Aⲁmaal Ar Rusul 14
14
Buulusŋa Barnaaba gwai gi Iguuniiya
1Dina jilo Iguuniiya, aluni ram gi majmaⓐ gwa Yahuud, alabiŋaijo lijo, di a liji uminyi loinyadho gwuleny lina liro Yahuud a lina liro Yuunaaniyiin. 2Abi Yahuud, lina lati luthejo Kaloŋa nyuni no dhiŋa Liumam, alkiye dugore degen dilapai dhuŋuna dhina dhike gi limegen. 3Albije ŋwamun ŋwoinyadho dabiŋaijo lijo, alre ganu gi Kweleny, gwina gwiro shaahid gwa dhuŋun dha niⓐma gwuŋun, a ŋwuldhedha ŋoma ŋadhapai ŋiro ŋina ŋipiŋipa a ŋina ŋathalije lijo galo dir doi dai degen. 4Abi liji la mediina guginudhini ganu; a coŋ degen uminyi dhuŋuna dha Yahuud, a coŋ degen uminyi dhuŋuna dha liji lina lukejinu. 5A dina ma dhuŋun je gi Liumamŋa Yahuud gwai a leleny legen dini dhagirini allaice nyol nyai, 6alliŋa dhuŋuna ibidha, alabire alela gi Listra a Darba, lina liro limediina la Liikaayuuniiya, a gi ŋwen ŋwina ŋwurejo galo. 7Athil abiŋaijo lijo mine Dhuŋuna dhina Dhiŋir.
Gi Listra
8A kwiji gweta je gi Listra gwina gwaio ŋwora nono ŋwuŋun; gwiro kiriga ro dina liŋidhina nana gwuŋun, athuŋw idhidhi gatur no. 9A kwiji ibigwa diŋini Buulusuŋw duŋwabiŋi a Buulus teje je, ŋwuliŋa darnu kwiji ibigwa gwuthi imaan darnu gwagitini momaŋ. 10Ŋwabiŋi ŋwal ŋwai ŋwina ŋwipa ŋwarnu, Diredhalaŋ ŋa dhuna ŋwora ŋwai ŋwuŋa. Ŋwudirelaŋ ŋwelila. 11A dina ma liji aŋa dhuŋuna dhina dhapo Buulus, alure gwula gwuleny, alabiŋi gi dhuŋun dha liji la Liikaayuuniiya alarnu, Kalo gimula dega gina giro ŋinena liji. 12Aldhedha Barnaabaŋw jiriny jan Zafus; a aldhedha Buulusuŋw jiriny jan Harmaas, ŋinena ruŋw gwina gwathabiŋi kwerkwereny. 13A gasiis ga Zafus, gwina gwijo dhuwa por dha mediina, apa nyidhra a dar dina digitinu ŋwaur ŋwai kour ŋediŋa liji lai ŋwari lalidhugijo. 14Abi dina ma Barnaabaŋa Buulus gwai diŋini dhuŋuna ibidha, aliŋiretha ciraŋa ganu jegen, alorta gi liji ganu, alure gwula alarnu, 15Liji lai, kworaŋ nyabapai dhuŋuna ibidha? Anaŋa ko liro liji, lina luthi dhuŋuna dhiro ŋinena dhina dhuthanya, anaŋa limajabiŋaijo Dhuŋuna dhina Dhiŋir, danya orla galo ŋidi ibiŋa ŋina ŋiro tur nyela di Kalo gina gimidho, gina gigeto Sama a gidhila a baẖr a ŋidi peth ŋina ŋijina ganu. 16Gina gabrico lijo peth lina liro liumam alela gi dai degen gi ŋwamun ŋwa jidhila jina jimerna. 17Athuŋw babrico gwidom gwuŋun dathuŋw uthi shahaada no, abi ŋeda gwapo dhuŋuna dhina dhiŋir, jidhedha kaua gi Sama, a ŋwamun ŋwina ŋwuthi ŋida ŋa dheny ŋoinyadho, athuŋw oinyaje dugore dega ŋidi ŋai ŋa dheny a iŋir ganu. 18A dina malabiŋi dhuŋuna ibidha aldhuneje lijo dhuŋun dhai dhina dhibur dilidhugijo. 19Abi Yahuud ila lina lidhi Anṯaakiiya a Iguuniiya; almirejo lijo galo loinyadho, alaice Buulusuŋw nyol nyai, alodhitha galo albitu mediina por, alarnu gwimai. 20A dina ma calmiz urejo galo, ŋwudire, ŋwuni gi mediina. A bigunu alela Barnaaba gwai gi Darba.
Aura gi Anṯaakiiya
21Alabiŋaijo lijo Dhuŋuna dhina Dhiŋir gi mediina ibigwa, alruje lijo calmiz loinyadho, albaji alaura gi Listra a Iguuniiya a Anṯaakiiya, 22albiriye dugore nono da calmiz, allabiŋaijo dilmuthini galo gi imaan, allaicinu aram aluni kidhila ga Kalo dhuŋun dhai dhina dhathijumeye ŋiya dhoinyadho. 23Aligitijo shiyuuk gi kanaayis peth, a dina malabiŋaijo Kaloŋa alje jamu, allabricijo Kwelenya gwina gwuminyilo. 24A dina mal madhina Biisiidiiyuŋw, alila gi Bamfiiliiya. 25A dina malabiŋaijo lijo dhuŋuna dha Kalo gi Barja, alule gi Attaaliya; 26a mine alela Anṯaakiiya felluuka gwai, kalo gina gabiŋadhaijina liji Kaloŋa degen kwereny dilapai niⓐma gwa Kalo gwan ŋiro ŋina ŋimalli meaje. 27A dina malobani mine, alwureje lijo la kaniisa liduŋw, allabiŋaijo dhuŋuna peth dhina dhapilo Kalo ŋalai, a darnu gimigijo Liumam gibura galo ga imaan. 28Alje mine ŋwamun ŋwoinyadho calmiz jai.
Currently Selected:
Aⲁmaal Ar Rusul 14: HBN
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1966.
