋa ŋimaro ŋa liji ŋaji ŋerna; 39abi ada ŋimaro ŋa Kalo, nyaŋa lati luthi ŋoma danyal dhinyi no; i udubidi nyaŋa labujini lapo ŋoŋora Kalo ŋalai ko. 40Aluminyi dhuŋuna dhuŋun, alurnie lijo lina lukejinu allipi allabiŋaijo dathil abiŋu jiriny jai ja Yasuuⓐ no, albaji alabrico alela. 41Abi ŋediŋa ela gi je ganu ja juriya liŋir dugore ŋinena dhuredhinulo darnu laudhi dilapai dhara gi dhuŋun dha jiriny juŋun. 42A ŋwamun peth gi hekal a gi dunu peth, athil dhunudhi dilalimiye lijo a allabiŋaijo dhuŋuna dhan Yasuuⓐ al Masiiẖ no.

Currently Selected:

Aⲁmaal Ar Rusul 5: HBN

Highlight

Copy