Aⲁmaal Ar Rusul 24
24
Maẖkama gwina gwigitinu gwan Buulus gi je ganu ja mudiir gwina gwan Fiiliks
1A dina ma ŋwamun ro thudhina a H̱anaaniiya gwina gwiro kweleny gwa gusus ula shiyuuk ŋalai a kwiji gweta gwina gwuthi ŋoma dabiŋi momaŋ gwina gwan Tartullus, alabiŋaijo mudiiruŋw dhuŋuna dhina dhuthilo di Buulus. 2A dina mal urnie, a Tartullus abiŋi kwerkwereny dhuŋuna ŋwarnu, Fiiliks gwai gwina gwuminyinu, anaŋa luthi audhaijiyuŋw galo gwina gwiŋir ŋa gwai, a ŋiro ŋina ŋiŋir gwuleny ŋimaje gi liji ibila dhuŋun dhai dhina dhiŋir dhina dhigetaŋa kwereny afkaar gwai gwuŋa gwina gwiŋir. 3Anaŋa lathuminyi dhuŋuna ibidha shukr gwai ŋwamun peth a kalo peth. 4Nyi gwati gwara gwaŋa abiŋaijo dhuŋuna dhoinyadho gwortal no, abi gi dhugor dhuŋa dhina dhiŋir nyi gwothaijaŋa galo dijideŋinaijo gi dhuŋun coŋ. 5Anaŋa libujo kwijo ibigwa dathuŋw ukeje lijo, athuŋw abiŋaijo Yahuud lina lathije kidhila peth dilkaijiye gi je, a ŋwuro kweleny gwa liji lina liro Naas̱iriyiin. 6Ŋwari gwaruje hekal ŋirle ko, anabi mutha anari gwanakimiye gi dhuŋun dha naamuus gwuri. 7Abi komandaan gwina gwan Liisiyaas ela daguri, jiwala ŋeduŋw gi doi ganu duri ŋura ŋai ŋina ŋipa. 8Ŋwabiŋaijo lijo lina labiŋudhi dugun darnu lila duguŋa. Ŋa gwuthi ŋoma daŋal othaije galo daŋa liŋa dhuŋuna peth dhina dhabiŋudhildhai dugun. 9A Yahuud uthi dhuŋuna dhetipo ko, alarnu dhuŋun ibidha dhiro minoŋ.
10A dina ma mudiir aici Buulusuŋw ŋalŋalam duŋwabiŋi, a Buulus arnu, Ŋinena liŋidhiny darnu ŋa gwiro gadhi jidhileo joinyadho ga liji ibila, nyi gwabiŋi dhuŋuna dhiny iŋir gwai dhugore gwoinyadhanu. 11Ŋa gwuthi ŋoma gwaliŋa darnu nyi gwati gwuthi ŋwamun ŋwoinyadhanu gi ŋwamun ŋwina ŋwiro die‐a‐ram dina udhiny gi Urushaliim nyorthadha Kaloŋa; 12athinyilbujo danabiŋaijiye kwiji gwai gwetipo, i diny wureje lijo liduŋw gi hekal i gi majaamiⓐ, i gi mediina no. 13I lati luthi ŋoma dilbuje dhuŋuna dhina dhaudhi dhina dhabiŋudhildhai diginy ŋinena no. 14Abi nyi gwa gwitejo dhuŋuna galo ibidha duguŋa darnu nyi gwathorthadha Kaloŋa ga baboŋa liny dhuŋun dhai dha Dhai dhina dharildhai nu dhiro gwidhuŋun, nyuminyi dhuŋuna peth dhina dhulinu gi naamuus a dha nebiŋa, 15a nyi gwuthi dhunijuŋw gi Kalo gwina gwathi ŋediŋa ko dhunijo, darnu liji laji ladire dai lina liŋir a lina like. 16A minoŋ nyi ko gwathupiye aŋina iny ŋiro dinyuthi dhugore dhina dhiŋir ŋwamun peth dhina dhati dhuthi dikejinuŋw gi dhuŋun dha Kalo i gi liji no. 17A dina ma jidhila joinyadho erna nyila gi liji liny nyilupijo gwarush a ŋidi ŋadhi dhugijo Kaloŋa. 18Dina apiny dhuŋuna ibidha, nyi Yahuud coŋ la Asiiya buje gi hekal dijurini, athana jo liji lai loinyadho, i liji lai lina lilagujo dhuŋuna ganu no. 19Gwiŋir degen dilje gi je ganu juŋa daŋaltejo galo, ada limuthi dhuŋuna dheda diginy. 20I abrico lijo ibila alabiŋi ada limabuje dhuŋuna dhina dhike diginy dina dhunudhiny gi je ganu ja juriya. 21Udubidi gi dhuŋun dha dhuŋun ibidha dhetipo dhina dhurinydhai gwula dina dhunudhiny degen ganu, Gi dhuŋun dhan dire dai gwa liji lina laio nyi gwukiminu dagalo ŋinenaŋina.
Fiiliks gwigeto lamun liter ladhi diŋini dhuŋuna dhuŋun
22A dina ma Fiiliks diŋini dhuŋuna ibidha, ŋwuliŋa dhuŋuna dha Dhai ibidha gwoinyadhanu momaŋ, ŋwuldhuneje maẖkama, ŋwarnu, Maji ma Liisiyaas gwina gwiro komandaan ula, nyi gwara gwaliŋa dhuŋuna peth dha dhuŋun dhalo. 23Ŋwudhedha zabithuŋw amr duŋwdima Buulusuŋw, ŋwubabrico ŋwuthi ẖurriiya, athuŋw ekajo gweda gi orikaŋa luŋun dilupijo ŋiro i dilila dugun no. 24A ma ŋwamun ro coŋ a Fiiliks ila kwa gwai gwuŋun gwina gwan Duruusilla, gwina gwiro Yahuudi; ŋwukejiye di Buulus ŋwudiŋini dhuŋuna dugun dhan imaan gwuŋun gi al Masiiẖ. 25A dina juŋw duŋwabiŋi dhuŋuna dhan iŋir a dhan mutha dugore gi ŋidi ŋina ŋathil dugor bupe a dhan ẖukm gwina gwaji gwila, a Fiiliks dhenya ŋwarnu, Idhi nanaŋ ŋinena; a maji minyi buje lamun lina liŋir nyi gwaŋa urnia. 26Ŋwari ko nu udubidi gwa Buulus dhedha gwarush duŋwguda galo; a gi dhuŋun ibidha athuŋwun ukejiye ŋwamun ganu ŋwoinyadho, athilgwai abiŋi. 27Abi dina ma jidhila ram erna, a Buurkiyuus Fastuus apai ŋiro ŋa Fiiliks; a dina aro Fiiliks gwiŋiriye Yahuud dugore, ŋwabrico Buulusuŋw gwigukinu.
Currently Selected:
Aⲁmaal Ar Rusul 24: HBN
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1966.
