Aⲁmaal Ar Rusul 25
25
Dhuŋun dhina dhabiŋu Buulus gi je ganu ja Fastuus
1Fastuus gwijo gi mudiiriiya gwuŋun, a dina ma ŋwamun thiril erna ŋwugathani Ges̱ariiyaŋw ŋwalo Urushaliim. 2A kweleny gwa gusus a leleny la Yahuud abiŋaijo dhuŋuna dhina dhiro dhuwan gi dhuŋun dha Buulus; alothaije galo gwuleny, 3alari gwukejiye alodha gi Urushaliim, aldhunijo gi dhai dilrinya. 4Abi Fastuus arnu ladima Buulusuŋw gi Ges̱ariiya, ŋinena aruŋw gwela mine ma ŋwamun ro coŋ. 5Ŋwarnu, Abrico lijo dagalo lina luthi ŋoma danalgwudhie, alteje kwijo ibigwa galo, ada dhuŋun dhimaje dugun dhina dhike. 6A dina muŋw meaje ŋwamun ŋwoinyadhanu gi die degen ganu, ŋwule gi Ges̱ariiya; a bigunu ŋwujalo kursi alaŋ ga ẖukm ŋwudhedha amr dilapa Buulusuŋw. 7A dina muŋw ila, a Yahuud urejo galo lina lulo gi Urushaliim, alabiŋi dhuŋuna dhoinyadho di Buulus dhina dhinaŋ dhina dhati dhuthi ŋoma dhalaŋajo darnu dhiro titiganu no. 8Athibi Buulus abiŋi dhuŋuna dhuŋun ŋwarnu, Nyi gwati gwimakiye dhuŋuna dheda i gi dhuŋun dha naamuus gwa Yahuud, i gi hekal, i di Ges̱ar gatur no. 9Abi Fastuus ari gwiŋiriye Yahuud dugore, ŋwabiŋaijo Buulusuŋw ŋwaici, Ŋa gwuminyu daŋalo gi Urushaliim, daŋakimini mine gi dhuŋun ibidha gi je ganu jiny a? 10Abi Buulus arnu, Nyi gwa gwidhunudhi githo kursi ga ẖukm gwa Ges̱ar, kalo gina giŋir dinyin akimini; ŋa gwiliŋidhi ko momaŋ darnu nyi gwati gwupijo Yahuud dhuŋuna dheda dhina dhike no. 11Ada nyi gwimaro kwiji gwina gwike, i ada nyi gwimapai ŋida ŋeda ŋina ŋaudhi ŋadhai, nyi gwati gwadoinya dinyai no; abi ada dhuŋun dheda dhati dhimaje diginy dhiro ŋinena dhina dhabiŋudhi ŋediŋa diginy no, kwiji gwati gweda gwuthi ŋoma dinyildhedha no. Nyi gwageta dhuŋuna dhiny di Ges̱ar. 12A dina ma Fastuusŋa abiŋaijiye liji lai la juriya, ŋwarnu, Ŋa gwara gwageta dhuŋuna dhuŋa di Ges̱ar a? Ŋa gwuthi ŋoma gwela di Ges̱ar.
Aqriibaasŋa Barniiki gwai
13A dina ma ŋwamun coŋ erna, a malik gwina gwan Aqriibaasŋa Barniiki gwai ela gi Ges̱ariiya dilmira Fastuusuŋw. 14A dina jilo mine ŋwamun ŋwoinyadho, a Fastuus abiŋaijo malik dhuŋuna dhan Buulus, ŋwarnu, Kwiji gweta gwo gwina gwiro maẖbuus gwina gwigathanu Fiiliks gi sijn; 15dina jiny gi Urushaliim, nyi leleny la gusus a shiyuuk la Yahuud abiŋadhaijo dugun gwai, albuje dinyi akimiye. 16Nyilbabiŋaijo nyilaici, Liji la Ruumiya lati luthi dhuŋuna dhina dhathilapai dhina dharnu ladhiŋa kwijo gweta duŋwai, kwereny nanaŋ gwati gwuthi lijo lina luthi dhuŋuna dugun dilldaŋajiye gi je ganu, a ŋwuthi lamun lina liŋir duŋwabiŋi dhuŋuna dhuŋun gi dhuŋun dhina dhabiŋudhilo dugun no. 17A dina malauradha liduŋw mina, nyi gwati gwidhunudhi no nyi jalo bigunu kursi ga ẖukm, nyildhedha amr di kwiji upina diginy. 18A dina ma liji dhunalaŋ lina labiŋudhi dugun, athil abiŋu dhuŋuna dhetipo dhiro ŋinena dhina dharinydhai no; 19albuthi dhuŋuna dugun dhan dhuŋun dhina dhuthilo dha dhorthadha Kaloŋa, a dhan gweta gwina gwan Yasuuⓐ, gwina gwimai, athibi Buulus arnu gwo gwimidho. 20A dina athinyi liŋidhi darnu nyi gwapaŋa gi dhuŋun ibidha no, nyothaije galo darnu, Ada gwimuminyi duŋwela gi Urushaliim ŋwukimini mine gi dhuŋun dha dhuŋun ibidha. 21Abi dina ma Buulus bupe dhuŋuna dhuŋun duŋwgitini di Uqusṯus, nyi dhedha lijo amr dildima di minyi ukeje di Ges̱ar. 22A Aqriibaas aici Fastuusuŋw nu, Nyi gwuminyu ko dinyi diŋini dhuŋuna dha kwiji ibigwa. Ŋwubaicinu gwaŋadiŋini bigunu.
23A bigunu dina ma Aqriibaasŋa ila Barniiki gwai aŋini gwai gwina gwinaŋ, aluni kalo gadhi diŋini komandaanŋalai a liji lina lipilipa la mediina, a Fastuus dhedha lijo amr dilapa Buulusuŋw. 24A Fastuus arnu, Malik gwai gwina gwan Aqriibaas, a liji peth lina lo lijanalai mina, aŋadhul kwijo ibigwa, gwina gwabiŋudhina Yahuud peth diginy gi Urushaliim a mina, alure gwula alarnu gwati gwiŋir duŋwmidhe manaŋ no. 25Abi dina minyi buje darnu gwati gwapo dhuŋuna dheda dhina dhaudhi duŋwai no; a ŋeda bupe duŋwgeta dhuŋuna dhuŋun gi je ganu ja Uqusṯus, nyuminyi dinyi ukeja. 26Ŋinena athinyi bujo dhuŋuna dhina dhiliŋinu momaŋ dugun dinyi ulijo kwelenya gwiny no, a minoŋ nyodhadha gi je ganu jalo, a gwuleny gi je ganu juŋa, malik gwai gwina gwan Aqriibaas, a maji maŋa diŋini dhuŋuna dhuŋun, nyi gwuthi ŋoma dinyi buje dhuŋuna dhina dhinyi ule. 27Dhuŋun dhiliŋinu diginy darnu gwati gwaudhi dinyi ukeje maẖbuus, ada dhuŋun dhati dhimaje dhina dhigitinu dugun dhina dhiliŋinu momaŋ no.
Currently Selected:
Aⲁmaal Ar Rusul 25: HBN
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1966.
